ZAIMITE HUANG: Zaia sawm hlawh - Ngurthansanga

Khawruhlian tlangval, Zaithiam Ngurthansanga kan belchiang.


'Ngura' tia hriat lar leh koh thin Ngurthansanga hi K Lalsangliana leh Zosangliani te fapa niin, June 20, 1994 khan lo piangin, Unau mipa pahnih leh hmeichhia pathum zinga upa ber dawttua ni.


'Ngura' te hi Khawruhlian khua Aizawl district chhuak niin, tunah hian Venghnuai, Aizawl-ah chengin a khawsa mek.

NGURTHANSANGA - VULMAWI LAMLIAN

Ngura hi Youth Icon 2019 ah khan Top 10 ah inhlang kaiin, khata tang khan chawl lovin hmalam a pan zel a, tunah hian ama pualin Music video pahnih bakah cover pakhat a tichhuak tawh a. Nikum atang khan Seraphic Choir-ah a tel a, Music video an siam-ah pawh a inlan tawh nghe nghe a ni. Tin, Ngura hi Mizo Zirlai Pazwl (MZP) Sub - Headquarters, Khawruhlian -ah hruaitu a ni bawk a ni.

Seraphic Choir

Ngura hi zai tura sawm a hlawh chho hle a, nikum YMA Day puala ZONET in an buatsaih 'Zo Zepui Zan-ah' khan inlanin, kumin Chapchar Kut 2021 Aizawl-ah a zai bakah MZP general headquarters buatsaih programme hrang hrangah zai tura sawm a hlawh hle bawk a ni.




Zirna lam-ah Master of Arts(Mizo) 2018 zo tawhin, Mizoram zaithiam-ah chuan lehkha thiam pawl zingah a tel nghe nghe awm e. Hetiang hi zirna lama a sulhnu a ni; Middle Section- Don Bosco School, Khawruhlian(2008), High School Section-Tuikual South High School (2010), Higher Section- Govt. Mizo Higher Secondary School (2012), College - Govt. T. Romana College (2016), M.A- Mizoram University(2018).

Hobby- Zai leh țhian kawm

Album/ Music video tihchhuah tawh zat: Music Video 2 leh Cover Video 1


I duhzawng leh ngainat zawngte:
Rawng - A pawl, a var, a dum leh vutbuak(chhawhchhibupawlh)
Chawhmeh  - Alu, