RUALBANLO COVID-19 POSITIVE HMUHCHHUAH A NI

Sihphir Venghlun


April 27, 2021: Keini khua pawh nikum lam daih aṭang tawh khan he hripui ninawm tak hian min luh chilh ve a, theih tawpa kan ṭawngṭaina avang te, task force thawh rimna avang te leh mipui thu awihna te azarah kan dang chat thei a. Positive kan neihte pawh rei lo teah dam takin kan khuaa an chenna hmun ngeiah an lo hawng a, khawtlang mipuite'n kut bengin kan lo lawm nghe nghe a nih kha. Kan ṭawngṭaina Lalpa'n min ngaihthlaksak a, min chhâng tih loh rual a ni lo.

Tichuan, muangleia kan awm tawh hnuah kan mamawh leh ṭûl apiangte kan thawh leh mawlh mawlh tawh laiin, Ni 26. 04. 2021 a lo her chhuah leh meuh chuan, kan khua chuan chanchin duhawm loh tak kan nei leh ta. Nu pakhat chu insawiselna a neih deuh avanga RAgt tihtir chu Covid-19 a lo positive hlauh mai. Kan khua min va sawi nghing chiang tak em. Chu mai a la ni lo, a kaihhnawih kal zelah vohbik pakhat chu RAgt tihtir ve niin, a positive ve leh ta tlat mai.

Khawtlang mipuite, kan zavai maiin keimahni leh keimahni thinlungah zawhna chhan sen loh a lo lut a. "Engtin nge a inenkawl anga, engtin nge a awm ang," tiin rilruin ar bo a zawng ruai a. Damdawi ṭha ei nachang pawh a hre lo ang a, eng nge covid hnathawh pawh hre lo khan a dinhmun kha a hre thiam dawn si lo. Khawtlangin kan lainat a, "Tuin nge CCC (BSUP)-ah chuan awmpui ta ang," tiin mi zawng zawng kan inzawt a ni deuh ber mai. Thin a rim a, he natna hi hmuh theih leh khawih theih ni ngat sela chuan, khawtlangin kan chil khawp ang! Mipui kan ngui nghiai a, chutah kan positive (vohbik) erawh a la hlim hle thung si.

Amah (vohbik) positive hi ni tinin thingpui dawr pakhatah ṭhuin, chu dawr neitu chuan chhûn a lo thlen apiangin miten man chawia an ei ṭhin chu a thlawnin a pe ni tin ṭhin a. Mi bengvar deuh ṭhenkhat chuan a ei mante hi an tumsak châng pawh a awm bawk. He vohbik hi chhungte nei lo a ni lo a, amah a sual hran lo a, khawtlang pawhin kan ngainat leh kan fiam fo hi a ni ve a. An inah tak chuan a haw ve zeuh zeuh ṭhin. Chhungkaw pakhat hian an awmpui chawt a, zing leh tlaiah chaw te eiin a riak ve mai ṭhin a. Chhûn lamah thingpui dawrah chuan a hun pum a hmang ṭhin. Hei hi sawi lang leh hrâm i la, "Heti ang vohbik dawra i awmtir reng te chuan dawrtu (customer) ṭhenkhat te an lo chawl duhloh phah ang e," an tih pawhin, dawr neitunu chuan, "Heta awm hi nuam a ti ve a, malsawmna ka dawnna pakhat niin ka hria," a tih ve tlat avangin dawr neitunu hian ten hauh loin an inhrawn ni tin ta ṭhin a ni.

Chuti anga ni tina thingpui dawra awm ṭhin ta chu a awmna dawr neitunu test a ni ve ta...  positive ve ta tlat mai! A va lawmawm tak em....🥲 Amah chu a lawm lo viau ang. Mahse, "Tu nge kha vohbik kha buaipuiin enkawl ta ang," tih zawhna chu chhânin a awm ta thung si. He dawr neitunu hian a enkawl ang a, a bul aṭanga a tawp thlengin a ṭulpui ngam dawn tih hi khawtlang mipuite thinlungah ring takin a ri a, kan thawpikna chu chhem bo ang duak a lo ni leh ta a.

Ka sawi tawh ang khan he vohbik hi a nawrh a kal tluan chuan enkawl harsa ve tak a ni a. A nu leh a chhungte ai mahin he dawr neitunu hian a enkawl thei ber a; tichuan, zan khat BSUP Durtlang lamah an han riak a, kan vohbik pawhin damdawite eiin doctor ten damdawi leh taksa tana ṭha tur an pek ang zawng zawng chu dawr neitunu kut aṭang ngeiin thuawih takin a eiin a in ta a ni. Dam takin an lo chhuak leh thuai ang tih kan ring a, he nula erawh hi chuan hriat reng a hlawh kumkhua tawh ang. 

He vohbik enkawl tura Lalin rem a lo ruat tawh chu tu ma'n an sawh sawn dawn lo. Chu Lal remruat chu a hunah, a hmunah mawi takin Lalpan a hna chu a thawk ngei e. He vohbik hming hi Lalremruata niin, a enkawltu dawr neitunu hi Nl. Lalhmunmawii ngei mai a ni e.
_"Hêng mi tê ber chunga in tih hi ka chunga ti in ni si."_


(He thuziak hi facebok a dah tawh, a ziaktu phalnaa EXPLOREMIZORAM.COM a dah a ni.)

Post a Comment

0 Comments