MANGṬHA, REV LALHMINGCHHUANGA ZONGTE

- Lalremliana Pachuau

    

🦅Engvangin nge kohhran bil pakhata Pastawr ni si, mi tinin ui taka an sûn tak mai? Baptist kohhran lam chuan lo ui zual deuh fal bik ta pawh ni se, a awm viau tur a nih laiin, amah hre chiang apiangte’n kohhran bil sawi lova an ngaihsan rawn Pastawr chu eng ang Pastawr chiah nge maw a lo nih reng le? Zoram histawri kan en chuan, an nungchang leh an thiltihin a zir tlan êm avanga Pastawr apiang ngaihsan leh ngaihhlut hun lai ni a lo awm tawh ţhin a.

       Tunah erawh mi nazawngah kan Pastawr-te an chhuah tak sup sup avang leh, ngaihsan zawng leh ngaihhlut zawng a lo danglam tak chinah, Pastawr zingah ngaihsan hlawh pha khawpa mipui thinlung hneh thiltih nei an vâng ta pharh a nih hi. Mahse, Zoram mipui amah belchiang apiangtute’n an ngaihsan zingah Rev Lalhmingchhuanga hi chhiar hmaih theih a ni ta tlat lova ni. Tun hnai maiah Baptist kohhran chuan a misawnari zinga a ngaihhlut êm êmte a chân hnuah, a Pastawr ngaihhlut tak mai a chân leh ta a nih hi.

        Kum 2017 Book of The Year thlan a nih khân, mi tam tak rin loh lam daihin Pastawr thu ziak lehkhabu, ‘Savun Kawr Fual’ tih chu BoY atân thlan a ni nawlh mai a. Mi tam takin mak an ti a, he lehkhabu hi an ngaihven phah ta reng a. Chu lehkhabu chu Pastawr meuh ziak ni siin, ram leh hnam veina thu hla hlir, kan ram leh a chhûnga cheng mihringte kal sualna kawng hrang hrang, eirûkna leh hlemhletna, suahsualna chi hrang hrangin Zoram min palzut dan leh, damna lamtluang inkawhhmuhna kan hmu ta tlat mai a ni!

       Hei zet chuan sawi chhawn a hlawhin, khawi maw lai laiah lak chhawn a hlawh ta hle a nih kha. Pastawr berin zep ţhen nei miah lova Zofate suahsualna, ram hruaitute bawhchhiatna leh kohhran kalphung dik lohna, YMA thlengin a rawn tarlan tak nghauh nghauh siah chuan, ram leh hnam hmangaihna thinlung nei ik tawh chuan, he lehkhabu hi an ngaihlu lo thei ta lova nih kha. Amah ngainatute’n Pu Val tia ngaina taka an koh, Pu Hmingchhuanga hi lehkhabu ziah maia a ram leh hnam veina thinlung khung behsak chi a lo ni awzawng lo mai a!

       Youtube kal tlangin, Kohhran awmzia sawi fiah tawhnaah chuan a la ţha filawr zak ang (kan ram leh hnam dinhmun leh thlen chin ngaihtuah ran chunga sawinaah) tih tur a rawn chhawp chhuah phei kha chuan, kohhran puipate beng a verh zar mai a! Baptist kohhran lama an hruaitute tân pawh an Pastawr hi  khap beh a ngai mai dâwn em ni, tiin ngaihtuahna sen a ngai hial ta ve ang! Mahse, a thu sawi fir ţha lutukte chu a dik lo tiin hnial thlak rual an ni si lo. 

       Pulpit tlâng a chuankai tawh hlek chuan, langsâr tak leh dimna nei miah lovin hlemhletna leh eirûkna nâ takin, Pathian thu kal tlang siin a han dem bawih bawih mai a! Kohhran mipuite, lemchanna puanzar phena kan nihna dik tak lah, a thlarau mitin a hmu fiah ropui si. Ram hruaitute bakah kohhran a hrual nat tluk zetin, mipuite pawh min dim chuang lo. Mahse, ngei ai chuan ngaihsan a hlawh ta tlat si a nih hi! ‘He Pastawr hi chu ka va duh tak êm!’ tiin a chanchin an sawi ta luai luai zawk a nih kha.

        Delhi tlânga Pathian ram zau nâna a hnathawh ropui takte chu, kohhran lamin an la tarlang turah ngai ila. Mahse, hei chauh pawh hian Pastawr awm mai mai lo a nihzia a tarlang chiang awm e. Delhi tlânga vai ram thim tak su êng tura a zuk awm hun a tawp hnuah meuh pawh, a awmna ngaia awm leh tur hian kohhranin an thlan nawn leh ngat danah, a hnathawh dan chipchiar hriatpui miah lotu pawhin, eng ang taka hna ţha nge a thawh ang tih an hai thei ngai lo ang.

       Kan Pastawr-te zingah a langa thu dik ţan ngam tawh lo, dawihzepna thlarau nena lûngrual taka lên dun thlang ta hi an tam mai! Kohhranho kan kal dik lohna leh kan hlemhletna pawh sawi lang ngam tawh lo an tam mai! Mahse, Rev Lalhmingchhuanga Zongte hi chutianga khap beh ve mai mai theih loh mihring, Krista khawngaihnaa huaisenna thahrui chak tak nei tlattu, ram leh hnam a veina thinlung dik tak up beh mai mai tum ngai lo mi a ni tlat a. Chu taka chu a ni, tun huna Zofate’n an ui tak êm êm nachhan chu lo ni ta ni!

        Mi dik leh mi ţha hriat ngam tawh lohna khawvelah Zofate kan tlu lut mek a. Kan hmai lehlam chauh mipui hmaa kan phawrh lan duh tawhna hunah hian, a rûkin Zofate chuan mi dik leh huaisen, thu dik ţantu a la melh ta fan a, a la beidawng hauh lo. Tu nge zawhte chu ţhi awrhtir ta ang tiin an mit an lên ruai a ni si a. Zoramin Pastawr-tea kan beisei, kan hmuh si loh kha Rev Lalhmingchhuanga Zongte-ah hian kan hmu ta tlat a nih hi. 

         Thihna nena an inbuan fat fat laiin, Zofate’n Pathian hnenah lûngrual takin dilna kan thlen a. Ram leh hnam pasalţha thi mek tur chu ngaingam lovin van kan au a. Mahse, chhanna lo thleng erawh heti hi a ni ta si a nih hi. Pathian remruatah hian vuivaiin awmzia a neih lohzia, Joba nun aţangin kan hmuh fiah tawh kha. Tunah chuan amah kan chawimawi let ve theih dan ber chu, a thuchahte a taka chantir tuma kan beih tlanna hi a ni dâwn ta a lo ni. Nupui fanau reng mai a lo enkawl puitling a nih hi maw le!

Mangţha, nang sûnna mittui ka chhuah lo’ng,

A tak a suak hriat hran tawh lohnaah,

Khawithlar ianga kâm thlum an chehnaah,

Nang zawng thutak paitu hriamhrei rinawm!

Ziaktu blog: https://hringchan.blogspot.com/