SINGAPORE-A MIZO NULA-TE THAWK ROPUI

(Singapore Mizo Nula-te din “Singapore Mizo Charity” fak an phu)

- Dr. John Hlychho

1. SINGAPORE-AH MIZO-TE
Singapore-ah hian mihring 5.84 millions (2021) lai an chêng a. A area zau zawng hi 721.5 sq.km a ni. He ram nuam leh changkâng takah hian, Mizo (Zohnahthlâk zawng zawng chhiar telin) 3000 vêl an awm ve a ni. Singapore-ah hian Mizo-te hi kum 1994-1995 bawr vêl aţanga awm ţan angin an hria a. Kum 1997 vêl aţang khân Chin hmingin Mizo, Halkha leh Tedim te inzawmkhâwmin Pathian biak Inkhâwmna Fellowhsip an nei ţan nia hriat a ni bawk.


Tunah chuan, Mizo Christian Fellowship of Singapore a ding ta a. Sunday apiangin Pathian biak inkhâwm an nei ţhin a, inkhâwm zât hi mi 150-350/400 bawr te an ni ţhin. Heng Kohhran hun pawimawh Easter Sunday angah te chuan mi 600 chho te pawh an ni a. Christmas ah te phei chuan mi 1000 chuang te pawh an tling hial ţhin a ni.
Singapore-a Hnathawka kal tur hian, kum 23 tling chin, Class VIII- Graduate te tân chuan hnathawh tur a awm remchan theih vek avangin, Agent-te kaltlangin Mizo Nula tam tak hnathawkin an kal tawh nghe nghe a ni. Mizo Nula-ho Hnathawh hi Professional line, Domestic work leh HA/NA lam a ni deuh ber. A tam zâwk hian Domestic work leh HA/NA (Health-care Assistant leh Nursing Aid) lam an thawk ber a ni.

2. SINGAPORE MIZO CHARITY – MIZO NULA-TE
SINGAPORE MIZO CHARITY (Singapore Mizo Nula-te) pawl lo indin dân hi chiang deuha sawi a châkawm êm êm laiin a rem tlat lova, chhiartuten lo hrethiam hrâm ula. “Mipakhat ţhahnemngaihna kaltlangin, Singapore-a Mizo Nula-te chuan he SINGAPORE MIZO CHARITY hi kum 2014 khân an lo din ta a ni,” tih hi ni mai sela.
Tichuan, SMC hian Bible-ah innghahna felfai tak a nei thlap a. Matthaia 25:40, “Tihtak meuhvin ka hrilh a che u, heng ka unau tê berte zinga mi pakhat chunga in tih chu ka chunga ti in ni” tih thu hi an Thupui (Motto) leh an Pawl innghahna a ni.
He Singapore Mizo Charity hi Bible-a innghat leh Ringtute kalkhâwmin an din ni mahse, Kohhran hnuaia awm emaw, Mizo Christian Fellowship Singapore hnuaia awm emaw a ni lo tih erawhchu hre reng ila. SMC hi chu Singapore-a Mizo Nula rual intelkhâwmin an din leh an enkawl mêk a ni zâwk a ni.
Tichuan, he SMC hi a din tirh aţanga vawiin thlengin, member Nula 3200 vêl an awm mêk a. Singapore-a Hnathawka awm tawh lem lo-te pawh, he Charity ah hian an la tel zêl a ni. Tunah hian Singapore bika Mizo Nula Hnathawka awm hi mi 2500 vel an nia hriat a ni.
SMC hi Singapore-a Mizo Nula hovin an din a nih avangin a tirah chuan a hming pawh, *SINGAPORE MIZO NULA CHARITY* tih a ni a. Mahse, Singapore-a Mizo awm zinga mipa-te pawhin, he rawngbâwlnaah hian rawn tel a, sum rawn thawh ve te an duh ţhin avangin, Singapore Mizo Nula Charity tih chu *SINGAPORE MIZO CHARITY* tiin an thlâk ta nghe nghe a ni.

3. ŢANPUINA AN PÊK TAWH ZȂT
An Dinchhan leh an Innghahna Bible châng leh an Motto avangin, Mizo Unaute mimal damlo ţanpui ngai an ţanpui tam ber a. Singapore-a hah taka hna thawka, Chawlh (holiday) te hmanga Zorama an lo haw ve pawh hian, Ţanpui ngaite ţanpuiin, an thawhkhâwm ang ang-te chu an semkual ţhin a ni.
Hetah chiah hian, Singapore Mizo Nula-te ţanrual zia leh inpêkna thûk-zia a lo lang chiang lehzual a. Singapore-a awm tawh lo, Mizoram, Aizawla awm te pawhin ţanpuina te thawhkhâwmin, Charity semkualin, Hospital or Dam lo tlawhhovin, inpawh tak leh hlim takin hun an hmang ho ţhin a ni.

