LOCKDOWN: sawrkarin inkaihhruaina khauh zawk tichhuak

Aizawl | May 3, 2021: Mizoram sawrkar chuan hri laka mipui him zawk nan vawiin khan inkaihhruaina thar leh khauh zawk a tichhuak thar.



Mizoram chhunga inkhuahkhirhna ennawn Revised SOP, vawiin 3.5.2021 a tihchhuahah mipuite hriattur pawimawh langsar zualte hetiang hian tarlan a ni.
 
1. Mizorama lo lut tur te chuan mPass-ah an in-register ngei tur a ni a. Entry points te leh Mizoram rawn luh theihna hmundangah te chuan uluk takin Deputy Commissioner leh Superintendent of Police te ruahhmanna angin Police leh VLTF te an duty ang.

2. Mahni khaw chhung leh District chhunga ṭul bik thila zin veivak te chuan an chhuah ṭanna veng VLTF/LLTF te hriatpuina lehkha an keng tur a ni. Chu lehkhaah chuan an kal ṭanna (origin) leh zinna/kalna tur hmun (destination), ni leh darkar te a chuang tur a ni.

3. Ṭul bik thila District pawn lama zin chhuah ngai te chuan an awm mekna Deputy Commissioner/SDO (Civil)/ BDO hnen aṭangin phalna an la hmasa tur a ni.

4. Phalna neia dawr hawnte chu tlai dar 4:00-ah khar vek tur a ni.

5. Phalna neia kalpui theih dawr leh service center te chu LLTF/VLTF te hriatpuina leh SoP zawm chungin Inrinni-ah zing dar 10:00 atanga chawhnu dar 2:00 thleng hawn theih a ni ang a, heng ni leh darkar bakah hi chuan hawn phal a ni lo. Tin, dawr hawn hun chhung hian tum khata mi tam tak an punkhawm loh nan inchhawka dawr kal dan tur LLTF/VLTF ten an ruahman ang.

6. Inrinni zing dar 5:00 atanga zing dar 10:00 thleng sa leh thlai zawrh theih a ni ang. A zawrhna hmun tur remchang chu LLTF/VLTF ten an ruahman ang a, mipui pungkhawm tam lo tur leh social distancing kalpui turin ruahmanna an siam ang.

7. Secretary/ Head of Department/ Head of Office ten hna tul zual thawk turin mi tlem thei ang ber office kal tur an ruat ang a, detailment order an siam chu DM&R Department leh Deputy Commissioner te hnenah a copy an pe tur a ni. Tin, office kal turte chuan anmahni ruatna detailment order chu police/COVID19 Executive Duty te enfiah turin an keng ngei ngei tur a ni bawk. Office-a kal tur ni lo leh COVID-19 Duty-a tel lote chuan anmahni in atangin office hna an thawk ang (work from home).
 
8. Sawrkar hnathawk leh sawrkar sum aṭanga hlawh la te chu COVID-19 duty turin a ṭulna apiangah hman an ni ang. Hetianga duty tura ruat te hi an duty-na hmun turah zing dar 9:30 hmain an thleng tur a ni.

9. Mi panga aia tam 1o thawhna mahni ina heng nei te - carpentry workshop, steel fabrication workshop, bakery, tailoring, weaving leh hetiang lam thilah te chuan VLTF/LLTF te hriatpuinain hna thawh phal a ni. Amaherawhchu, veng dang atanga hna thawktu lak luh phal a ni lo.

10. Hnathawh hrang hrang - retaining wall/ drain/ kawng siam, building sak/ repair/thiah, kawng laih, lei dawh te leh chutiang kawnga hmalakna – fur hmaa thawh zawh ngei ngai leh chhiatna thleng thei ven nana thawh hmanhmawh ngaite chu VLTF/LLTF te hriatpuinain thawh chhunzawm phal a ni. Heng hna te hi ram chhunga awm sa labour te chauh ruai a thawh tur a ni.

