SELING - ZOKHAWTHAR

National Highway, International Corridor hi hruaipen mai mai chi a ni lo!
Dulte leh Kawlkulh khuain an khua a luh tir phet an lo tum ve ngawt hi khawbil rilru, ram pum huap tana ṭhatna tur ni lo, mahni hmasialna rawngkai a ni.


India (Mizoram) leh South East Asia inpawhna turin, Look East (Act East) Policy hnuaiah Guwahati atangin Aizawl-Seling-Zokhawthar kawngpui sial mek a ni a, mithiamte ruahmansa tih danglam tumin Kawlkulh leh Dulte khuaa a Tlawmngai pawl inzawm khawm-in an khaw 2 a hruaikawi tumin hma an la a, NHIDCL Company hnuaia Contractor te dang buaiin Gate te hial an siam a. He thil hi duh lovin Champhai a NGO pawl hrang hrangin kawngpui sial tlang vat a nih theihna turin hma an la vethung a.Hnathawktute thlavang hauhin, Khawzawl Police Thana ah F.I.R an thehlut  hial a, khua leh khua inepna  awm thei angin boruak a inmun mek a, a pawi hle a ni.

NH NO.6 kal dan tur, A sena inziak hi Kawng thar tura ruahman


    National Highway duangtu te hian kawngpui lian ṭha leh tlo, zal nuam si/chhuk chho lo, a chhawrtu tana tlan chhung reilo thei ang ber, Oil chi hrang hrang heh lo thei ber, rualrem ṭha siam hi an tum a niin kawh bik nei a ruahman a ni ṭhin. Kawngpui kiang hnaia khua tlawh kual den den tura tih a ni lo tih leh National Highway, International Corridor hi hruaipen mai mai chi a ni lo tih  hi Dulte khua leh Kawlkulh khua chauh ni lo, Mizoram mipuiin kan hriat tlan a, Mi thiamten uluk taka an ruahman anga kawngpui kal tlang tir hi a ṭha ber tih kan hriat a, kan pawm tlan a ngai a ni.

  Seling to Zokhawthar National Highway No.6  hian a kalna kiang hnai khua Melbuk, Mualkawi, Champhai, Chhungte, Tuipui, Khawzawl, Kawlkulh leh Dulte te hi paltlang tura ruahman a ni  lova, a kiang hnaia miten an hman ṭangkai phak turin an khaw kiangah an kal tir a. Hetihlaia Dulte leh Kawlkulh khuain an khua a luh tir phet an lo tum ve ngawt hi khawbil rilru, ram pum huap tana ṭhatna tur ni lo, mahni hmasialna rawngkai a ni. An tan chhan pawh Union Minister in Tweetter kal tlanga thu a chhuah leh Kumin January ni 13 a Chief Minister in an khua a tlawh ṭuma a sawi vang niin an sawi a, an khua hi a tlawh dawn lo tih hi a hma daih aṭangin an hre tawh tih an chet dan aṭangin a hriat a ni.

 He kawngpui hi mithiam ten an ruahman anga kal tir a nih chuan  kawngpui awmsa aiin KM 26 -30 velin a tawi zawk dawn a,  a chhuk chho lo bawk anga, State Highway-a darkar khata  KM 20-30 a chaka an tlan ṭhinna ah KM 50-60 chuang te a chakin an tlan thei tawh ang a, a kiang hnaia mite bakah Khawzawl leh Champhai District mipuiten Mizoram khawpui ber, dam loh hritlan ni khua, sorkar hotu dawr leh nitin mamaawh chakkhai an lamna atana an pan ber, Aizawl khawpui chu awlsam tein an thleng ve thei tawh dawn a, tuna  a chhawr ṭangkaitu tur Mizoram khawchhak tlangdung mipui tan chuan NH No.6 tih tlang thuai hi a thlakhlelhawm ngawih ngawih ang tih a rin theih a ni.
 Mizoram kawngpui kan neih hmasak te hi mithiamten an ruahman ang ni lo, kawngpui sira khuaten an mahni khua tlawh tir tura hma an lak ṭhin avangin an  ing-euh, kikawi kual in a chhuk chhoh phah a ni. Tun hma lama kan chin dan ṭha lo kha bansanin NH No. 6 hi kan ram  leh hnam tana ṭha ber tur anga mithiamte ruahman sa kal tlangpui hi a himin a ṭha ber ang.

- Lenrual Daily
Editorial Ni 17.5.2021



Post a Comment

0 Comments