CM relief kaltlangin Khawzawl district-a chhungkaw 693 tanpui; Dy CM-in a bial chhunga task force 24 te tanpuina pe

Aizawl | May 21, 2021: Vawiin khan Chief Minister’s Relief Fund atanga sum dawn hmangin Khawzawl District chhunga Total Lockdown vanga hna thawk thei lo, chhuanchham dinhmuna ding mai thei chhungkaw 693 te hnenah buhfai leh dal sem a ni a. Deputy Chief Minister Pu Tawnluia, MLA, 22-Tuichang Assembly Constituency in a bial chhunga Village Level Task Force 24 (sawmhnih leh pali) te tana tanpuina pawisafai Rs 2,30,000/- (Cheng nuai hnih leh singthum) a pek chu sem nghal a ni bawk.




A mamawhte hnena buhfai leh dal semna hi Pu Zothanmawia, Deputy Commissioner chuan a kaihruai a. Covid-19 hrileng laka himna tura sawrkar SOP duante zawm chungin DC office staff leh District chhunga veng/khaw hrang hranga VLTF ten tangrualin an sem chhuak a ni.
Vawiina buhfai leh dal semna-ah hian buhfai quintal 56 vel leh dal kg 700 vel semchhuah a ni a. Hengte hi DC office-ah phurhkhawm niin, pik up pathum leh LPK pakhat hmangin Khawzawl District chhunga khaw hrang hrangahte sem kual a ni. Tanpuina dawngtute hi Khawzawlah chhungkaw 290 leh khaw dang sawmhnih pahnihah chhungkaw 403 an ni a, tanpuina dawng mihring zat hi 2716 a ni.
Tuichang Assembly Constituency huamchhunga VLTF te hnena tanpuina pawisafai petu Pu Tawnluia, Deputy CM chu khawtlang hruaitu leh mipuite tan a inhawng reng a, hrileng kara mipuite tana thawkchhuak thin VLTF te chuan mamawh an neih phawt chuan tanpui turin engtiklai pawhin a inpeih tih a tarlang. Deputy CM hian kar hmasa Zirtawpni khan Tuichang AC huamchhunga chhungkaw 489 hnenah a thlawnin buhfai a pe tawh bawk a ni.

- DIPR

Post a Comment

0 Comments