11. Lo neitu leh huan neitute, ran vulhtute, sangha dil neitu te leh athawktute chu phalna hranpa lak ngai lovin an hna thawh phalsak an ni a, lo/huana hna thawk tura ram riah pawh phal a ni. Hmun khata mi 5 (panga) aia tam awmkhawm erawh chu khap a ni. Lo/huana kal/feh turte chuan zing dar 9:30 hmain khaw chhung (city/town area) an chhuahsan hman tur a ni a; tin, police/ COVID-19 Executive Duty-te check theih turin VLTF/LLTF te phalna lehkha emaw an kalna tur lo/huan an nei ngei a ni tih lantirna document (LSC, periodic patta,adt.) an keng ngei tur a ni.

12. Quarry-a lung lak, block/ brick siam, rawra her leh chhut leh thingzai khawl (saw-mill) a thing zai theih a ni ang.

13. A chung (10-12)-a hna thawk tur te hi an hnathawhna hmunah zing dar 9:30 hmain an thleng tur a ni. Khawpui chhungah zing dar 9:30 leh tlai dar 4:00 inkarah an veivah phal a ni lo




Inkaihhruaina kimchang:
State Executive Committee on State Disaster Management Chairman Pu Lalnunmawia Chuaungo, Chief Secretary ni bawk chuan a hnuaia tarlan ang hian thupek thar a siam

"Mizoram chhunga COVID-19 kai thar chak taka an pun zel avangin leh a vei mek thahnem tak an awm zui zel avangin Mizoram State Disaster Management Authority chuan ‘LOCKDOWN’ Sawrkarin file No. B. 13021/101/2020-DMR/Vol-IV dt.01.05.2021 hmanga a chhuah tawh chu her danglam hretin inkhuahkhirhna thupek khauh lehzual (Revised Lockdown Guidelines) hi ni 11.05.2021 zing dar 04:00 thleng hman tur siam a ni a. Hei hian COVID-19 chungchanga inkaihhruaina Order hmasa zawng zawng a luahlan (supersede) ang".
 
