Muallungthu VC-in ZMC tana Sikul pahnih ram hlan anga darh chungchang MSU-in an enfiah

Aizawl | May 18, 2021: Mizo Students’ Union (MSU) General Headquarters, Aizawl chuan Zoram Medical College (ZMC) extention atana Muallungthu Village Council/Court in Gov’t Middle School leh Gov’t Primary School Muallungthu ram an pe nia thu thang awm chungchang vawiin khan Muallungthu VC leh zirtirtute hmu in a hmunah tlawhin an endik.

He hunah hian MSU hmingin MSU president J Lalmuanzuala leh general secretary Samuel Zoramthanpuia te an kal a,  Muallungthu VCP hovin VC member-te leh zirtirtute'n lo dawngsawngin inkawmna hun tha tak an nei.

Muallungthu khua-ah hian Primary School pahnih awmin khaw chhunga awm zawk hi zirlai awm loh avangin rauhsan a ni a, tuna zirlaite kal mekna zawk chu Falkawn khua nena an inri na hnaiah a awm a. He hmun hi Education Department ram niin School  pass no 13 of 1978 memo no. DLR/HP/S-1/78 of 3rd May 1978 hmanga pek a ni.

Tunlai kan ram hrileng nen a zirna in hawn theih a nih loh lai a VC te’n ram an lo pe mai nia lang chu MSU chuan pawi a tih thu Muallungthu khawtlang hruaitute an hrilh.

Muallungthu VC te chuan zirna lama hmasawnna an duh zia leh zirlaite tan High School an mamawh em em thu sawiin, sawrkar school ah zirlai an tlem avangin tuna school awmna hmunah hian ZMC Extention ruahman theih a nih chuan pawi an tih loh thute, Department lam an inbe fel a nih chuan engmah sawi theih an neih loh thu MSU hruaitute an lo hrilh a ni.

Health Department lama lehkha pek chungchangah VC te chuan ram chu anmahni pek theih a nih loh thu an hriat rualin khawtlang hmasawnnan thutlukna an siam mai niin an sawi bawk.

MSU chuan Muallungthu VC te’n zirna hmasawnna tihkhaihlak theihna nia lang thutlukna an lo siam anga May 14 leh May 15, 2021 a chanchinthar leh social media hrang hrang a tarlan chu thudik tawk lo a ni tih a hriat hnuin pawi a ti em em a, hetiang thil hi tun hnuah a thlen tawh loh nan Mizo mipuite fimkhur turin a chah nghal a ni.

MSU chuan zirna hmasawnna tithuanawm thei thil reng reng chu a dodal zel dawn a, Mizoram hmun hrang hrang Zirna hmun ramte sat hek zawnga thutlukna siam lo turin Zoram tlang hrang hranga khawtlang hruaitute a ngen bawk a. Hemi atana MSU hmalakna kawng hrang hrangah Zoram mipui leh zirlaite thlawpna MSU chuan ngen nghal bawk a ni.