Siampuii Ralte music video thar 'thawnthu tawp thei lo tur' kan hmu hnai!

Aizawl | March 27, 2021: A aw ngaihnobei tak vang leh a nui hmel mawi tak vanga mi hriat leh ngainat hlawh, tlerawl zaithiam Siampuii Ralte chuan February thla atanga an buaipui tawh Music Video 'thawnthu tawp thei lo tur' chu a tichhuak thuai dawn niin thu kan dawng.


Siampuii Ralte chuan, ZONET a pek chhuah tur a nih thu sawiin, "ZONET-ah engtikah nge tihchhuah a nih dawn ka hre lova, mahse, a chhuak thuai ang," a ti a, "Youtube lamah erawh karleh zirtawpni vel hi chuan dah hman kan inbeisei," tiin Explore Mizoram a hrilh.


Kan thudawnna chuan, Music video hi February 17 aṭang khan shooting an nei ṭan a ni.

February 18 khan he Music video chungchang hi Explore Mizoram-ah hian kan ziak tawh nghe nghe a, HETAH hian a awm e.



Siampuii Ralte hla thar tur hi 'thawnthu tawp thei lo tur' tih a ni a; He hla hi Zaithiam Zirtluangpuii hla lar zinga mi 'Ka liam mai nang e' tih leh JT Production hla 'Min dem lo la' tih thluk mawi taka lo siam tawhtu Johntea Parmawi phuah niin a thlûk pawh ama siam a ni nghe nghe a, beng a tlaiin, a mawi dangdai leh viauin a rinawm.



He hla 'Thawnthu tawp thei lo tur' hi khawvela mihringte dam chhung nia kan inhmangaihna chu thihnain a ṭhen mai tur thu pho chhuahna lam hla a nih piah lamah he hlaa inhmangaih em em nula leh tlangvalte inhmangaihna hi mitthi khawvelah pawh tawp mai lo tura duhna lam hla a ni.

Music video-ah hian Siampuii Ralte bakah a thianpa Sihphir tlangval Nelson Zothanpuia a inlan ve dawn a. Anni pahnih hian nula tlangval inhmangaihna thawnthu hi an chang dun dawn a ni. 


Music leh Recording lam hi H Production lamin an buaipui a, videographer hi Anthony WoWv niin, Music video hi tunlaia Media Production team indin thar WoWv Production-in an produce dawn bawk a ni.

Post a Comment

0 Comments