School Of Nursing Thingdawl zir chhuak pali hripui do turin inpe

Aizawl | May 19, 2021: Hripui kan do mekna-ah thawktu indaih lohna hriain School of Nursing, Thingdawl (SONT) zirlai chhuak mi pali chu hripui do turin an in-volunteer.

Hripuiin a tihbuai zirlaite hripui do turin an inpe a, mahni inphat a an zirlai chhuak tate inpekna hi SONT Principal Laltanpuii chuan, "An inpekna ropui kan ti a, kan chhuang tak zet a ni," tiin EXPLOREMIZORAM.COM a hrilh.

Thingdawl khaw chanchinbu chhuak 'DAWLKHAWMAWI' chanchinbu-in a tarlan danin School of Nursing Thingdawl, Kolasib District atanga First Batch GNM zo tawh,  Covid Care Centre ( CCC) a thawktura in volunteer te hi mi plai niin, Esther Lalvenhimi d/o James Lalrinsanga,  Lungdai khua chu ZMC-ah a thawk mek a, H Lalrinzuali d/o H Lalrosanga Khawzawl khua chu Khawzawl Covid Care Centre-ah, Baby Zorinpuii d/o Lalramzova (L) Salem Veng Lunglei mi chu Tlabung CCC-ah leh Malsawmhlui d/o Hmingthantluanga Diakkawn Kolasib chu Kolasib CCC-ah te an thawk mek a ni.

SONT principal hnen atanga EXPLOREMIZORAM.COM thu dawn danin, SONT zirlai hmasa berte hian hripui vangin an zirlai kumin kumtir January 2021 khan an zova, February 4 khan graduation pawh hun harsa tak karah an nei a. Heng zirlai chhuak tate hi mi 19 niin, hmin hrang hrangah an thawk mek a ni.

SONT hi 2017 December khan bul tan niin, zirturtu, staff leh hmanrua tam tak indaih lo tak chungin bul tan a ni a. Heng bul tantu zirlaite hi Mei si de ve ve tinungtute an ni a, hun harsa leh khirh tak tak paltlangin, an zirlai atana an mamawh hmanrua tam tak pawh nei zo lova thahnemngai taka beitute an ni a. An zirna hmun a la changtlun loh vanga harsatna an tawh chu thuhran nise, Hripui vangin an zirlai an khaihlak a, Nikum October thlaa chhuak tawh tur an nih laiin hripuiin tibuaiin kumin-ah an chhuak thei ta chauh bawk a ni. An harsatna tam tak a taka kan hmuhpui avangin SONT-in Hetianga zir chhuak an han nei a, an zirlai chhuak tate rilru puiltling taka an chhuak hi EXPLOREMIZORAM.COM chuan a lawmpui tak zet a ni.