A. MIZORAM PUMA HMAN TUR INKHUAHKHIRHNA
1. Mizorama lo luh chungchang
 Mizorama lut turte reng reng chu Sawrkarin a hawn mek entry points kaltlang chauhvin an lut thei ang. Mizorama lo lut tur te chuan mPass-ah an in-register ngei tur a ni a. Entry points te leh Mizoram rawn luh theihna hmundangah te chuan uluk takin Deputy Commissioner leh Superintendent of Police te ruahhmanna angin Police leh VLTF te an duty ang.
1.1. Screening.
India ram pawn leh India ram hmun dang aṭanga Mizoram-a lo lut reng reng chu Mizoram an lo luhna (Point of entry)-ah Rapid Antigen Test (RAgT) hmanga en dik vek an ni ang a. RAgT positive te chu enkawl dan tur dinglai (Protocol) angin enkawl zui tur an ni ang. Hetiang hian Mizoram aṭanga zin chhuak, lo haw leh te pawh endik vek tur an ni ang.  
1.2. Quarantine.
1) RAgT negative te chu fimkhur takin self-monitoring (mahni hriselna inchîk)in mi dang nena in-contact lovin ni 10 chhung mahni inah (Home Quarantine) an inkhung hrang ang. Ni 10 hnuah RT-PCR/TrueNat test an nei ang a, negative result an neih chuan inkhung zui a ngai tawh lovang.  
2) Home quarantine-a awm turte chuan inkhung hranna tur riahna (bedroom) leh inthiarna (attached toilet) hran an nei tur a ni. Chutiang ruahmanna nei te chu an chhungkaw member te inkhung hran ve kher a ngai lo vang. Amaherawhchu, midangin an ṭawmpui loh tur riahna (bedroom) leh inthiarna (attached toilet) hranpa nei lo home quarantine phalsak an nih erawh chuan an chhungkaw member te pawh pâwn chhuak lo leh midang nen inkalpawh lovin ni 10 chhung an awm tur a ni.
3) Home quarantine-a awmna tur hmunhma (facility) nei lote chu hotel (paid quarantine) emaw Community Quarantine Facility (CQF)/ Government Quarantine Facility (GQF)-ah anmahni sensovin an inkhung hrang ang.
4) Home quarantine leh quarantine facility-a awm ten Health & Family Welfare Department-in zawm tur inkaihhruaina a siamte chu an zawm ngei tur a ni.  Chung inkaihhruainate chu an zawm ngei a ni tih an awmna veng LLTF/VLTF ten an endik (monitor) ang.
5) Hun rei lote chhung (short stay), darkar 96 aia rei lo Mizorama cham tura lo kal te chuan entry point an lo thlen hmâ darkar 96 aia hlui lo RTPCR/TrueNAT/CBNAT (ICMR recognized laboratory) hmanga COVID-19 test result negative (SRF ID awm) an neih a, entry point-ah RAgT negative result an neih bawk chuan inkhung hran a ngai lovang. Anmahni chah chhuaktu/buaipuitu ten an tana hmun ruat bikah dahin fimkhur takin an tih tur bik an tihpui ang a, midang nena in-contact lo thei tur ang berin ruahmanna an siam ang.
6) State pawn aṭanga thlawhnaa lo haw/lut te chu Transport Department-in empanelled vehicles (vide Order No.G.28016/2/2020-TRP dt.16.04.2021)-a a tarlan ten an phur thei ang a, mahni motor hmanga zin haw phurtu te chuan an passenger-te nena in-contact lo thei tur ang berin fimkhur takin ruahmanna an siam ang. Kalkawngah pawh midang nena in-contact tura din khawmuan loh tur a ni.
7) Screening leh quarantine dan tur fel taka ruahman a nih theih nan Mizoram an rawn luh hmain mCOVID-19 mobile application mPASS-flight emaw mPASS-road hmangin an in-register lawk tur a ni. Home quarantine leh Hotel quarantine dil duh tan online-in https://mcovid19.mizoram.gov.in-ah a dil theih tawh bawk.
8) Mizoram-a lo lutte quarantine dan, COVID-l9 testing, quarantine mêk leh hri vei (asymptomatic, mild leh severe case)-te enkawl chungchang, COVID Care Centre, Dedicated COVID Health Centre leh Dedicated COVID Hospital te kalpui dan chungchangah Health & Family Welfare Department-in inkaihhruaina a siamte chu khauh taka kalpui tur a ni ang. Tin, quarantinea awm/ thlen man, ei leh in man leh test-na man pek dan tur erawh chu Notification No.B.13021/187/2020-DMR/Vol-I dated 26.04.2021-in a tarlan angin kalpui a ni ang.
1.3. Testing.
H&FW Department-in a bituk angin COVID-19 test man hi zin veivak leh quarantine-a awm ten an pe/chawi ang. Test chi hrang hrang man pek/chawi dan tur chu (H&FW Department-in an tihdanglam hma chu) a hnuaia tarlan ang hi a ni ang.
a) RT-PCR : Rs. 1,200/-
b) TrueNat : Rs. 1,000/-
c) RAgT   : Rs.   200/-
 
