MZU M.Sc Zoology Gold medalist 2020 Nicy Vanrohlui

Mizoram University (MZU) Master of Science (M.Sc) Zoology Gold medalist Nicy Vanrohlui kan belchiang.


CGPA 8.814 hmu a MZU MSc Gold Medalist 2020 ni thei 'Nicy' tia koh thin, Nicy Vanrohlui hi Lalchhuankima leh Lalnithangi te fa pali zinga naupang ber dawttu niin Septmber 12, 1997 khan a lo piang a. An unau hi pali niin, Mipa pahnih leh hmeichhia pahnih an ni. Nicy hi an khua chu Ngopa, Saitual district niin,  tunah hian Ramrikkawn, Aizawl-ah a khawsa mek a ni.

Nicy te hi Kohhran lamah chuan Presbyterian Church of India(PCI) kohhran a lawi an ni.


Zirna lam:
1)Pawl 1 atanga pawl 10:
- Pawl 1 atanga Pawl 10 thleng hi Douglas Memorial High School, Churachandpur, Manipur ah ka zova. Primary school thleng chu top 3-ah ka lang thin, Middle leh H/S thleng chu class topper ka ni deuh tlangpui thin. Pawl 10 (HSLC) chu 2013 khan Distinction-ah ka pass.
2) Pawl 12 hi:
- Pawl 12 chu Sielmat Christian Higher Secondary School, Churachandpur, Manipur-ah kum 2015 khan Distinction ah  pass-in ka zo.

3) Zirna sang zawk:
- B.Sc Zoology honours, Handique Girls College, Gauhati University-ah 8.4 CGPA  out of 10 hmu in 2018 khan ka pass chhuak. M.Sc. Zoology chu Mizoram University-ah kal in 2020 khan CGPA 8.814 out of 10 hmuin ka zo. MSc 3rd sem ka zir lain CSIR-UGC-Net through in tunah hian Mizoram University, Department of Zoology, Reproductive Biology Laboratory ah  Ph.D.  ka ti mek.


# I lehkha zir dan?:
- Ka tet lai chuan kum tir hian Study Table ka insiama chu chu bahlah loin kumtluanin ka zui thin. College ka rah atang chuan zir hun bik ka nei lova, ka duh hun hunah, ka rilru a kal hun leh min tibuaitu awm loh hunah hian ka zir thin, zan rei mut hnuah  te ka harh hian zir duhna rilru a awm chuan ka zir leh thin. Ka thil zir reng reng a awmzia ka hre hmasa phawt thin a, ka hriathiam vak loh te a awm chuan ka chhinchhiah a, Ziritirtute ka zawt thin bawk. Chubakah, exam dawn hi chuan ka zir tur note siam na'n hun tam zawk ka hmang thin. Chuan, ka tet te atanga tun thleng hian lehkha ka zir hma hian Bible chhiarin ka tawngtai hmasa ziah thin.

# Harsatna i hmachhawn dan?:
- Harsatna ka tawh chang hian Pathian ka bel hmasa ber thin. Bible-in, “Tawrh zawh loh tur engmah ka pe lo ang che u”  tih leh “Pathian fa te chu tlu mahse an chhelet der lo ang” a tih te hian min thlamuan thin.  Ka nu leh pa te hi engkim ka hrilh thin, tun thleng hian ka harsatna tawh apiang te hi chinfel theih loh an la nei ngai lo. An hnenah ka sawi tawh hi chuan ka thla a muang em em thin, a chhan chu Pathian hian ka nu le pa kaltlangin min be thin ni hian ka hria.

# Gold medalist i nih na (Subject) leh CGPA?
- M.Sc Zoology / Cgpa 8.814

# Gold medalist ni tura i beih dan?
- Gold medalist ni tura beih ai mahin ka zirlaia ka tuina leh hriatloh thil hriat belh chaka ka zirna hian min nih tir niin ka hria. Zoology-ah hian hriat loh tam tak hriat chakna leh tuihalna min pe a, chu chuan taimakna min pe. Class kan kal te hian thil thar kan zir dawn tiin class zawng zawngah hian thil thar eng emawni tak chu zir chhuah ngei ngei ka tum thin. Lehkha hi chu zir hun bi ka nei lova, mahse, ka rilrua a luh tawh hi chuan ka chhiar char char a, thil dang reng ka ngaihtuah ngai lo. Ka sirah hian music ring tawkin play pawh ni se min tibuai ngai meuh lo.


