Zokhawthar-ah truck chesual; Driver a boral

Aizawl | April 25, 2021: Vawiin Pathianni, April 25, 2021 chhun dar 1.30pm vel khan Ashok Leyland Truck, MZ01T 4244 (Owner Pu Mawia Bawngkawn Brigade) chu Zokhawthar khaw chhung, Highway laih zawh hlim, (Medical Mercy  Clinics kiangah) tlan liamin a khalhtu Driver Zira Kolasib, College Veng chu a hmunah a boral nghal.




Accident thu hriat a nih veleh a hmunah YMA hruaitute leh tlangvalte tlankhawm nghalin, Truck in driver a delh beh chu lak chhuah tum a ni  a. A hmun a awihin a delh nghet si a. Km 1 laia hlaa awm Highway hnathawktute JCB koin Motor hi khai kangin ruang hi lak chhuah a ni. He motor ah hian driver ve tho, Lalventluanga, Pu Lalluahpuia fapa, Khawrihnim, tuna Aizawl Salem venga cheng inti chu chuang vein hliam na lutuk a tuar lo.

A chuanpui driver aṭanga hriat leh, kawngsira lo hmutute sawi danin, he Motor, Zokhawthar chuan hnuai lam aṭanga rawn tlan chho hi a rawn vung hle a, kawng kawiah hian kual zo ta lovin a tlan liam ta niin a lang.
Motor hi a lum thui lo va. A inpaih herna lamah a hnung lam chu feet 20 vela a hnuaia feh kawngah innghatin, motor lu lam hian a tlakna kawngpui lam a hawi thung.
Zokhawthar Police ten engkim buaipuizuiin, ṭul ang angte an tihfel hnuah Champhai Dist. Hospital ah PME tura thawn chhoh nghal a ni ang. Zokhawthar YMA in a ruang phurhna Kuang an tumsak bawk.

Post a Comment

0 Comments