School education minister in MBSE building thar lungphum a phum

Aizawl | March 19, 2021: Vawiin khan School Education Minister Pu Lalchhandama Ralte chuan Chatlanga MBSE Office-ah Mizoram Board of School Education (MBSE) building thar sakna tur lungphum a phum. Building thar hi tunah MBSE Office Chaltang ep chiaha inzawma sak tura duan a ni.

Pu Lalchhandama Ralte chuan MBSE chu zirlai ten zirna tha leh certification pawimawh tak an neihna kawngah kawngro sutu leh mawhphurhna lian tak nei an nih thu a sawi a. Zirna lama thuneitu academic authority an nih angin kan zirlaite quality siamna kawnga te, ram pum huap national level anga zirna kan el phakna tur atan thawktu leh hemi kawnga zirlaite buatsaihtu pawimawh berte zing a mi, an ni a ti a. Building thar sakna tur chu zirna kawnga hmasawnna mellung pawimawh tak anih ngei a beisei thu sawiin zirna kawnga vawiin hi rahbi thar kan tukna ni a ni ngei ka beisei a ni, a ti bawk. 

Lungphum phumna programme tawi hi Pu J.H. Zoremthanga, Chairman, MBSE chuan a kaihruai a. MBSE building thar sak tur hi a drawing engkim peih fel tawh a ni. Tuna building awmsa bul chiaha sak tur niin, tuna building hman mek hi a vaia thuamthat leh siam danglam renovation leh retrofitting tih vek tura ruahmanna siam a ni. A pumpuia sum ruahman zat chu Rs. 8,32,97,207.00 a ni.

MBSE building thar tur hi avaiin chhawng 8 tur a ni a, building awmsa mila building thar sak tura duan a ni a. Ground Floor hi lirthei dahna atan ruahman a ni a, parking tur zauh zawng hi avaiin 569 sq. m tura duan niin lirthei four-wheeler leh two-wheeler; dah theih tura ruahman a ni. Basement 1, 2, leh 3 ah hian Examination Branch a awm anga, hetah hian Computer Room, Tabulation Room, Evaluation Hall, Library bakah Record Room engemaw zah a awm ang. Basement 4 hi Security Guards, Chokidar Quarters leh Store room atana ruahman a ni. First, second leh third Floor te hi General Branch, Academic Branch leh Conference room atana ruahman a ni a, MBSE meeting room, workshop room leh conference hall te a awm bawk ang. He hna thawk tur hian T Thanzauva, Electric Veng, Aizawl thlan niin, Ni 03/02/2021 khan Work Order pek a ni a, 18/02/2023 ah zo vek tura beisei a ni. 

Vawiin programme ah hian Dr. Lalzirmawia Chhangte, Special Secretary, School Education; Pu James Lalnunmawia, Director, School Education, School Education, SCERT leh MBSE officials te an tel a ni.

- DIPR