# Gold Medalist ni tura i beih naah faculty lamin an ṭawiawm/puiṭha chein i hria em?
- Faculty lam pawh hian min pui nasa a, an tel lo chuan Gold Medalist title hi ka nei lo ang. Faculty te hi engkimah an inhawng zau em em a, inthlahrung miah lovin engkim hi ka zawt thin. Thil tihsak ngai ka neih chuan min tihsak zung zung zel a, hriat loh te kan neih hian vawi tam tak sawi ngai pawh nise kan hriatthiam hma zawng min hrilhfiah char char thin. Teaching Class hi ka hlawkpui em em a, dam lo chung pawhin serious lutuk a nih loh chuan Class Missed hi ka duh ngai lo.

# I zirna atana i chhungte pawimawhna:
- Zirlai hian engkim hi a tluang reng thei bik lova. Achang chuan hlawhchhamna, manganna, leh hlauhthawnna te hi a awm ve zeuh thin. Chutiang hunah chuan chhungte hi ka thlamuana ber an ni. Ka chhungte chu ka chakna an ni. Thil kan duh dana a kal loh chang leh vanduaina ka tawh chang hian min fuih thin a, ka thil tih a hlawchham chang te hian, “A pawilo e, ni dangah i ti leh mai dawn a lawm, i ti tha lutuk tho e, i rilru ti hah duh suh”  tiin min thlamuan a, min fuih thin. Ka pa hi zirna ngaisang em em mi a ni a, zirna lam thil a nih phawt chuan sum lamah harsatna a siam duh ngai lo. “chhungkaw sum lakluh 90% chu zirna atan a ni” a ti thin. Chumai bakah, ka zirna a ngaipawimawh em em a, “I zir peih chhung chu ka pui zel ang che”  min ti bawk thin.

# I zirna atan a i ṭhiante pawimawhna: 
- Ka thiante hian ka zirnaah hian min pui nasa em em a. Kan hriat loh te kan inhrilh tawn thin a, sawihona te kan nei thin. Hetianga kan inhrilh tawn atanga hian kan hriatna leh thiamna te a pun phah em em a ni. Kan chian vak loh thil te pawh thiante nena kan han sawihonaah hian kan hriat phah zawk thil hi tam tak a awm. Chubakah,  ka thiante hi boruak awm lohna hmuna boruak thianghlim ang an ni, rilru hriselna min pe a, min tihlim a, chu chuan zirna lamah pawh min pui em em a ni.


A duhzawng leh ngainat zawng te:
Rawng – Maroon Colour (A sen duk lampang).
Chawhmeh  - Sa kaw chhung, thil kha lampang (eg. changkha, phuihnam,  samtawk).
Incheina – Jean Kekawr leh T-shirt.
Rimawi – Country Music.
Mizo Ziaktuzingah – Dr. Hrekima.
Hla - A hmangaihnaa ka chawlhin.
Hlaphuahtu – C.Lalzarmawia.
Teacher – Zirtirtu ka tawn tawh zawng zawng hi ka ngaina vek. Zirtirtuin zirlai hmanga tunlai thil deuh te nena an han sawikawp zeuh te hian an class a ti nuam zual thin.
Leader –  APJ Abdul Kalam

Mize ngainat zawng: Mi inngaitlawm, mahni inringzo tak, mahni nihna zahpui ngai lo leh a nihna ang anga thiltha ber sawichhuah tum mi, rilru tluang leh engkim a eng zawnga thlir tum tlat mi.

Mize ngainat loh zawng – Mahni nihna aia sanga khawsak tum tlat mi, mi hmusit ching leh mahni aia dinhmun hniam zawkte diriam thin mi.

Hobby- Adventure Movies en, Music ngaithlak leh lehkhabu chhiar.

Relationship status – Single.

Kawppui atan duhzawng – Pathian tih mi, mahni inringzo tak, mi rinawm, mi tlawmngai, inngaitlawm, a thu sawia ding nghet mi, mi dawhthei tak leh ruihtheih thil engmah ti lo.


