Hnahthial DLTF leh VLTF Thukhawm; kan dinhmun tha kan tih rualin zan khat thil thua inchhui ngai awm thluah thei tho kan nih avangin kan fimkhur a ngai hle a ni - Hnahthial Bawrhsap

Aizawl | May 10, 2021: Hnahthial District chhunga Covid-19 dona kawnga hmalatu District Level Task Force leh Village Level task Force te chu vawiin khan an Chairman leh District bawrhsap ni bawk Pu H.Dolianbuaia kaihhruaiina a Office Conference Hall-ah an thukawm a, an hmalak tawhna thlir kirin hmalak zel dan tur an ruahman.

Meeting kaihruaitu District Bawrhsap chuan tun dinhmunah Hnahthial District-ah Covid-19 hri kai enkawl an awm loh thu sawiin "kan dinhmun tha kan tih rualin zan khat thil thua inchhui ngai awm thluah thei tho kan nih avangin kan fimkhur a ngai hle a ni" tiin khauh leh fimkhur takin ruahmanna kan siamte hi mahni hmazawnah theuh i kalpui ang u" a ti a. VLTF te inpekna leh thawhrimna te fakawm a tih thu sawiin Ni 7 chhung Total Lockdown kalpui mekah chhuanchham leh harsa zual an awm leh awmloh te mahni huamchhung theuhah ngaihven reng turin a chah bawk a ni.

Meeting-ah hian lirthei-ah 'On Covid-19 duty' tih in tara duty paltlang tum mai thin an awm thu leh ngaimawh awm an tih thu tarlan niin heng lirthei te hi endik nise an ti a. Covid-19 hluarna zual District atanga Hnahthial district-a hawngte chu Ni 10 chhung Quarantine nise, mahni In a inkhunghranna neilo leh chhungkuaa khung hran duh si lo te chu DLTF hriattirin Govt Quarantine Centre-ah dah nise an ti bawk. Hnahthial hmar lam leh chhim lam kawtchhuahah duty point siamin District dang atanga Hnahthial khawpui chhunga Bungraw rawn phurhluh turte chu Zan dar 8 leh zing dar 4:00 inkarah chauh luh tir thin nise, hemi hun chhung hian VLTF ruahmanna hnuaiah Unload vek nise an ti a. Hnahthial District atanga District danga kal turte pawh damlohna leh chhiat tawh thilah loh chuan phal loh nise an ti. Damdawi Ina inentir turte pawh VLTF phalna lehkha an la ngei tur a ni a, an inentir zawhah Doctor Seal chuangin VLTF ah thehluh leh thin nise an tih bakah meeting chuan Ni 17.5.2021 ral hma loh chu Hnahthial khawpui chhungah eng hnathawh mah phal lovin lohtheihloh thila Pisa kai ngaite pawh Head of Office ten kai tur bik ruahmanna an siam ang a, chu chu District Bawrhsap Office ah thehluh nise an ti bawk a ni.

Report atanga a lan danin tun dinhmunah Hnahthial District-ah Covid-19 hri kai awm lo mahse Quarantine mi 30 an awm mek a, heng zinga mi 23 chu Home Quarantine niin mi 7 chu Govt Quarantine Centre-a awm an ni. District Hospital Hnahthial-ah Oxygen cylinder 19 leh Oxygen Concentrator 6 a awm mek bawk a ni.

- DIPR