SBI Foundation-in Mizoram Sawrkar-ah PPE set 600 hlan

Aizawl | May 27, 2021: SBI Foundation chuan COVID-19 hripui leng dona hmanraw pawimawh tak Personal Protective Equipment (PPE) full set 600 Rs. 8,61,000/- man hu chu vawiin khan Mizoram sawrkar hnenah an hlan a. Heng PPE hi Health Minister Dr. R. Lalthangliana hnenah SBI Foundation aiawhin SBI Regional Manager LP Lalchangkima leh a thawhpui ten MINECO tualah an hlan a ni.

Health Minister Dr. R. Lalthangliana chuan SBI Foundation leh SBI te inpekna chu fakin, kan mamawh hun lai tak zela an rawn che thin hi a ropuiin a lawmawm takzet a ni, a ti. COVID-19 hripui leng dona kawngah harsatna tam tak kan hriat ngai loh leh beisei ngai loh kan tawng a, hetiang boruak kara kohhran, pawl leh mimal inphalte zara thilpek kan dawng thin hi a lawmawmin, he hripui dona kawnga thawktute pawh chakna thar min pe thin a ni, a ti.

SBI Regional Manager LP Lalchangkima chuan PPE hi SBI malsawmna dang "SBI Foundation" kaltlanga pek a nih thu a sawi a. Mizoramin a mamawh nia an hriat ICU khum 100 lai chu CYMA nen tangkawpin SBI Foundation ah hian an dil mek thu a sawi bawk.

SBI Foundation hi India ram pumah SBI hnathawkten an phal anga sum an thawh atanga din niin, ram pumah thil pek hrang hrang an lo hlan thin tawh a ni.

Vawiina PPE set 600 hlan hi full set niin face mask, face shield, mit venna goggles, hand gloves, pheikhawk tuamna, lu tuamna, suit leh a paihna tur (bag) a chhawm a, set khat hi Rs. 1435/- man a ni.

Nikumah khan SBI Foundation kaltlang hian Ventilator 3 leh PPE set 600 Mizoramin a dawng tawh a, kar hmasa lawk khan PPE set 100 dawng lehin, Mizorama SBI hnathawkten an sum thawhkhawm atanga COVID-19 vanga nunna chante ruang phurhna tur "Morgue Van" an lei chu Health Minister hnenah an hlan tawh bawk a ni.

- DIPR