AMC councillor ten an thla khat hlawh chanve hri do nan hlan dawn; AMC Employees Welfare Association member ten an ni khat hlawh thawh dawn

Aizawl | April 28, 2021 : Vawiin khan DHME Conference Hall, MINECO-ah Health Minister Dr. R. Lalthangliana hovin Aizawl Municipal Corporation (AMC) Councillor te leh Aizawl City Area Local Council hotuten COVID-19 laka Aizawl khawpui a him theihna tura hmalak ho dan tur an sawiho a, Medical Operational Team Chairman Dr. ZR Thiamsanga, MLA leh Municipal Commissioner Pu K.Laldingliana ten he hun hi an hmanpui a ni.




Health Minister chuan meeting koh chhan sawifiahin COVID-19 hri vei mek (active case) kan neih 985 zinga 738 (75%) chu Aizawl khawpui chhung ami te an ni a, COVID-19 hrik inkaichhawn a awlsam tawh hle nia a lan bakah positive kan neih te pawh a hma ai khan an dam chaklo sawt ta hle niin a lang bawk a, kan hmalam hun  hi thlir thiam a har tawh em avangin nasa lehzuala tan kan lak a ngai a, Aizawl khawpui enkawl tura mipuiten an thlan chhuah Councillor te leh Local Council hotute nen kan dinhmun diktak hmaichhana kan sawiho hi a tul hle a ni, a ti a. Kan khawpui venghim tura mawhphurhna pawimawh tak chelhtute an nih avangin theihtawp chhuah tak meuha tan kan lak tlan a ngai a ni, a ti.

Medical Operational Team Chairman Dr. ZR Thiamsanga pawhin Mizoram chu COVID-19 bei tura tha leh zung zawng zawng senga kan tan mar a ngaih lehzual hle thu sawiin, CCC leh Quarantine Centre te a khat chak em em mai a, positive te kan pun chak bakah symptom nei an tam sawt em em a, hengte avang hian Community Quarantine Centre leh Community Covid Care Cebtre (CCCC) pawh siam belh lehzel a la tul dawn niin a lang a, hengah pawh hian  Councillor ten an bial chhunga hmalaknaah theihtawp chhuaha min lo tanpui a ngai a ni, a ti a. MLA ten an thla khat hlawh atanga 10% COVID-19 do nan pek an remtih tawh thu a sawi bawk a ni.

Aizawl Mayor Pu Lalrinenga Sailo pawhin Councillor ten an bial theuhah theihtawp chhuaha COVID-19 dona kawnga hma an lak thin thu sawiin, an thla khat hlawh chanve (50%) pawh COVID-19 dona atana tangkai taka hman turin an thawh dawn bakah, AMC hnuaia hnathawk “AMC Employees Welfare Association” member ten an ni khat hlawh theuh COVID-19 dona turin an thawh dawn tih a sawi a. Vaccine sem kawnga hmalakna puihbawm nan cheng nuaih hnih AMC-in an pek tawh thute, Aizawl khawchhunga COVID-19 hluarna veng hrang hrang an tlawh thu leh heng veng LLTF te tha tihchak nan Rs. 10,000/- theuh an pek thute a sawi a. Sawrkarin CCC leh Quarantine Centre a siam bakah Community Quarantine Centre leh Hotel Quarantine Facility siam belh a nih hnuah heng hmuna hnawmhnawk (COVID waste) senghawi tur a tam lehzual tak avangin awmze nei zawk leh mumal zawka heng COVID waste te hi paih fai a nih theih nan ruahmanna an siam mek thu a sawi bawk.

Vawiin meetingah hian Task Force te thahnemngaihna leh tlawmgngaihna a fakawm thu sawi lan niin Aizawl City Area Local Council Associationn hruaitute pawhin Local Council member ten an thla khat hlawh theuh COVID-19 dona atan thawh turin ruahmanna an siam mek thu an sawi a, heng hi anmahni area theuha Local task Force te tha tih chak nan hman an tum tih an sawi a. Sawrkarin COVID-19 dona kawnga hma a lakna reng rengah tha taka thlawp zel an tum tih an sawi bawk a  ni.

Vawiin meetingah hian Aizawl Municipal Corporation hnuaia bawlhhlawh paih motor khalhtute harsatna tawhte sawi niin, COVID-19 dona kawnga an hnathawh thatah fakawm an tih thu sawi a ni a. COVID-19 hri leng laka an him theihna tura rawtna awmte chu tihhlawhtlinsak an nih tur thu Health Minister hian a sawi a ni.
Health Minister chuan AMC Councillor te leh hnathawktuten an hlawh atanga COVID-19 dona tura sum an thawh tur leh chutiang bawka Local Council ten ruahmanna an siam chu chhuanawm a tih thu leh entawntlak a tih thu sawiin, Aizawl khawpui himna tura an thahnemngaihna leh inpekna fakawm a tih thu a sawi a. Chief Minister Pu Zoramthanga pawh COVID-19 dona kawngah a inhawn thu sawiin a hmalaknainin COVID-19 positive te enkawlna damdawi vang tak Remdesivir 1000 lai ZMC-a hman tur kan lei leh thei dawn a ni a ti a. RT-PCR test kit State sawrkar hnena a thlawna pek chhuah theih tawh loh chu ICMR Director-General-in  a ngenna a ngaih pawimawh avangin test kit 25000 lai a thlawna a rawn pek leh thu a sawi bawk.
AMC Councillor te chuan COVID-19 dona kawnga hnathawh kawnga an hmalakna te leh harsatna awm thei nia an hriatte bakah rawtna chi hrang hrang an sawi a, hengte hi a theihna ang angah bawhzui a nih tur thu Health Minister hian a sawi bawk a ni.

Post a Comment

0 Comments