 
1.4. Isolation.
1) Mizorama lo lut entry point-a positive hmuh chhuah te leh hmun danga positive hmuh chhuah te reng reng chu an hriselna dinhmun ngun taka en an ni ang a, symptoms nei lo (asymptomatic) leh hrisel lohna dang nei lo, chhungkaw member dangte nena intlawhpawh lova inkhung hran theihna bedroom leh inthiarna hranpa neite chu mahni inah (home isolation-in) inenkawlin an inkhung hrang ang.
2) In lama inenkawl (home isolation) te hian Health & Family Welfare Department-in zawm tur inkaihhruaina a siamte chu an zawm ngei tur a ni.  Chung inkaihhruainate chu an zawm ngei a ni tih an awmna veng LLTF/VLTF ten an endik (monitor) ang.
3) Home isolation-a awmte chu Health & Family Welfare Department-in uluk takin an vil zui ang.
4) In lama inenkawlte hian hriselna chungchangah harsatna an nei a nih chuan COVID-19 (Medical) helpline number (Toll free 102, landline 0389-2323336, 0389-2322336 leh 0389-2318336)-ah telephone-in an harsatnate an thlen thei ang.
2. Containment Zones
1) A ṭul a nih chuan Deputy Commissioner ten an District chhungah Containment Zone an puang thei ang a, Containment Zone puanah te chuan Deputy Commissioner-in thupek a siamte zawm tur a ni ang.
2) LLTF/VLTF ten veng/khaw bila inkharkhip leh khualzin luh phal loh an puang thiang lovang. Tul bikna avanga inkharkhip a ngaih chuan Deputy Commissioner phalna an la ang.
3. Bungraw Chawkluh Leh Thiar Chungchang
1) State pawn aṭanga bungraw lakluh nan phalna hranpa lak ngai lovin lakluh theih a ni ang. Amaherawhchu, mCOVID-19-ah an in-register vek tur a ni.
2) Bungraw lak luh phurtute (driver leh handyman) reng reng hi entry point-ah uluk takin screening kalpui chhunzawm a ni ang. Bungraw phur motor-ah reng reng hian driver leh handyman bak midang (passenger) an chuang tur a ni lo.
3) State pawn aṭanga bungraw lak luh phurtute (driver leh handyman) te chu an kalphung pangngai angin khaw dâiah anmahniin eirawng an inbawl chawp ang a, khaw chhungah midang nen inchiahpiah lovin an bungrua an unload zawh veleh an let leh nghal ang. An bungrua unload chhung hian midang te aṭanga feet ruk (6) tala hla-ah an awm tur a ni.
4) State pawn aṭanga bungraw lak luh phurtute (driver leh handyman) te chu backload lak tur zawngin Mizoram hmun dangah an kal kual tur a ni lo.
 
 
 
5) A chunga tarlan driver leh handyman-te hian kawng laka harsatna an tawh thulhah State Control Room (Toll free 1070, landline 03892342520, mobile 7628072785 and whatsapp 9366331931)leh COVID-19
(Medical) helpline  number (Toll free 102, landline 0389-2323336, 0389-
2322336 leh 0389-2318336)-ah telephone-in an harsatnate an thlen thei ang.
4. Zirna In, Sakhaw Biakna Hmun Leh Mipui Punkhawmna Hmun Te
1) Public park, picnic spot, movie theatre, gym, football/ futsal ground, community hall, restaurant, shopping complex, mall, phalna pek ni lo dawrte leh intawllenna hmun zawng zawng chu khar chhunzawm tur a ni.
2) Zirna in leh Sakhaw biakna hmun te chu khar chhunzawm tur a ni ang.
3) Board Exam, All India level Exam, recruitment exam adt. te chu phalna hranpa pek te chauh kalpui theih a ni ang. Hengah te hian exam huaihawttu ten SoP khauh takin an kengkawh tur a ni.  
4) Inneihna leh reception-ah mi 30 (sawmthum) aia tam punkhawm phal a ni lo.
5) Mitthi vuina ah mi 30 (sawmthum) aia tam punkhawm phal a ni lo.
6) Chhiatni/ṭhatni puipunna-ah ei leh in sem/siam phal a ni lo.
7) Mipui punkhawmna heng – birthday leh anniversary lawmna, games & sports, book release, lungphun leh intihhlimna ang chi reng reng te chu he hun chhung hian huaihawt phal a ni lo.
5. Zin Veivah Chungchang
1) Loh theih loh thilah lo chuan zin veivah loh tur a ni.  
2) Mahni khaw chhung leh District chhunga ṭul bik thila zin veivak te chuan an chhuah ṭanna veng VLTF/LLTF te hriatpuina lehkha an keng tur a ni.
Chu lehkhaah chuan an kal ṭanna (origin) leh zinna/kalna tur hmun
(destination), ni leh darkar te a chuang tur a ni.
3) Ṭul bik thila District pawn lama zin chhuah ngai te chuan an awm mekna Deputy Commissioner/SDO (Civil)/ BDO hnen aṭangin phalna an la hmasa tur a ni.
6. Chhungkua/mimal eizawnna kaihhnawih ni lo a huhova lui kal, ramhnuaia picnic, hiking leh adventure sports te khap a ni. He khapna thupek zawm lote chu the Mizoram (Containment & Prevention of the spread of COVID-19) Act, 2020 hmangin hrem an ni ang.
 
