Zofa Lelte 2021 atan Vanchengpui nula Vanpangpari

Aizawl | April 14, 2021: Zoram Thar Zofate Lairelna buatsaih online hmanga inzaisiak result chu Thawhtan zan dar 8 ah LPS STUDIO ah live a puangin lawmman pawh sem nghal a ni a, Zofa Lelte 2021 atan Vanchengpui nula Vanpangpari thlan a ni.

He inzaisiak Zofa Lelte 2021 thupui chu Inpumkhatna tih a ni. Pu HK Hlimpawlthanga hlaphuah "Unau Inngeih" tih hla Zo hnahthlak tawng chi hrang hrang 9 hmang in online hmangin an inzaisiak a. Zofa Lelte 2021  lawmman dawngtute chu : 

1. Nl. Vanpangpari - Vanchengpui

2. Nl. C. Nempuii - North Khawlek

3. Nl. Esly Ramdinmawii te an ni - Haflong, Dima Hasao

Lawmman pakhatna hian  pawisa fai Rs 10000/- leh Memento mawihnai tak, Zoram Thar T-shirt bakah a thlawna video leh audio siam sak tur a ni. Pawisa fai lawmman hi Dr. B. Vanlalsiamin a tum sak a, Video recoding hi O Siama Picture, Audio recoding hi Tusing Recording ten an tih sak dawn a ni.

Lawmman pahnihna hian Pawisa fai Rs 7000/- bakah Memento mawihnai tak leh Zoram Thar T-shirt a dawng a, Lawmman hi Pu K. Lalliansanga Chaltlang Lily Vengin a tum sak. Lawmman pathumna hian pawisa fai Rs, 5000/- memento mawihnai tak leh Zoram Thar T-shirt a dawng telve bawk. Lawmman tur hi Pu Lalremsiama Ralte Chawnpui, Aizawlin a tum sak. Zofa Lelte 2021 lawmman dawngtute memento hi Tv. Lalawmpuia Ralte, Zemabawk, Aizawl in a tum sak.

Endiktute hi Upa Lalruotṭhieng, Upa Kaitinthang Puruolte, Pu Joseph Zaihmingthanga, Tv. R. Lalhmingmawia leh Pu Zoramsanga Tusing te an ni. 

Inzaisiak a tawp thleng Ṭhazual (Finalist) 10 te pawhin Memento leh Zoram Thar T-shirt an dawng vek bawk a, heng lawmman an dawnte hi Pu Lalfakawma Ralte Chaltlang Lily Veng in a rawn tum sak. 

Zofa Lelte result puan leh lawmman sem program hi live in LPS channel 1 leh YouTube- HK. Official Channel ah pek chhuah a ni. Nl. Lalruatfeli Hlawndo  in hneh takin a kaihruai a, zaithiam Joseph Zaihmingthanga leh RC Hunropui Sanate te an zai. Rev. Dr. Zaichhawna Hlawndo Zoram Thar Zofate Lairelna hruaitu in Zofa Lelte buatsaih dan leh Inpumkhatna thuchah pawimawh tak a sawi. Thlahtu bul chhui a pawimawhzia sawiin, Zo/Dzo thlah kan nih avanga Zo hnahthlak inti thin kan ni. Thlahtu bul thuhmun, hnam khat kan nih angin kan hnam hming leh national identity hi ‘Zo’ fate vek kan nih avangin Zofate a ni a ti. Zofa Lelte 2021 hi engmah neih lawk awm lovin Pathian rinchhanin Zoram Thar Zofate Lairelna chuan a buatsaih a. Pathian hnathawh ROPUI tak an dawn avangin lawmawm an ti hle.