Biak ina zai phal; Kar khatah zan hnih inkhawm phal

Aizawl | March 10, 2021: Mizoram COVID-19 dinhmun in ziaawm lam a pan zel nia a lan avangin kar khatah zan hnih Pathian biak inkhawm neih phal a ni a, biak ina Pathian faka zaiho pawh phal a ni bawk.
Zoram Medical College (ZMC) chu karleh thawhtanni atangin COVID-19 veite bakah COVID-19 vei ni kher lo, damlo dangte tan in admit theih a ni ta bawk.
Health Minister Dr. R. Lalthangliana hovin nimin khan MINECO-ah Mizorama COVID-19 hri leng dinhmun thlirhona neih a ni a. Meetingah hian Home Minister Pu Lalchamliana, Medical Operational Team Chairman Dr. ZR Thiamsanga, MLA bakah Sawrkar department hrang hrang hotute an tel a, Mizoram University, Mizoram kohhran Hruaitute Committee, Jt. NGO Coordination Committee, Indian Medical Association leh Mizo Zirlai Pawl aiawhte an tel bawk.
Meeting chuan Mizoram COVID-19 boruakin ziaawm lam a pan zel nia a lan avangin State Executive Committee on State Disaster Management in Standard Operating Procedure siamin order an tichhuak ang an ti a. Vawiin leh naktuka Mizoram Presbyterian Church Synod in Kohhran Hmeichhe Khawmpui Lian Khatla kohhran biak ina an neih turah khawmpui palaite biak in compound-a an riah luh vek dawn avangin zan lam programme neih an phalsak bawk.
Meetingah hian ZMC-a COVID-19 positive te awmna ward leh damlo dangte awmna ward hi a hranpa a siam a nih bakah, a panna kawng leh luhkate pawh a hranpa a siam vek a nih avangin engmah hlauhthawn tur a awm loh thu tarlan a ni a. COVID-19 dona kawnga hmanrua leh bungrua mamawhte pawh tun dinhmunah chuan indaihlohna a awm rih loh thu tarlan a ni bawk.
COVID-19 vaccine "COVISHIELD" dose nuai 1 sing 2 & 8,840 dawn a nih tawh thu tarlan a ni bawk a, heng zinga dose 55,780 hi mipui vantlang tan a thlawna sem tur niin vaccine mipuite dawn tur hi sawrkar laipuia thuneitute hnenah dil belh tum mek a ni. 
Mizoram chhung hmun 31 ah vaccine semna hmun siam a ni a, vaccine hi mi pakhat tan dose hnih zela lak tur niin, a lo thleng sa atang hian dose khatna la tawh te lak leh tur dahthat nghal vek a ni.
Meeting chuan COVID-19 volunteer te tlawmngaihna leh thahnemngaihna lawmawm an tih thu tarlangin, an lawmman tur pek theih a ni tawh lo chung pawha Mizoram tan a ni hriaa hlawh phut miah lova a tul ang anga theihtawp chhuaha la thawk chhunzawmte inpekna a ropui an tih thu leh chhuanawm an tih thu an sawi a ni.
Chhiatni thatni atana hman tur SOP leh SOP hmanlai-ah a tul anga ennawn ngaite chu State Executive Committee on State Disaster Management kutah a tul anga an lo bawhzui turin tih a ni bawk.

- AIR Aizawl

Post a Comment

He post chungchanga i ngaihdan lo sawi ve rawh:

Previous Post Next Post