 
 
B. AIZAWL MUNICIPAL AREA LEH DISTRICT HEADQUARTERS DANGTE-A
HMAN TUR  
1. Mipui Vantlang Tana Inkhuahkhirhna Hriat Tur Te
1) Hemi inkhuahkhirhna hun chhung hian tumahin mahni in/ compound an chhuahsan tur a ni lova, building khata in hrang hrang luahte pawh intlawhpawh loh tur a ni. Amaherawhchu, ṭul bik thil vanga chhuah ngai – damdawi lei tur, nitin mamawh lei tur leh doctor hnena inentir turte chuan an awmna VLTF/LLTF te phalna an la hmasa tur a ni a, nitin mamawh lei turte hian mahni awmna veng VLTF/LLTF te ruahmanna zawm ngei tur a ni.
2) Hemi hun chhung hian lirthei veivah khap tlat a ni. Amaherawhchu, hei hian Clause A.5, B.2, B.4 (1, 2, 3& 11) leh B.5 hnuaia tarlante leh Clause B.1(1) leh B.3-a VLTF/LLTF ten phalna/hriatpuina an pek te chet velna lirthei a huam lovang.  
3) Pawn chhuak tur reng reng chuan (facemask leh hmanraw dang hmangin) hmai an tuam ngei tur a ni.
4) Vantlang hmuna kal te chu feet 6 tala inhlata awm tur a ni.
5) Phalna neia dawr hawnte chu tlai dar 4:00-ah khar vek tur a ni.
6) He inkhuahkhirhna thupek kalpui chungchangah hian LLTF/VLTF te chu an bial chhung ṭheuhvah an hmalaknate chhunzawm zel tura beisei leh ngen an ni.  
NOTE: District Magistrate ten zan curfew (7:00 PM to 4:00 AM) an puang ang a, CrPC Section 144 hmangin Order an chhuah ang.
2. He Inkhuahkhirhna Hian A Hnuaia Tarlante Hi A Huam Lovang
2.1. Places/vehicles (Hmun/lirthei) :
1) Hospital, nursing home, clinic, laboratory, OST centre, ART centre, blood bank leh damdawi dawr.
2) Veterinary hospital, dispensary, clinic, zoo leh hatchery.
3) Bank, non-banking financial institutions, insurance, ATM leh post office. Hengte hian mipute nena indawr tam lo tur leh hnathawh tul bik chauh kalpui turin ruahmanna an siam ang.
4) Petrol/Diesel filling station leh LPG storehouse.
5) Fair Price Shop/ ration dawr.
6) COVID-19 duty te hman taxi leh rental motor.
2.2. Services (Hna):
1) COVID-19 vaccination leh immunization programme dangte, ambulance service.
2) Animal disease control programme.
3) Postal service, blood donation camp/service.
4) Kohhran hna tul zual thawk tura Kohhran office kal leh kohhran hotute programme pawimawh bik.
5) Nau pai, nausen pawmlai leh naupang te hnena nutrition (chaw ṭha) sem.
6) Bawnghnute sem leh lakkhawm.
7) Power & electricity, water supply (mimal tui chawi te huamin), sanitation & solid waste management (hmunphiat leh bawlhhlawh paih te huamin), telecommunication, internet service, broadcasting leh cable service.
8) MGNREGS, MPLADS leh MLALADS hnuaia hnathawh.
9) Print & electronic media leh chanchinbu sem.
10) Bungraw load leh unload hna.
11) Private security service.
12) Medical emergency leh chhiat tawh thila awmna veng VLTF/LLTF te hriatpuina lehkha nena chhuah.
3. Phalna Neia Kalpui Theihte
