SERCHHIP POLITICS TITI - IV

- K.Remruatfela

Part I - III lamah Serchhip politics thli tleh chhoh dan leh chumi thli tleh kâra party hrang hrangte dinhmun rawn phochhuah a ni tawh a. Amaherawhchu, tun tumah chuan a hawizâwng lam thlâk hretin Serchhip history leh District Council atanga MLA election hnuhnung bera Serchhip biala party dinhmun chi hrang hrang kan rawn chhawpchhuak thung zâwk dâwn a ni.

Serchhip khua hi hriat theih hla berah kum 1774 vela lo in din tawh ni mah se, rauhsan leh thuai thin a ni a. Mei mit lova Serchhip awp hmasa bertu chu Bengkhuaia fapa, Lalhrima a ni (1903).  Chumi atang chuan Serchhip hi Rolura thlah chhâwng zêl ten an awp chho ta zêl a. Lal kan neihte hi upa zawkte sawi danin Sailo lalna pe na tak an nih hlawm avangin Lal vuavâng leh Hnamchawm inkârah khi a awm nasa hle thin a ni âwm a. Kum 1954-a lal bân a nih a, District Council kan lo neih tâk hnuah pawh khan he lal vuavang leh hnamchawm inkâra khi awm hian politics boruak thlengin nghawng thui tak a nei chho zel tih pawh a lang chiang em em a ni.

Chumi boruak kal zêlah chuan hnamchawmte tâna zalenna meichher chhi êngtu, Mizo Union Party din a lo nih khan Serchhip khua hi Mizo Union party bitna hmunpui a ni nghal thuai a. District Council hun chhûng zawng khân hneh takin Mizo Union party te chuan min awp chho ta zel a ni. Lal vuavang pawl deuh nia ngaih, Zalen Pâwl (UMFO) te pawh kha din han ni ve thin mah se uksâk a hlawh tehchiam ngai lova, Mizo Union hmunpui a nih miau avangin MNF movement pawh khan he Serchhip hmunah hi chuan chuti teh hu in nghawng a nei tehchiam lo!

Serchhip biala  politics thli lo tleh tawh dan kan hriatchian lehzual theih nan District Council - Union Territory - State Inthlan lo awm tawha party tinte seat lo lâk tawh dan kan han tarlang ang e:

1. Hrangaia - Mizo Union Party (1952 - 57 District Council)

2. Hrangaia - Mizo Union Party (1957 - 1962 District Council)

3. Hrangaia - Mizo Union Party (1962 - 1970)

4. Hrangaia - Mizo Union Party (1970 - 1972)

5. Vaivenga - Mizo Union Party (1972 - 1977 UT)

6. Thanmawii - PC Party (1978 - 1979 UT)

7. Bualhranga - PC Party (1979 - 1984 UT)

8. Lal Thanhawla - Congress party (1984 - 1987)

9. Lal Thanhawla - Congress Party (1987 - 1989)

10. Lal Thanhawla - Congress Party (1989 - 1993)

11. Lal Thanhawla - Congress Party (1993 - 1998)

12. Er. K. Thangzuala - MNF Party (1998 - 2003)

13. Lal Thanhawla - Congress Party (2003 - 2008)

14. Lal Thanhawla - Congress Party (2008 - 2013)

15. Lal Thanhawla - Congress Party (2013 - 2018)

16. Lalduhoma - Independent/ZPM (2018 - 2020)

17. 2021 - ???

*Note:* _Kum 1974-a Mizo Union Party leh Congress Party te suihfin an nih avangin Mizo Union tih leh Congress tih hi thuhmun anga ngaih tur a ni tawh ang._

A chunga Inthlan lo awm tawha party tin seat lo lak tawh dan kan hmuh atang khian Serchhip biala party dinhmun chu a hriatthiam theih nghal ruak mai âwm e. Kum 1974-a Mizo Union Party leh Congress party suihfin a nih hnu pawh khan he Serchhip bial hi Congress hmunpui a ni zawm ta zel a, a hnu inthlan neuh neuhah party dang lo kân ve zawk hun awm thin mah se, a tawpah chuan Congress party tho hi an tho chhuak leh thin a. Congress an tlin loh leh zeuh thin chhan pawh hi a bul berah chuan party dang lo len phut vâng ai mahin party chhungah ngêt a lo awm thin vâng a ni châwk! 

He Serchhip biala party tin te seat lo lâk tawh dan hi han enchiang leh lawk ila:

1. Mizo Union Party - Term 5 (25 yrs)

2. PC Party - Term 2 (6 yrs)

3. Congress Party -  Term 7 (29 yrs)

4. MNF Party - Term 1 (5 yrs)

5. ZPM - Term chanve (2 yrs)

*Note:* _Kum 1974 hnuah Mizo Union leh Congress Party hi thuhmun an nih tawh avangin Congress Party seat lak apiang hi Mizo Union Party seat lak ang pawhin a ngaih theih tho ang._

A chunga party tinte seat lâk tawh dan en khian he Serchhip bial hi Mizo Union - Congress Party bial him thin a ni tih a chiang em em a. PC leh MNF Party an lo lan ve zawk chhan pawh kha Sawrkarna chang tura seat an lâk huk lai a ni ve ve a. Chutihlaia Opposition tho, Independent Candidate Pu Lalduhoma, ZPM support-a thlan tlin a han ni nulh mai kha chu thil mak a tling a ni. He thil mak hi tun Inthlan lo awm turah hian a rawn inlâr chhunzawm leh dawn em tih hi rin thiam a har hle a. Serchhip fachuam pathum leh Ruling party te nena inhruipawhna tur a nih dâwn tlat avangin Serchhip politics khelmual hi a ngaihnawm chho dawn tak zet a ni. PC Party aiawh Pu Ruata lah a awm mai mai dâwn si lova...