Healh minister leh UNAIDS hotute'n Mizoram-a HIV/AIDS do dan tur sawiho

Aizawl | may 8, 2021: Nimin khan India rama UNAIDS hotute leh Health Minister Dr. R. Lalthangliana te chuan virtual meeting neiin Mizorama HIV/AIDS dona kawnga civil society leh khawtlangin (vantlang mipuiten) nasa lehzuala hma lak ho theih na tur kawng te sawiho a ni a. He meeting ah hian UNAIDS lam atangin Dr. Bilali Camara, Country Director; Nandini Kapoor Dingra, Adviser; Dr. Sundar Sundaraman, consultant leh Dr. C. Lalsangzuala Consultant te telin Health Minister hi Health Secretary Pu R. Lalramnghaka; Dr. Lalthlengliani, Project Director leh MSACS official ten an tawiawm. 

He meeting ah hian HIV/AIDS dona kawnga Mizoram hmabak a la thui zia te tarlan niin UNAIDS lam hian Mizorama kohhran leh tlawmngai pawl tha tak tak avangin he hri hluar zel tur venna tura hmalak zelna turah beiseina sang tak an neih thu an sawi a. MSACS lam chuan high risk community ten National Aids Control Programme an hriatchian a tul thu te, anmahni ngei pawh an inpuih tawn theihna tura capacity building a pawimawh an tih thu te tarlangin, UNAIDS chu hemi atana ruahmanna siam thuai turin an ngen. 

Health Minister chuan UNAIDS-in kan state dinhmun hria a he hri dona atana hma a lakna avanga a lawm thu te, Mizorama kohhran hruaitu leh tlawmngai pawl -YMA/MZP/MHIP etc.te leh ram hruaitu HIV/AIDS dona atana inhawng tak takte avanga chak lehzuala hma lak theih ngei a beisei thu te a sawi a; heng pawl hrang hrangte nen lungrual taka kan thawhhona hnuaiah hian high risk community te pawh tangkai takin hman theih an nih a beisei thu a sawi. Minister hian HIV/AIDS dona atan Health Department bakah line department hrang hrang - School Education, Higher & Technical Education, Social Welfare, Home (Prisons & Police), Excise & Narcotics bakah kohhran leh tlawmngai pawl ten sawt zawka an thawhho theihna atana funding a pawimawh thu leh hemi atana UNAIDS lam puihna mamawh a nih thu te a thlen bawk. 

Nimin vek khan Health Minister hian Covid-19 veite enkawlna damdawi tha bik supply tur leh vaccine kan mamawh te pe tura Union Health Ministry-a a lo ziah tawh bawhzuiin Dr. Harsh Vardhan, Union Health Minister chu telephone in a bia a, Mizoramin harsatna a tawhte hriatpuia Mizoram mamawh a dilte rawn pe ngei turin a ngen bawk a ni.

- DIPR