Mizo Hmeichhe Boxer Lalbuatsaihi




World Police & Fire Games ‘19 a Gold medal leh Asian Boxing Championship 2021 a Womens Light Welter (60-64kg) a silver medal hnekchhuaktu Mizo Hmeichhe Boxer Lalbuatsaihi kan belchiang.


K Siamthanga leh Lalbiaksiami te fanu Lalbuatsaihi hi 'Bs' tia koh thin niin, a pianni chu October 2 a ni.

Bs-i te hi unau pathum niin, a upa ber a ni a, nau mipa pakhat leh hmeichhia pakhat a nei.

Bs-i te hi Aizawl, Tuithiang veng-a cheng leh khawsa an ni a. Mahse, tunah hian Tete Boxing Academy ah Traning turin a awm a, Hostel emaw in hranga awm a ngaih avangin Bethlehem veng thlang ah inluah in a awm.
Kohhran lamah chuan 7th Day Adventist church(Central church)-ah an lawi thung.

Bs-i hi a sulhnu lar zual, India aiawha a chhuahna:
• World Police & Fire Games ‘19 Chengdu, China-a neih-ah khan Kg 64 ah a khingpui hnehin Gold Medal a la.
• Asian Boxing Championship 2021, Dubai ah 64Kg ah tho Silver medal a la


• I duhzawng:
@ Lehkhabu duh: Bible bak ka chhiar lem lo 
@ Chawhmeh: sa 😂
@ Rawng: Black and white

• Mize ngainat zawng:
- mi tawng zawt zawt lo, awmna hmun mila insiamrem thei zel leh midang hrethiam tak.

• Kawppui tura duhzawng?
- Sport a min support tlat tu tur leh Min hrethiam em em tu ni deuh tawp

• Relationship status: Single

• Hobby: Sport hrim hrim hi nuam ka ti vek a, Hla ngaihthlak leh thian kawm a nuih vak vak hi nuam ka ti bawk. 

• Aim in life: Olympic medalist! 


• Hna thawh mek leh thawh ṭan dan/kum:
- Central police (SSB ) ah ka thawk mek a..2017 January ni 4 khan ka joined, Boxing atanga lut ka ni

• Boxing luhchilh ṭan dan leh kum:
- Boxing hi Kum 2005 khan school ka kalna thin Saron Veng Middle School Headmaster sir S Rochama khan sport ka theih thin em avangin Boxing khel turin min sawm a, Coach Lalchhanhima armed veng south hnen atang ka zir chho tan a, chu chu ka luhchilh tan dan a ni.

• Boxing competition i telna hmasa ber leh i thlen chin:
- 2005 khan Boxing zir turin ka kal a, "competition a awm dawn a i tel ve ngam em?" an tia, "ngam e," ka tia ka zir hma chuan ka khel nghal tawp a. Vanneih thlak takin silver medal ka la nghal 😂.

• Boxing a i sulhnu:
- Sulhnu ang zawnga sawi dawn chuan a kual thui dawn a, ka khelh tirh atanga medal ka lak tawh hrim hrim hi chu 50 chuang a ni tawh ang. 


• Training centre i luh tawhna te:
- 2005 to 2006 Kum kha SaRon Boxing Club-ah coach Lalchhanhima hnuai-ah ka traning a, 2007 to 2010 SAI ah lut in Coach Vulthavunga hnenah ka traning leh a, 2009 atang India camp ah ka awm tan a, India camp ka awm chhung in Mizo coach C Vanlalchhuanga te pawh awm ve in anni hnuai-ah hian 2017 thleng kan traning. 2017 atang hian Sete Boxing Academy ah traning-in tun thleng hian India camp ka awm loh Lai chuan Sete Boxing Academy-ah hian ka la traning a ni.

• Sete Boxing Academy leh Nangmah:
- Sete Boxing Academy hi Mizo boxer-te tan hian a tangkaiin a awm lo ang tih hlauhawm khawp mai. SAI tih loh ah chuan tunah hian Mizoram ah Boxing Regular Traning kan neih theih na awm chhun a nih bakah coach Sete leh Andrew hian Boxer te min tuipuiin an hun leh theihna zawng zawng min pe thin a, Kei pawh hma ka sawn phah hle bawk. Kei chauh lo pawh International player hrang hrang te pawhin traning nan ber kan hman mek a ni.


• Police games kha:
- August 8 -18, 2019 khan Chengdu, China -ah kan nei a, Pathian zarah vanneih thlak takin Gold medal ka rawn hawn ve thei hram a ni.
2019 a medal a lak tawh chungchang news kimchang HETAH hian dah a ni.

2019: Lalfakmawii 81+ Kg - Silver, Vanlalduati Kg 51- Gold Medal, Lalbuatsaihi 64Kg- Gold Medal, 

• Asian boxing atana i inbuatsaihna leh inbuatsaih dan:
- Kumin January thla tir atang khan Bellary-a India camp ah traning kan nei tan a. Fenruary 15 khan Delhi lam ah kan lo insawn a, Mahse, COVID-19 avangin April thla khan Camp an ti tawp a. COVID-19 avang hian khawi hmun pawh an lockdown avang hian traning hleitheih a ni tawh lova, mahni in ah a theih ang angin kan inbuatsaih ta a ni.

• I coach duh ber:
- Duh ber ti a han sawi tur ka nei lo, a chhan chu an tha hlawm em a an vai hian ka duh vek. Coach Lalchhanhima, Vulthavunga, Chhuanga, Sete, Faka Lunglei, Ngaihawma, Lalbiaksangi, B Lalhriatpuii(AB) bakah ndia camp a kan coach te pawh ka tan chuan coach tha ber ber vek an ni.

• Boxer duh (Mizo leh hnam dangah):
- Mizo ah chuan Jenny R lalremliani hi a khelh lai khan thiam ka ti a, ka entawn ber pawh a ni. Mc Mary Kom hi ka duhin thiam ka ti a, a entawn tlak em em bawk.

• Hmachhawp:
- Olympic Medalist ni ngei tura theihtawpa beih.

• Sawrkarin infiammite a enkawl dan hi:
- Mizoram sawrkar pawh a  hma ai chuan hma a sawn viauin ka hria. Infiammite'n harsatna hrang hrang paltlang chunga theithtawpa kan tih ve hram hramna hi min hriatpui leh zual se, kan harsatna leh kan mamawh te hei ai nasa zawk a phuhruk dan awm zel se duhhthusam a ni.


 A tel lova i awm theih loh:
- Pathian leh tawngtaina tel lo chuan engmah ka ni thei lo!

• I nun kaihruaitu:
- Tawngtaina

• Hringnuna i hlauh ber:
- Midang pawisawi

• Hlawhtlinna tura pawimawh:
- Mahni in thu nun theih leh tih hram hram


Post a Comment

0 Comments