Lunglei ram kang thelh nan IAF thlawhna-in Tlabung tuipui chawi tum

Tlabung | April 25, 2021: Lunglei khawpuia kângmei ṭhelhna atana hman turin, Indian Air Force thlawhna Mi-17V5 helicopter pahnih hman phalsak niin, Khawthlangtuipuia tui an châwi dawn.



Lunglei bawrhsap Pu Kulothungon chuan Tlabung Post zawhna chhangin, Khawthlangtuipuia tui châwi turin ruahmanna an siam thu leh, chipchiar tak erawha sawi theih a la nih loh thu a sawi.

Thlalak hi a ang thei tur internet ami dah chhin mai mai a ni e.

Lunglei Additional Deputy Commissioner Pu M Misael-a'n Tlabung Post a hrilh danin, hemi atana thil ṭulte bawhzui mek niin, a ram leilung leh hlimthla pawh lâk fel a ni tawh a; nimahsela, IAF chopper-in tui a châwi hmain tihfel ngai tam tak a la awm niin a sawi. 

Ruahman dan chuan IAF helicopter hian helipad-a ṭum loin Licheng kài a pan nghal ang a; tuipui chungah dingin a tui phurh tur a siak chhoh hnu-ah Lunglei lam a lan lehnghal ang.

IAF helicopter hian hmun remchang a mamawh avangin, Geographic Coordinate System hmangin a ram hlimthlá lâk fel a ni tawh a; tui an châwi dawn a nih pawhin Licheng chu hmun remcháng ber tura ngaih a nih thu, Lunglei Additional DC Pu Misael chuan Tlabung Post a hrilh.

Tui châwi tura Tlabung pan tur IAF chopper hian eng tikah nge Tlabung a pan dawn sawi chian theih a nih loh thu, Lunglei DC-a officer pakhat chuan Tlabung Post a hrilh a; Silchar aṭanga rawn chhuak tur an nih thu leh, tun dinhmunah an la rawn chhuah loh thu a sawi.

- TLABUNG POST

Post a Comment

1 Comments

He post chungchanga i ngaihdan lo sawi ve rawh: