Kolasib district-ah tui lak tur nei lo khaw thum awm tawh!

Aizawl | April 30, 2021: PHE Kolasib WATSAN Division atanga thudawn danin, Kolasib District chhunga khaw 3 te chu an tui lakna lui tui a kang chat tawh avangin tui lak tur an nei tawh lova; heng te bakah hian ni khata mi pakhatin tui litres 10 aia tlem a dawn hram hramna khua 5 awmin, Saipum khua phei chuan Tuirial ami motor hmanga an chawi chu Litre khat Rs. 1 hisap-in an lei.

Tui lakna kang chat tak avanga tui lak tur neilo khua te hi - Bukvannei, North Chhimluang leh S. Chhimluang te an ni a; ni khata Tui litre 10 a dawn phak lohna khua chu - N. Hlimen, N. Thinglian, Rajtali, Saihapui K leh Saipum te an ni. Bukvannei hian an tui lakna Tuilak lui chu Saihapui K nena an intawm avangin harsatna an tawk a, tunah phei chuan lak tur a awm tawh mang lova, Saihapui K pawh hian Reservoir tanky chu lei che avanga an hman ngam loh avangin an buai tawh hle.

North Chhimluang-in Dap Lei lui an lak pawh tui hna a kangchat tawh avangin kumin January thla atang khan Motor hmanga tuichawi atangin tui an lei char char tawh a; S. Chhimluang tui lakna Buhkang lui leh Sitai Nu lui chu a kang tawh bawk.

Hetihrual hian Tui harsat zualna bik khua 5 zinga Saipum khua chuan an tui lakna Thlan lui chu Gravity hmangin an la a, Tui a tlem tawh em avangin an harsa hle a; Tuirial tui chu motor hmanga phurin, Litre khat Rs. 1 hisapin an lei a, khawsak harsa (Thingtlang mi rethei) tan chuan a hautak hle a ni.

Thudawn dan chuan Urban Area-a chengte chu nitin mi pakhatin tui litre 70 tal dawng thei tura chhut a ni a, Rural Area-a chengte chu nitin tui litre 40 tal dawng thei tura ngaih a ni. Hetihlai hian Kolasib WATSAN Division chhunga Urban area zingah Kolasib leh Vairengte chauhin nikhata an tui dawn tur ang zat an la dawng pha a, Bairabi chuan nikhatah 54.99 Ltrs dawngin; Kawnpui chuan nikhatah 40 litrs chauh a dawng tawh anga report a ni. Rural area zingah ni khatna mi pakhatin tui litre 40 la dawng thei khua/veng 19 a awm a; dawng pha tawh lo khua/veng 19 an awm bawk.

Heng khua 42 te hian lui tui hrang hrang 72 atangin tui an la thin a; tui lakna inawm khua/veng an awm bakah, tun dinhmunah hian heng tui lakna zinga lui tui 13 te chu lak theih a ni tawh lo a ni. Tui lakna, lak theih tawh lo te hi a tlangpui a kangchat tawh vang te an ni hlawm.

- Kolasib Today