:::Zawhna dang:::
1) A tel lova i awm theih loh: Pathian.

2) I nun kaihruaitu: Bible.

3) Hringnuna i hlauh ber: Mal taka inhriatna neih.

4) I tih ngai miah loh tur: Kei aia dinhmun chhe zawka dingte diriam.

5) Mizo Tualzal nuna ṭha i tih: kan tlawmgaihna nun leh inchawimawi tawnna nun.

6) Quote i duh ber: Psalm 37.
 “Mi sualte avângin intihrehawm suh la, An thil diklo tihte awt bawk hek suh.”

7) Mizoram leh Mizo tualzal nuna Mizo hmeichhia te dinhmun:
- Hmeichhiate hi Mipate nen kan intluk tlang  vek tawhin ka hria. Zirna lamah pawh ni se hma kan sawn tawh hle a, hna tam tak mipa ho chauhina an ti theih tura kan ngaih te pawh hmeichhia pawn kan rawn ti chho zel tawh a. Mizoram leh Mizo tualzal nunah hmeichhiate hmalam hun a eng hle niin ka hria.

8) Hnam hmingṭhat leh hmingchhiat kawngah Hmeichhiate mawhphurhna:
- He mi kawngah hian hmeichhia hian mawhphurhna sang tak kan nei ve a, kan hnam hi hmingtha tura kan duh anih chuan nun dan mawi takin, mi zah tlakin nung ila chu hnam tihmingchhetu aiin tihmingthatu kan lo ni thei zawk ang.

9) Hnam ziarang chawinun kawnga Hmeichhiate mawhphurna:
- Khawvel lo changkang zelin Khawthlang nun tamtak ching mah ila hmana kan pi leh pu ten a anlo chin leh traditional hmanlai thil anga anlo tih thin zawng zawng te, ei siam emawni  pawh ni se hre vek ila, hun dangah chuan khawthlang nun kan lo la chhawng anih pawhin kan hnam  thil te hi chu thiam tum veka, a hun a thlen a hnam rilru pu taka chet hi atha ka ti.

10) Mizote tan ‘Fa neih tlem’ inzirtir hi a ṭulin i hria em?
– Mizo hi kan la tlem em em a, fa neih tlem inzirtir chu ala tul vakin ka hre lo. Kan chhungkaw khawsakin a tlin dawn tho chuan. Thufing pakhatin, “Sanghain an tam an thih puia, mihring in an tam an dampui” a ti ve thung.  Kan tam na na chuan inelna pawh a sang zawk anga chuan khawvelah pawh kan darh zau zawk anga, tun hma aiin mi thiam leh rawn tlak tam tak kan chhuak hnem zawk ang.


11. Mizo hnam ṭhanmawh bawk nia i hriat?:
- Kan lungawina hi ala hniamin kan tum a la  sangtawklo. Tum sangtak neiin chu mi chu kan puitlin hma zawng chu bei zel ila a tha ka ti.

12. Mizo hnam damna atana kawng awm nia i hriatte?: 
- Pathian thu hi kan nunna hian nunpui tak tak ila, Mizoram chhung ringawt thlir lovin kan chheh vel ho inhruai dan tha te entawn ila. Mahni tha intihna a san lutuk hi chuan kan tlakchhamna leh insiamthat kan ngaihna te hi kan hmuh thelh fo thin, chuvangin a chang chuan tlema inenfiah ve a ngaih chang a awm in ka hria. Chutichuan, a hma aiin inthurualin pumkhata len zel hi a pawimawhin ka hria. 

13. Hnam chhan nana Hmeichhiate ṭangkaina leh mawhphurna?
- Hnamchhan nan hian hmeichhia te hi mipa te aiin kan nep chuangin ka hrelo.  Hnamchhan tur hian chhungkua atanga intan angai niin ka hria, hmeichhiate chu chhungkhat nu anih angin fa te enkawlhnaah hian mawhphurna sangtak an neia,  fate chu tette atanga hnam hlutzia leh nundan tha leh engkim zirtir hian kan mizo hnam tan damna ani ngei ang, a chhan chu engkim hi a bulthut a ngheh angai, chumi bulthut chu inchhungah a intana, chu mi tur chuan chhungkhat nu hian mawhphurhna sangtak anei niin ka hria.

