SERCHHIP POLITICS TITI -II

- K Remruatfela

_Part - I ah khan February thla tira ni 2 leh zan 2 ka haw chhunga Serchhip Politics titi ka rawn tarlang tawh a. Tun tumah pawh hian March thla tira Serchhip ka haw leh chhunga ka zirbingna atanga politics titi ka hriatthiam dan ka rawn tarlang leh dawn a ni._

*1. Indian National Congress:*

An Official Candidate leh kan khaw pa, Pu Tlana hi hnial rual lovin Candidate te zinga taima ber a ni a. Lênna apiangah Pu Tlana laichin hnai leh thenrual thate an awm deuh zel mai a. Tin, titi tam berah chuan Pu Tlana hi chu lo tling ta se la chuan duh duha kan tih bawrh bawrh theih tur leh kan ngam ber tur a ni asin maw le...tih a ni deuh zel a. Mahse, an thu tlângkawmnaa *a ni asin maw le* tih thumalin a zawm zel avang hian tling tur em hi chuan an ring zo hlawm meuh lo a ni thei mai ang em aw tih chu a rin tih theih a, nimahsela, chu thu erawh chuan party chhung mai bakah amah Pu Tlana hian mimal vote ken tel a neuh teuh thu a tarlang chiang hle awm e.

*2. Mizo National Front:*

Rin ang ngeiin Inthlan a hnai tial tial a, ruling wave a tleh na chho tial tial bawk a. A hmaa Arsi ni lo lama vote pe tur ni ngei ngeia ka rin thinte pawh khan tun tum ka haw chu _"Pu Duha leh Pu Tlana hi chu a tu ve ve pawh tling se ka duhsak ve ve te an ni a. Mahse, ngun taka ngaihtuah chuan ruling Candidate ngei l, Pu Zawma hi kan thlan tlin chuan khawtlangin hma kan sâwn pui ber dâwn a ni tih chu a chiang reng si a"_ - tia tuilairapa awm chho lek lek dâwna lang rin loh pui pui an lo awm chho nuk tawh a. Ka rin ai daiha thla khat chhung leka ruling wave a tleh na chho hman hi a mak pawh ka ti hle! Chutihlai erawh chuan neutral tam takte hi chuan Sawrkar lai thutiam zawng zawng hi awih chin tâwk an nei tih a chiang reng a. Party President ber a khak sual zauh zauh bawk nen Part - 1 lama sawi tawh ang khan neutral vote hi chu chuti tehchiamin an hui then theih a la rinawm chuang lo! Party worker vote ringawt atang chuan tlin a har hle dawn a ni tih hi a hre chiangtu vek kan ni awm e.

*3. Zoram Peoples Movement:*

Trojan Horse an sawi ang deuha strategy mumal tak nena a hun taka den chat an tum vang nge ni a, rin ai takin ka haw chhung khan ZPM thâwm a reh angreng hle a. Rin loh takin party worker te pawh an inphahhnuai thiam hlein a lang! Chu tak chu Pu Duha tan advantage lian tak a ni ve thei tlat a ni. Ka haw lai kha Party hotu lu, Pu K.Sapdanga lo zin lai a ni a. Rin ai takin Press mite hmaah a khak fuh riau a. Chu chuan Pu Duha dinhmun sang takin a vawrh ngei a rinawm. Part - I lama sawi tawh angin ZPM hi chu Neutral vote-a innghat tak mai hi an ni a. Hei hian assesement neih thiam a ti har hle a ni. Mipui tam zawk hi chuan Pu Duha hi an la lainat tak zet hlawm tih a hriat a. Mak tak mai chu Party dang chhungkua zinga mi han kawm fuh chânga politics boruak han sawipui hian Pu Duha hi an lo lainat hlawm zêk zel mai a. Chu chuan ZPM leh Neutral vote piah lamah party dang vote him anga ngaih pawh hi hui then tâwk a nei nual dâwn tih a tilang chiang hle!

*4. People Conference Party:*

Zep thu a chêng lova, tun tum ah hi chuan Pu Ruata  boruak hian Serchhip khawpui chhung a chiah meuh lo a ni a tih theih a. Han zawh luih fe hnua sawi chhunte pawhin Pu Ruata hi chu party lian sa candidate chu ni se vote chu a hmu teuh ang tih chauh hi a ni mai zel a. PC Party ticket atanga tling chho tur chuan kawng thui tak zawh tur a la nei a ni tih chu amah pawh hian a phat a rinawm loh!!