sorkârin tar pension a kim thlapin a pe - Social welfare minister

Aizawl | March 10, 2021: Social Welfare Minister Dr. K. Beichhua-a’n sorkârin tar pension lak thensak loin a kim thlapin a pe thin tih House a hrilh.

Nimin Session-ah zawhna chhangin Minister Dr. K. Beichhua chuan, Serchhip biala by-election neih tùra campaign-naah tar pension lâk tùr sorkârin a lâk thensak ti-a sawitu chu Congress party official candidate ni-a a hriat thu a sawi a. Tar pension pawisa chu Rural Development Ministry atanga an dàwn thin thu te, kum bithliaha pension pek an nih thu te, pension pawisa chu sorkâr laipui leh state sorkâr-in a intum sem thu te a sawi a, sorkâr-in a lâk thensak ngai lo va, a kim thlapin a pe thin a ni a ti.

Tar Pension chungchangah hian Social Welfare & Tribal Affairs Department pawhin thu dik puan chhuah a tul nia sawiin vawiin khan thuchhuah an siam a. Chu an thuchhuahah chuan - Old Age Pension hi Ministry of Rural Development atanga sum hmuh ang zelin sem chhuah thin a ni a. Tum khatah thla 6 atan te thla 4 atan tein sem chhuah a ni thin, an ti a.

Tar pension bakah hian Pradhan Mantri Garib Kalyan Yojana (PMGKY) hnuaiah, COVID-19 hrileng avanga chhawmdawlna a tan Central sawrkarin Old Age Pension dawngtute hnenah Cheng 1000 theuh a pek pawh sem tawh a ni a. Old Age Pension Scheme hnuaia pension dawngtu tur ten an dawn tura Ministry leh State Sawrkarin a tih zat hi vawikhatmah lak thensak ni lovin a kim thlapa pek zel a ni, an ti. 

- AIR Aizawl