Heng an Sum thawhkhâwm, an thawnchhuah leh a lo dawngtute hming etc. te, official receipt te pawh chhinchhiah-in, an kawl ţha vek a, uluk tak leh felfai takin an vawng khiau bawk a ni. Hengte hi ţulna a awm huna phochhuah theih turin felfai takin an vawng thlap bawk a ni.
Tunhnai lawka, Myanmar Spring Revolution bika Myanmar-a kan Mizo unaute tha tih chak nâna, March/April 2021 chhunga Yangoon, Tahan leh Tamu lama an thawn chhuah zât bik ringawt pawh, Kyat-34,38,800/- (Dollar 4145/- or Rs.2,28,575/-) lai a tling hman a ni. Myanmar buai mêk tâna thawhkhâwmah phei hi chuan mipa lam pawhin an thawh tam hle. Mahse, ţanpuina petu zinga 90% chu Nula ho bawk hi an ni.
Tichuan, Singapore Mizo Charity-in Kum 2014 October - April 2021 chhunga Ţanpuina pawisa fai an semchhuah tawh zawng zawng hi, Rs.15,52,749/- (Dollar 33,270/-) a ni a, Ţanpui ngai mi 80 chuang an ţanpui tawh bawk a ni.


4. DEUHSAWHTU – MIZO ŢHALAI-TE
Singapore hi ram changkâng tak a ni a. Khawvêl ranking ah pawh “No.1 most competitive country and 14th most expensive city in the world” a ni pha hial a. Hetiang ram changkâng taka an awm avang hian an awmna ram tihdân-phung tam tak chu an la ve lo thei lova. Chung zingah chuan, an incheina – Kekawrbul hâk hi a ni. Hmeichhia-ten kekawr-bul nêna an awm lai thlalâk te chu Facebook leh Whatsapp vêlah a lo lâr a. He an Incheina en ringawt hian, Mizo Ţhalai zinga rilru zim leh dai-zau vak lo te chuan, an deu vak vak a, hmusit tak taka lo sawi-zui te pawh an awm a ni.

Hei mai hi duhtâwk lovin, an Hnathawh (Job) te thlenga hmusit tak taka lo sawi-hnawm sak te pawh an awm hial. Heng ho hi Mizo Ţhalai, Hnathawh mumal nei lo Social Media-a hmuh tur awm reng ho an tam ber a. An zingah hian Lehkhathiam leh Hna thawh nei pha chin leh Hmeichhe hruaitute hial pawh an tel ve bawk. Mahse, hetiang khawpa hmuhsitna leh deuna kârah hian, Singapore-a awm Mizo Nulate hi an zâm lova, an ţangrual tlat a. Vawiin thleng hian thilţha tih an bâng lo.


5. PATHIAN TȂN THIL ROPUI TAK TIH TUM RAWH
Missionary ropui tak William Carey khân, thu ropui tak a lo hnutchhiah a, “Pathian tân thil ropui tak tih tum la, Pathian hnên aţangin thil ropui tak beisei bawk rawh” tiin a lo sawi a ni. Singapore Mizo Nula-te MOTTO hi, Bible-a innghat a nih thu kan sawi tawh a - “Tihtak meuhvin ka hrilh a che u, heng ka unau tê berte zinga mi pakhat chunga in tih chu ka chunga ti in ni” (Matthaia 25:40) tih a nih ang hian, hmalam hun lo kal zêl turah pawh ţanpui ngaite tân theihtâwp chhuah zêl an tum a ni.


An MOTTO hian, an rilru leh thiltum leh thiltih a hril-chiang hle a. An thiltih ropui tak en hian, anni tluka Mizo Nula-te zinga midangte tâna luangchhuak tam hi an awm lovang. An thawk ropui tak zet zet a ni. Holiday hmanga Zorama an lo haw khâwm nikhua-te pawh hian, Zoram-a lo haw tawh-te nên, insâwmkhâwmin damlo ţanpui nân hun an hmang ţhin a ni.

Sawi hmaih hauh lo tur chu, Singapore-a Mizo Nula awm-te hian, an Hnathawhna aţangin an chhungte tân thil ţha tak tak an rawn ti ţhin hi a ni. A bik takin Mizoram leh Myanmar lama an chhungte Eizawnna siam sak leh an In leh lo din sak an awm nual tawh nghe nghe a ni.
Nula leplêrh anga an sawi leh Kekawrbul an hâk avanga an deuhsawh-ho khân, anmahni tân mai piah lamah an Chhungte tâna thawkchhuakin, thil ropui tak an lo tihsak ţhin a ni, tih han hriat hian, an chhuanawm zia leh, Mizo Ţhalaite hming tiţhatu an ni zâwk-zia a chiang hle awm e.

Singapore Mizo Nula-te, Pathian rinchhan tlat chunga, Zofate zinga ţanpuingaite tâna luang-chhuak zêl chunga hmalam pan zêl turin duhsakna sâng ber kan hlân a che u.

(Written by Dr. John Hlychho, May 27, 2021. Aizawl. Mizoram).

Post a Comment

0 Comments