KOHHRAN - PATHIAN KHAWPUI

- K Remruatfela

Sap Theologian ropui Cyprian-a chuan, “Kohhran pâwnah chhandamna a awm lo” tiin nasa takin kohhran thlavâng a lo hauh a. Mi tam tak chuan a uar lutukin a ti lutuk ve deuh mah mah a ni e kan ti pawh a ni mai thei. A sawitu pa ngei pawh hian thinlung leh rilru ngaihtuahna chhungril ber atang chuan a pawm bik chiah kher lo ang. Amaherawhchu, he a thu phuhchhuah kam hnih-khat tê hian kohhran pawimawhna nasa takin a tarlang a. Kohhran mite nunah nasa takin thu a sawi a ni.

BCM Bualte biak In, Designed by T Lalhlimpuia
Video Link: https://www.youtube.com/watch?v=gniMjucivh0

Fak hla phuahtuin, “Kan Kohhran ho lungphum chu a Lal Krista Isua” a lo tih angin kohhran hi Krista thisena din, Thlaurau Thianghlim hriak hnawih a ni a. Tin, Kohhranho tih tawngkam hrim hrim hi zirmiten an sawi dan chuan a tir lamah chuan thlan anga kal khawm (eddah) a kâwk a. A kohva koh khawm a kâwk leh a. Mahni duh thua kal khawm mai a kâwk lo an ti. Chutiang chuan kohhran tih hian Krista sipai ni tura koh khawm a kawk deuh ber. Kohhran hi heti khawpa pawimawh a nih avang hian mitinin an zahin an thlarau riltam inhnangfâknan mi tam takin an hmang a. Sap hla phuahtu J.R. Clements phei chuan, _“Krista Kohhran tan kan ding, Rilrua inzawmin; Kan aw, Amah fak nan, Kan kut, chak lo puih nan; Vak bote zawng zelin, Krista Kohhran tan”_ tiin kohhran hla ropui tak a lo phuhchhuak hial a.
Chuti taka pawimawh a nih vang chuan ringtute hian kohhran hi kan humhalh a, kan venhim hi a tul tak meuh meuh a. Kohhran chhungah duhtuina kan lekkawhin, urhsunna kan ngaih pawimawh pawh a tul hle. Kum 2007-2009 Synod Higher Secondary School-a ka luh lai, Mission Vengthlang Kohhrana ka lawi laia an kohhran Upa Lalengzaua thusawi ka la hriat reng chu – “Lalpan, hmana tha a tih kha tunah pawh tha a la ti reng a. Hmana thalo a tih pawh kha a ngai tein tunah pawh thalo a la ti reng a ni” tih thu hi a ni a. Kan thinlungah thu a sawi thui khawp mai. Khawvela Theologian ropui ber bawla ngaih William Booth`an “Ni hnuhnungah chuan, simna tel lova piantharna te a lo la chhuak ang a” a tih ang deuh khan kan tunlai khawvel han thlir hian sual pawisaklohna leh ngaihzamna a lian sawt hlein a hriat a. Kohhran pawhin hmanlaia a duhtuina ang thin kha a hlamchhiah tial tial tanin, a huau huau, a hup hup lamah rilru kan seng tan ta mah mah em aw a tih theih rum rum a, a pawi em em a ni.
Kan tunlai khawvela Zoram Kristianten kan mamawh ber ni-a ka hriat chu Martin Luther anga kohhran siamthat duhna rilru huaisen pu mi; Rev.Thansiama, Rev.Saiaithanga, Rev.Thangpuiliana, Revd Chuauthuama etc. te anga huaisen taka kohhran humhalh duh mite hi an ni. Anni hnungzuitu tur, khawvel changkânnain kohhran a rawn nek châng pawha huaisen taka kohhran thlavâng hauh ngamtu tur, Krista lungpui ngheta dingngam tur, mi tak leh mi fir hi kohhran hian a mamawh tak zet zet a ni. Tuna huaisen taka ka sawi lawk ngam chu khawi kohhran pawh hian takna aia hlimna, nghehna aia phurna, duhtuina aia palzamna, worship aia fellowship a dahsan hun hunah chuan kohhran hi a dahlau tial tial ang a, khawvel changkânnain zawi zawiin a ei da hret hret ang a, kan nun a liberal tial tial bawk ang a, thimah kan inhnuk lut tial tial ang tih hi! Amaherawhchu, chutiang hun êm chu kan Pathian hian min thlentir hi ka ring phal mawlh lo!

Post a Comment

0 Comments