Aizawl | March 11, 2021: Vawiin hian Serchhip Auditorium tualah Mizoram Handloom & Handicrafts Development Corporation Limited (ZOHANDCO) buatsaihin Special Handloom Expo- 2021 buatsaih a ni a. Pu Lalrinenga Sailo, Mayor, AMC chuan khuallian niin a hawng.
A hawnna inkhawm tawi Pu C. Lalrammawia, Chairman, ZOHANDCO kaihhruaiah khuallian chuan, Mizo ziarang tilang thei kan thilsiam chhuah hrang hrangte khawvelah a lar ve tawh hle a a hriat thu leh la tihlar chhoh zel a tul thu a sawi a, a siamtute pawhin rintlak zawk leh tlo zawka an thilsiamte an tihchangtlun ve zel tula a hriat thu te a sawi a. Kan hnam zia tilang thei kan thuamhnaw te leh thildang dang kan siam chhuahte chu mipuiten kan hlut chho tial tial dawn chauhva, hetiang lama eizawngtute tan pawh a la hlawk tial tialin a rinawm, a ti bawk. Special Expo 2021 a inpho chhuak zawng zawngte duhsakna a hlan a ni.
Auditorium tualah hian dawr engemaw zat siam niin Handloom & Handicraft chi hrang hrangte zawrh chhuah nghal a ni a, Serchhip mipui a duh apiangten pan theih a ni ang.
Naktukah he hmunah vek hian Vendors Development Programme buatsaih zui a ni bawk ang.
He hunah hian ZOHANDCO thawktute leh Serchhip lama sawm bik official pawimawhte leh handloom & Handicraft siamchhuaktute an tel a ni.
- DIPR
Post a Comment
He post chungchanga i ngaihdan lo sawi ve rawh: