SERCHHIP BYE-ELECTION TITI

- K Remruatfela

Naktuk, i.e. ni 2 May, 2021 (Sun) zing dar 8:00 atang mai tawh hian Zoram khawvel ina a ngaihven rawn Serchhip Bye-Election vote chhiar tan a lo ni dawn ta a, politics lam ngaihven mite tan chuan vawiin hi Inrinni tak tak a lo ni! Serchhip khua hi zirna leh eizawnna vanga ka awm bosanna kum 15 chuang lai ni tawh mah se, ka rilruah erawh engtikahmah a la thi ngai lova, party politics-a hnemhnânna nei lo ber si hian politics erawh mi ai bâk bâk hian ka tuipui zual emaw intih châng ka nei leh hial thin! Tun tumah pawh hian ka haw chhûnga chîk taka ka zirchianna atanga Serchhip Bye-Election kaihhnawih titi a point mal te te in ka rawn chhawp chhuak leh dâwn a ni.

1. MPF te inpekna a thûk bawk a, boruak inmûng a len ang hù in inthlan boruak zângkhâi leh fel fai tak kan nei thei a, a lawmawm em em a ni. Mi tam tak chuan MPF hian Inthlan boruak nuam zawng zawng an ti reh vek an ti thin a. A ni taka, tun tum kan bye-election pawh inthlanni tak khân nilengin ka han tlân kual vel a, rin ai takin boruak a reh tlâng angreng hle a, a khawharthlâk tak zet! Heti lam zawnga ngaihdan nei an lo awm a nih pawhin an demawm lutuk hran âwm lo ve.

2. Ruling Party an rawn thawk chhuak nasa ber a, chutihlai chuan ZPM Party an phur ber thung! Candidate ber a phur tehlul nen MPCC hruaitute lam an dul em em thung a, a tawp lama BJP in boruak chhia an nei kha an khawngaihthlak em em bawk a ni.

3. Ruling Party thawhhona a inkhairual tâwk lo em ni awm tihna thuk tak ka nei a. Block level party worker te an tan tehlul nen headquarter lam ten a hmuh nghâkte thahnemngaihna an phawk pha lo deuh chuan a hriat! A thawhchhuah zâwngah chuan MLA/Minister te an lo thawk chhuak tha em em a; nimahsela, thinlung leh tihtakzetin an rawn thawk chhuak kher ang em tih erawh mi tam tak zawhna a ni.

4. Sawi tâk ang khân ZPM an phur ber a, mahse, an phur mah mah em aw tih châng erawh ka nei thin! Street campaign hmunah hialte tun bye-election leh Thuthlung hlui, Lal Nebukadnezarra huna Babulon rorelna te nen an han khaikhin leh chiam chiam thin a, Serchhip ang mi lehkha thiam tamna hmunah chuan heti tehchiama Pathian Thu nena kaihkawpa, _Lal Nehemia chuan a sawi a, Lal Hezekia chuan chuti chuan a ti..._ tih vel ang chiam chiam hi chuan mi thinlung a chawk tho pha ve tehchiam lo ang!

5.  Hun inthlâk avanga ngui leh chau tawh heti khawpa rawn chawk tho leh theitu Serchhip Pa, Pu Tlana inpekna hi a fakawm tak zet a, chutihlaia headquarter hruaitute beisei anga an rawn inpe lo leh lutuk erawh mak ka ti deuh! A lo kal chhuna te pawh an rawn sakhi chul ram fan satliah vel mai mai ni hian a lang a, ka khawhawi a zau tâwk lldeuh nge, hruaitu lawkte zingah zan riaka rawn thawkchhuak ka hmu mang tlat lo mai! Result puan hunah a pawi thui zia a lang maithei a ni.

6. Union Minister ho nen meuha rawn thawkchhuaka, boruak an rawn siam len hman tawh tehlul nen a tawp lama sum leh pai lama an mi leh sa leh kalkhawm mipuite an ti vui vai nasa lutuk leh si kha chu a zialo tak zet a ni. Inthlanni kha chuan an mi leh sa te an biru a ni deuh ber mai a, Candidate leh State President te thawhdunna hi a tha tâwk lo em ni tih hi patling zing ni lum ai titi luahtu ber pakhat a ni.

7. Tun bye-election kan neih zawh takah khân vote 16,367 tlain, mathematical calculation-ah chuan 83.8% a ni. Tunlai tak hi Zawlnei tih thumal lâr lai leh mitin te bengkhawn lai a ni bawk a, he ti hian naktuk result puan huna party tin vote hmuh dân tur ni-a ka rin ka rawn puang lâwk ve ang e. Rin dân te chu sawi a thiang alâwm le!!

1. *ZPM* = 5,683 (34.72%) or 5,500 - 5,700 votes

2. *MNF* = 5,387 (32.91%) or 5,200 - 5,400 votes

3. *MPCC* = 4,476 (27.34%) or 4,400 - 4,600 votes

4. *BJP* = 587 (3.58%) or 500 - 600 votes

5. *PC* = 182 (1.11%) or 150 - 200 votes

6. *NOTA* = 44 (0.26%) or 40 - 50 votes

7. Indpt.= 8 (0.04%) or 5 - 10 votes.

Total votes = 16,367 (83.8%).

Ziaktu: K Remruatfela