COVID-19 LAKAH INRALRIN A HUN!

 Daniela Nu

Covid 19 thawh hnihna in namen lovin India ram a chawk buai mek a, Mizoram pawh min luh chilh nasa ta hle. Chiai mai lovin mahni lam lo inbuatsaih nachang hria ila a va tha em.


1. Ka chenpui emaw nitin ka hnathawhpui emaw, ka thenawm te emaw, keimah ngei emaw pawhin he hri hi kan kai thut thei. Ni hnih khat thil thuah kan veng/khua Task Force thuchhuakah kan hming a lang ve thut thei. Chutiang tur chuan rilru lo inrin lawk, chiai lo tura Pathian tanpuina dil thin a tha.
2. Hri kai emaw first contact nih vangin  kan chhungkua emaw colony tawpin emaw home quarantine ngai thut thei vek dinhmunah kan ding ta vek mai. Chutiang lo thleng palh thei atan mamawh zualpui tak tak te hi chu lo indah khawl a tha. Thla tam daih indah khawl tum vak erawh midang tan harsatna a thlen thei, chin tawk neih a tha.
3. Kei emaw, ka chhungte emaw hian hri kai thut ta ila, CCC ah kal ngai thut se  ken ngai awm ngawih ngawih kan chhungkua hian neih loh kan nei em? Nidanga kan damlohva thenawmte ta hawh ang chi kha a rem dawn lo. Intodelh a tha.
4. India ramin ei leh barah harsatna nasa tak tawk se keini State pachhia hi a nghawng nat loh ring suh. Tun atangin sum renchem tur. Tul lovah kan chhungkuain sum kan la hmang em? Zuk leh hmuama kan hmanral te Family Emergency Bawm siama dah hran hun a ni. Zuk leh h hmuam hi hri inkai darhna remchang tak a ni thei reng reng. Simna remchang a ni bawk. I sahdam hmuam thin nuaitu leh i kuhva ei ṭhin khawrtu ten hri kai se a buaithlak dan tur ngaihtuah fo rawh. 
5. Thla tin sawrkar atanga hlawh la nih vangin inren lo bik suh. Hlawh lak mumal loh a thleng mek. A aia nasa in a thleng thei. Pathian zarah hlawh i la mumal reng thei dawn a nih pawhin chhung khat laina leh thenawm khawvengte tana malsawmna ni turin luan chhuah nasat leh zual a la ngai thei. Chutiang hun thlir chungin tul lovah sum khawhral suh.
6. Ramngaw kan thiah nasat avangin Aizawl khawpui tlan ber Tlawng lui a kang mek. Chhungkuaah  tui ren inzirtir nasat a ngai. Hripui hmachawn lai hian tui harsatna hmachawn tel a ngai. Neih ang anga ruahtui khawl nachang hria chhungkua apiang mifing an ni. Tuizem sing hnih man to ti tlat te hian chhungkaw khatah cell phone sing hnih/khat man pali/panga kan hum. Hei hi thil zahthlak a ni. Mithiamten kan ngaihhlut zawng (value system)  kan thlak a ngai tih hi hetah hian țan a va ngai ta em.
7. Inchhungkhur mamawh lamin dawrah kan kal lo thei lo. Dawr bik neih a tha. Vanduai palha dawr pali/panga contact tracing a intlar tir tu nih hi a zia lo. 
8. Mask vuah a ninawm, a lum si tiin phun suh. Mizo doctor, nurse leh thawktu dangten khawlum hnuaiah full PPE suit  nen damlo an enkawl tih hre chhuak fo rawh. Mask vuah chunga tha taka boruak kan hip thei hi lawm em em zawk tur. Oxygen pek chawp ngai, ventilator hmanga thawk chawp tir ngai te ngaihtuah la, mask vuah chu a nuam zawk tih i hrethiam fo ang.
9. A tawp berah chuan, Mizo kan ni hi lawm fo tur. Pathianin kohhran leh  NGO te min pe.  Pathian hnenah lawmthu sawi chungin hengte hi chakna dilpui fo ila, hrileng dona kawnga ral hmatawnga ralvengtu te tan nitin zantin bang lovin i tawngtai fo ang u.

 April 30, 2021

(A ziaktu zah tak chungin amah biak theihna tur kan hre si lova, inthlahrung takin kan dah a ni.)

Post a Comment

0 Comments