3.1. A hnuai ami te hi LLTF/VLTF te hriatpuina leh SoP zawm chungin Inrinniah zing dar 10:00 atanga chawhnu dar 2:00 thleng hawn theih a ni ang a, heng ni leh darkar bakah hi chuan hawn phal a ni lo. Tin, dawr hawn hun chhung hian tum khata mi tam tak an punkhawm loh nan inchhawka dawr kal dan tur LLTF/VLTF ten an ruahman ang.  
1) Nitin mamawh leh eichawp dawr, thlai leh thei, sa leh sangha zawrhna.
2) Thlai chi, lei ṭha, ran chaw leh hmanraw dawr.
3) Essential courier service, e-commerce leh home delivery service.
4) Bungraw phur motor mamawh, oil leh spare parts zawrhna dawr leh loh theih loh thila hawn ngai hetiang motor siamna bik workshop/ puncture works.
5) Cold storage leh warehousing (bungraw chhek khawlna godown) service. Hei hian khawpui chhunga bungraw sem kual leh khaw danga bungraw thawn kualte a huam ang.
6) Hmasawnna hna peng hrang hrang thawhna atana bungraw mamawh - steel, cement, brick, balu, insakna bungrua ilo zawrhna dawr.
3.2. Dawr ni lo hnathawhna hmunte
Mi panga aia tam 1o thawhna mahni ina heng nei te - carpentry workshop, steel fabrication workshop, bakery, tailoring, weaving leh hetiang lam thilah te chuan VLTF/LLTF te hriatpuinain hna thawh phal a ni. Amaherawhchu, veng dang atanga hna thawktu lak luh phal a ni lo.
3.3. Bazar Leh Chawhmeh Zawrhna Chungchang
Hmun khata mipui pungkhawm tur vennan bazarpuia thlai leh thil dang zawrh chu khap a ni. Chutihrualin, mipui mimirin awlsam taka thlai leh chawhmeh an hmuh theih nan veng hrang hrangah leh hmun tam zawkah chawhmeh lei theihna tur LLTF/VLTF ten ruahmanna an siam ang.
Inrinni zing dar 5:00 aṭanga zing dar 10:00 thleng sa leh thlai zawrh theih a ni ang. A zawrhna hmun tur remchang chu LLTF/VLTF ten an ruahman ang a, mipui pungkhawm tam lo tur leh social distancing kalpui turin ruahmanna an siam ang.
4. Sawrkar Office
1) Secretary/ Head of Department/ Head of Office ten hna tul zual thawk turin mi tlem thei ang ber office kal tur an ruat ang a, detailment order an siam chu DM&R Department leh Deputy Commissioner te hnenah a copy an pe tur a ni. Tin, office kal turte chuan anmahni ruatna detailment order chu police/COVID-19 Executive Duty te enfiah turin an keng ngei ngei tur a ni bawk. Office-a kal tur ni lo leh COVID-19 Duty-a tel lote chuan anmahni in atangin office hna an thawk ang (work from home).
2) Sawrkar hnathawk leh sawrkar sum aṭanga hlawh la te chu COVID-19 duty turin a ṭulna apiangah hman an ni ang. Hetianga duty tura ruat te hi an duty-na hmun turah zing dar 9:30 hmain an thleng tur a ni.
3) Deputy Commissioner ten COVID-19 duty-a an ruat loh te chuan LLTF/VLTF  te a ṭul apiangah an tawiawm ang.
4) Head of Office ten khauh takin “COVID-19 Appropriate Behaviour” an kalpui tur a ni.  
5) Office chhungah phalna la hmasa lovin pawnlam mi kal phal a ni lo. Hemi atan hian phone-in emaw an hmuh duh te phalna an la phawt tur a ni.
