Rajya Sabha MP-in State Level Children’s Science Congress hmanpui

Aizawl | March 3, 2021: Vawiin khan 28th State Level Children’s  Science Congress chu Education Centre Conference Hall, Treasury Square-ah neih a ni a, Rajya  Sabha MP Pu K.Vanlalvena’n a hmanpui.



Pu K.Vanlalvena MP chuan he hunah hian thusawiin vawiina zirlai rualte tan khawvelah hian hmun a awm a, hma lam hun eng tak an nei tih hre turin a fuih. Tuna zirlaite tan hian heng hnate hi a rawn inher chhuak zel dawn tih sawiin hna a vang tia rilru tihnual lo turin a fuih. Pu K.Vanlalvena chuan zirlai kalkhawmte chu an thil tum leh nih an duhte chu midang ta a ni bik lova, an ta a ni tih hrechiang tur te, an tum tihlawhtling turin an tum leh nih duh tichiang a, Pathian hnena thlen thin turte, an tum chu nei tawh ang chiaha rilru hlim leh zangkhai taka inbuatsaih thin turin a fuih a ni.
State Level Children’s Science Congress neih mekah hian National Children’s Science Congress-a tel tur thlan an ni dawn a, National level-a kal hna sang tak tak thawk te pawh an lo awm tawh a ni. National Children’s Science Congress chu kum 1993 atang khan New Delhi-ah neih a ni a, hemi kum atang hian Science Teachers Association (STAM) chuan zirlai a tir chhuak ve nghal a, Kum 2016 atangin RMSA tuna Samagra Shiksha-te nen tanghovin District Level atanga buatsaih thin a ni. National Level thleng phak lote pawh North East tour-te neihpui thin an ni a, National Level Children’s Science Congress-ah hian Child Scientist 2016 vel tirh chhuah tawh an ni.  
Vawiina State Level Children’s Science Congress tan takah hian Siaha tih loh District dang zawng atangin Child Scientist-te an lo kal khawm a. Heng District  atanga lo kalte hian Guide teacher te nena an siam Project  an present a, Project chi hrang hrang 30 an present dawn a ni. Nikum December thla khan St Paul's zirlai pahnihte chu Virtual International Science Fair Mexico-ah India ram aiawhin an tel a ni.
State Level Children’s Science Congress-ah hawnna hun hman hi Pu James Lalrinchhana Director School Education-in a kaihruai a, Pu VL Malsawma State Coordinator-in report a pe a, International Science Fair Mexico-a tel R.Lalnuntluangi leh Lalhruaitluanga St Paul's HSS, Guide Teacher Vanneisangi Tochhawng St Pauls HSS-te chawimawina hun hman a ni bawk a. School Education-a officer thenkhatte leh District atanga kalkhawm Child Scientist leh Guide teacher-te an kalkhawm a. Vawiin chawhnu khan heng Child Scientist-te hi Pachhunga University College-a Science Laboratory-te fanpui an ni.

- DIPR

Post a Comment

0 Comments