MZP-in Burma Sawrkar thar thlawp; Hnam hla inphuahsiak top 5 puang

Aizawl | May 3, 2021: MZP general headquarters Extended OB (Office Bearer’s) Meeting an president B Vanlaltana hova vawiin a neih chuan Myanmar Zohnahthlak unaute buaina leh harsatna tawh chungchanga hma an laak tawhte a thlirlet.

Meeting chuan Myanmar-a mipui thlan M.P tena an din CRPH (Committee Representing Pyidaungsu Hluttaw)-in sawrkar thar National Unity Government (N.U.G.), ni 16 April 2021(zirtawpni)-a an din chu tha a tiin a thlawp tlat a, he mipui sawrkar din hi India sawrkar leh ramdang sawrkar pawhin pawm ngei se a duh a, mipui sawrkar hi MZP chuan a thlawp zel dawn a ni.

MZP chuan Myanmar atanga  Mizoram-a himna zawnga lo lutte chungchang ngaihtuahin, Myanmar ram buaina hian eng chen nge a awh dawn hriat a ni lo va, hemi chungchang  buaipui tur leh a tul anga hma la chhunzawm turin Relief Committee a din a, committee hian kan unaute tana ding tlat chungin a tul angin hma a la chhunzawm zel dawn a ni.

Kan unaute harsatna tawh mek hi hun reilote chhung a nih theih rualin hun rei tak chhung pawh awh thei a ni a, he buaina-ah hian a tawp thlenga kan thisen zawmpui, kan unaute tana ding tlat turin MZP chuan Mizoram mipuite a sawm nawn leh a ni.

Mizo Zirlai Pawl (MZP) buatsaih Ram leh Hnam hmangaihna hla inphuahsiak chu May ni 03, 2021 - Thawhṭanni khan MZP Pisa puiah puan a ni a. A hnuaia mite hi top 5 a tlingte an ni:

1. Zeng kan ti nge? B. Malsawmkima, Chanmari, Lunglei.

2. Kan zam dawn lo  - Lalhmachhuana Zofa, Aizawl

3. Zam lo'ng aw - C. Lalhmachhuani, Saitual Chhimveng

4. Zoram Pangpar - Rosangliana, Chanmari, Lunglei

5. Harh ta che Mizo - C. Lalṭhachhungi, Leitan South, Durtlang.

MZP buatsaih hla inphuahsiakah hian Pu C. Vanlalvuana, Pu David Z. Hmar, Pu T. Laldintluanga leh Pu Zothanmawia te chu endiktute an ni. Top 5 a tlingte hi Music Video siam tum a ni a. MZP chhungkua leh sawm bik mi hrang hrang ten vote thlakin, top 3 an thlangchhuak zui leh ang.

Top 5 result hi MZP President Pu B. Vanlaltana a puang a. Intihsiaknaa tel zawng zawngte hnenah lawmthu a sawi.