MESSAGE: LADC Day 2021 puala LADC CEM Manghmunga Chinzah thuchah

49th LAI AUTONOMOUS DISTRICT COUNCIL DAY PUALA LADC CHIEF EXECUTIVE MEMBER PU MANGHMUNGA CHINZAH  THUCHAH

29th APRIL 2021: Awle,a hmasain Lairam mipui-te leh Lai hnam zawng zawngte vawiin  LADC DAY VAWI 49-na kan lo thleng thei hi a lawmawm hle a, he hun min hruaithlengtu engkimtithei kan Pathian hnenah lawmthu ka sawi a, thinlungtakin chibai ka buk  che u a,duhsakna ka hlan bawk a che u. Lai hnamin District Council hran kan neihna pawh kum 49 lai a lo ni ve ta a.Chumi hma chuan Lai leh Mara te inkawpin Pawi-Lakher Regional Council kan lo nei tawh a. Kum heti zat Hnam-in District Council kan lo neih tawh a, amaherawhchu he District Council lo pian ni hi Holiday satliaha puangin Office kan chawl mai zel a ni. Chuti chuan Kum 2009 atang khan  Lai Hnam in District Council kan neih ni hi vantlang huapin programme hman tan a lo ni tawh a. Amaherawhchu, Kan hriat theuh angin khawvelah hripui Covid-19 nasa taka a len avangin he LADC Day lawmna hun pawh sungsai taka hman theih a ni lo hi  pawi  ka ti hle a ni.


Lushai Hills Distict Council hun lai kum 1952 khan kan hruaitu hmasate thahnemngaihna azarah Pawi-Lakher Regional Council kan lo neih tawh a, a hnu kum 20, Mizoram  UT a hlankai a lo nih kum khan, Pawi-Lakher Regional Council chu District Council Pathum Lai,Mara leh Chakma Autonoumous District Council ahte then hran kan lo ni leh a.Tichuan, Autonomous District Council status chu vawiin  thlenga kan dinhmun chu a lo nita a ni. He Autonmy, mahni ro in-rel ve theihna tur leh Autonomous District Council kan neih theihna tur a nasa taka tha leh ngaihtuahna senga lo thawk tu zawng zawngte vawiin ni ah hian kan  hre renga zahna chibai kan buk a ni.

Tun dinhmunah Lai Autonomous District Council-ah elected member 25 leh nominated member 3;  avaiin  Member 28 kan nei mek a, kum 2010 hma lam term engemaw zat chhung chu nominated member hi 4 kan nei thin a, amaherawhchu, kum 2010 –a delimitation-ah khan Nominated member hi 3 ah tih hniam a lo ni a, hei hi tha kan tih loh avangin tuna Sorkar/LADC Executive Committee chuan Nominated member hi 4 nei leh turin hma a la mek a ni ,a hlawhtlinna pawh  hmuh ngei kan beisei bawk a ni.

A tirah chuan kan budget pawh cheng Nuai 1.20 chauh a ni a,zawi zawi a lo pung chho ve zelin, tunah chuan  kan budget pumpui pawh Cheng Nuai 19000.51 lai a lo tling ve ta a ni. Department pawh (functional) tunah chuan 20 chuang zet mai kan lo nei ve ta reng mai. Budget head demand pawh 37 lai mai neiin, Thawktu pawh Headquaters; Lawngtlai-te, Sub-headquaters; Bualpui’NG’te, Divisions: Sangau,Lungtian, Diltlang, Chawngte’P’ ,Bungtlang’S’ leh Vathuampui ah te  kan nei bawk a ni. Zirna-in hma a sawn theihna turin School tinah zirtirtu rual khai taka an awm theihna turin siam remna (rationalized) kalpui mek zel a ni. Skill Development Training Centre-te, Tribal Girls’Hostel leh Multi Purpose Community hall  sak hnate tunah hian kan pui mekzel a ni bawk.

Kan hriat theuh angin Covid-19 hripui leng chuan  hmasawnna tura hmalakna te pawh nasa takin a ti thuanawp a. Kuminah pawh he hripui hian Mipuite ei leh bar zawn kawngah nasa takin a nghawng mek zel a. He hripui avanga harsatna tawkte pawh LADC-in phak ang tawkin  chhawmdawl hna-te a thawk ve mek zel a ni. Sorkarin he hripui laka kan him theihna tura inkaihhruaina dan a siamte tha tak a zawm theuh  turin ka ngen che u a ni. Tin, tunlaiin vanduaithlak takin kangmei a chhuak nasain kan district chhung ngeiah pawh mi engemaw zatin in leh lo te an chan a,he thil thleng hi LADC chuan pawi a ti in, kang-mei tuarte kan tuarpui tak zet zet a ni. LADC chuan kangmei tuarte leh chhawmdawl ngaite a hmun ngeiahte tlawhin tanpuina engemaw zat a sem chhuak a. Hemi kawngah hian LADC chuan a theih chinchinah tanpui ngaite leh chhawmdawl ngaite tanpui hna hi a thawk zel  dawn a ni.

India sorkarin kan hnam a lo than chhoh zel theih nana Autonomnous District Council min pek hi hre rengin rin tlak leh rinawm takin kan hnam tan i thawk zel ang u. Kan Culture leh Identity te hi hnam kan nihna ti langtu a ni a, kan hla leh lam te, kan tawng te pawh kan hloh mek zel a, kan hloh zel loh nan keimahni hma zawn theuhah tan i la thar theuh ang u . Lairam hi “keima ta” a ni a,kan zahpui tur a nilo tih rilru  nghet taka puin,  kan hnam hmasawnna turin tih tur engemaw tal ka nei ve a ni tih hria-in hma lam i pan zel ang u. Kan Autonomy a him zel theihna tur leh hma lam pan a lungrual taka ke kan pen ho zel theihna turin leh kan hnamin hma kan sawn zel theihna turin Lairam mipuite, Kohhran leh NGO-te kawng hrang hrangah min thawhpui turin leh min tawngtai sak fo thin turin ka sawmin ka Ngen  che u a ni.

A tawp ber-ah chuan LADC hnuaiah thawktu thahnem tak kan awm a, he District Council hi a neitu tak tak leh LADC in a policy leh programme a neihte ti hlawhtling tura thawktute in nih avangin; Officers zawng zawng leh staff zawng zawng-te mahni hna leh hmazawn  theuhah rinawmna leh inpekna thar nen kan hnam leh ram tam thahnem ngaitakin i thawk ang u.

KA LAWM E!


Post a Comment

He post chungchanga i ngaihdan lo sawi ve rawh:

Previous Post Next Post