14. Zirna, Khawtlang leh Kohhran hi?
- Zirlai tan kohhran leh khawtlanga inhmang hi a that lohna a awm lova, mahse tam tak chu inbuk tawk taka hun siamrem an thiam loh thin avangin an nun, an zirna kawng an ti chhe fo thin. Zirlai nih hi chuan kan zirlaiah hian rilru zawng zawng pe ila, kan zir chhung zawng chuan vantlang thilah duh angin kan inhmang hman lo a nih paw'n nakina ram leh hnam tan kan thiamna hmangin mi tangkai tak kan la ni thei tho.  Mahse zirna, khawtlang leh kohhran thil hi thiam taka hun kan pek theiha kan zirlai tibuai lo tura kan tih theih chuan chu aia tha chu a awmin ka hre lo.

15. Khawtlang, Kohhran le nangmah:
- Kohhran leh khawthlangah hi chuan ka inhmang vak lo, naupantet atangin zirna avangin ka nu leh pa bulah hian ka awm tlem a, mi zingah hian ka tel vak ngai lem lo. Zirlai kan ni bawk nen ka zirnaah hian ka inpumpek tawp thin. Mahse tunah chuan Pathian zarah zirna lam pawh kan zo tawh ang a ni a, theih ang anga inhman chu ka tum ve tawh.

16. Social Media leh Nangmah:
- Social Media hi ka khawih lutuk lo a, mahse, chinchang hriat nan leh tunlai khawvel chanchin hriat nan ka hmang thin.

17. Mizoram ṭhalai tam tak tlakchham:
- Mizo thalai tam tak tlakchham nia ka hriat chu tumruhna leh dawhtheihna. Hnathawhnaah emaw, zirna school ah pawh harsatna leh tawngkam na tak tak te kan tawh chang a awm thei a, chutiang hunah chuan dawh hram hram ila, beih fan fanna leh tumruhna kan thlakchham avangin kan hlawhchham fo thin.

18. Mizo ṭhalaite hian ngaihsan tur dik an ngaisangin i hria em?
- A nawlpuia thlir chuan ngaihsan tur dik an ngaisang lo niin ka hria.

19. Ngaihsan tur dik nia i hriat:
- Keimahah chuan an thil tih apiang hlawhtling ngei tura ti mi, sawisel loa an phak tawka an thil neih te hmang thiam mi, dikna ngaina mi leh mahni aia dinhmun hniam zawk pawh enhrang/ hmusit lova mi ropui tak tak nen a thlir dan inang veka thlir thin mi hi ka ngiasang. Chuan, mahni hma sial lova khawtlang leh kohhranah an theih ang anga in hmang ho hi ka ngaisang bawk.

20. Hlawhtlinna tura pawimawh: Taimakna, dawhtheihna, inpumpekna leh tumruhna

21.  I hlauhber: Pathian nena kan inlaichinna a chhiat ka hlau ber.

22. Hnam dang nupui pasal neih hi- Duhthusam chuan mahni Mizo pui ngei neih hi a tha ka ti.

I thalaipuite tan fuihna--
- Ka thalaipuite ka chah duh chu kan nunah hian Isua hi lal berah dah ila, chuan thil kan tih apiang hi a rah chhuah kan hmuh hma chu bansan lovin taima tak leh tumruh takin bei fan fan ang u. Engkim hi ei hmuh theihna vek a ni a, kan thawhrim phawt chuan, eng hna pawh ni se tlawm lua a awm lo. Chuan, hnam dang ringlotute nihna sang tak tak chelh te hi an thawhrimna rah vek a ni, keini Pathian nung betute phei chu ringlo mite thawh zat thawk ila,  Pathian hian a let tam takin mal min sawm ngei ang.


EXPLOREMIZORAM.COM i hmuh dan:
- Explore Mizoram hi a tha tak zet. Mizo thalaite chawikan na'n leh thil hriat zau na'na inthawhrimna hi a ngaihsanawm tak zet ka ti. In kal zelna turah duhsakna sang ber ka hlan a che u.


Founder/Editor
Explore Mizoram


(Feedback at: admin@exploremizoram.com )

[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]




(Website leh a hnuaia fakna hi lo hmet ve rawh.)

Post a Comment

0 Comments