NAUPANG ȚANPUINA PE TE CHUNGCHANG

Lockdown hnu in kan in tihhmuh thar a. Han thlir zau deuh teh ang.

Naupang țanpuina hlan tu te hian hrileng mek chungchang hi an hre tawi khawpin a rinawm. Covid 19/Corona a leng mek, pawn chhuah loh tur, sanitizer in kut sil tur, Inah awm tur, chhuah dawn chuan hmai tuam tur etc. heng ho hi an hre ve awm e. Mi harsa te țanpui duhna emaw, task force țanpui duhna emaw hi an rilru ah la thawk tham a ni hlawm lo in a lang. Waiwai ei ringawt rilru a la awm rual te an ni.

Chuvang chuan hetianga țanpuina hlan tu te hi an nu leh pa te ațanga chhuak a ni. Thufingte 22:6 a kan hmuh ang in 'Naupang chu a kalna awm kawngah chuan zirtir ula, A upat hun pawhin a thlah lo vang.' Hetiang zirtirna chang kan hria hi a lawmawm in, nu leh pa te tih tur, mawhphurhna reng a ni.
MAHSE, nu leh pa te hian rilru thianghlim tak kan put a ngai. Kan Pathian thu Matthaia 6:1-4 ah chuan, "In thil tha tihte mi hmuh atan, mihring mithmuha ti lo turin fimkhur rawh u; chutilochuan in Pa vana mi hnenah chuan lawmman in nei lo vang. 
 "Chutichuan, mi hnena englo i pekin, mi vervekten mi fak an hlawh theihna tura, inkhawmna inahte, kawtthlerahte an tih thin ang hian, i hmaah tawtawrawt hamtir suh. Tih tak meuhvin ka hrilh a che u, an lawmman chu an hmu zo tawh. 
 Nang erawh chuan mi hnena englo i pekin, i kut ding lamin a tih chu i kut vei lamin hre suh se, i englo pek chu arukin a awm theih nan; chutichuan, i Pa aruka hmu thintu chuan a rul ang che."

Kan fate midang țanpui turin kan zirtir ang. An khawlbawm ațanga midang țanpuina hlan phal turin kan zirtir ang. Pathian duhdana midang țanpui dan tur dik takin, Pathian in a hriat chuan a tawk tihna nen, a ruk pawhin kan pe mai tur a ni.


Tuna kan in țanpui danah hi chuan nu leh pa te'n lar kan khel tel a ang riau țhin. Naupang rilru ah pawh mi kan țanpui chuan thlalak kher a ngai tih kan tuh tel te hi a țhalo hle a ni.
Nu leh pa te hian kan duh phawt chuan social media ah kan lang lo thei reng a. Midang tih hmuh theihna emaw, midang zirtirna tur emaw, Pathian ropuina tur a nih chuan sawi lan zeuh hun tur te chu a awm mahna.
Naupang rilru thianghlim tak te hi RILRU THIANGHLIM tak bawk in i zirtir ang u.


Post a Comment

He post chungchanga i ngaihdan lo sawi ve rawh:

Previous Post Next Post