6) Head of Department leh Head of Office ten an office kawtkaiah kut silna tur emaw hand sanitizer emaw an ruahman ang.
7) Head of Office tin te chu office vawn fai leh tih thianghlim kawngah mawhphurtu an ni ang a, office-ah kut silna hmanrua
(tui, sahbawn/handwash) an buatsaih ngei ngei tur a ni.
8) Ṭul bik ah lo chuan meeting neih loh tur a ni. Inrawn leh inbiak a ṭul anih pawhin a theih chin chinah intercom, landline telephone leh mobile emaw IT application (WhatsApp, E-mail, etc) hman ṭangkai hram tur a ni.
9) Department emaw office dangte nena indawr tulna thilah chuan email emaw electronic media dang hman hram tum tur a ni.
10) Mipuiin Sorkar Department te ral khat aṭanga an dawr theihna-ah Department tinin Information Technology an hmang ṭangkai tur a ni.  
11) Central Govt. office leh organization te pawhin “COVID-19 Appropriate Behaviour” an zawm ngei tur a ni.  
5. Hmasawnna Hna Thawh Chungchang
1) Hnathawh hrang hrang - retaining wall/ drain/ kawng siam, building sak/ repair/thiah, kawng laih, lei dawh te leh chutiang kawnga hmalakna – fur hmaa thawh zawh ngei ngai leh chhiatna thleng thei ven nana thawh hmanhmawh ngaite chu VLTF/LLTF te hriatpuinain thawh chhunzawm phal a ni. Heng hna te hi ram chhunga awm sa labour te chauh ruai a thawh tur a ni.
2) Lo neitu leh huan neitute, ran vulhtute, sangha dil neitu te leh athawktute chu phalna hranpa lak ngai lovin an hna thawh phalsak an ni a, lo/huana hna thawk tura ram riah pawh phal a ni. Hmun khata mi 5 (panga) aia tam awmkhawm erawh chu khap a ni. Lo/huana kal/feh turte chuan zing dar 9:30 hmain khaw chhung (city/town area) an chhuahsan hman tur a ni a; tin, police/ COVID-19 Executive Duty-te check theih turin VLTF/LLTF te phalna lehkha emaw an kalna tur lo/huan an nei ngei a ni tih lantirna document (LSC, periodic patta,adt.) an keng ngei tur a ni.
3) Quarry-a lung lak, block/ brick siam, rawra her leh chhut leh thingzai khawl (saw-mill) a thing zai theih a ni ang.
4) A chung [B.5 (1-3)]-a hna thawk tur te hi an hnathawhna hmunah zing dar 9:30 hmain an thleng tur a ni. Khawpui chhungah zing dar 9:30 leh tlai dar 4:00 inkarah an veivah phal a ni lo  
5) A chung amite [B.5 (1-3)] hi AMC Area leh District Headquarters pawn lamah te chuan khuahkhirhna awm lova phal sa a ni. Chuvangin, eizawnna atana hna thawh leh hmasawnna hna thawhna kawng hrang hrangah inkhuahkhirhna a awm lovang.
 
C. HREMNA DAN
He thupek zawm lo chu Disaster Management Act, 2001, Section 51 aṭanga 60, the Mizoram (Containment & Prevention of the spread of COVID-19) Act, 2020 leh IPC Section 188 hmangin hrem theih an ni.
Sawrkarin heng thuchhuah a siam te hi a ṭul dan azirin a ennawnin a tidanglam thei ang.

Post a Comment

0 Comments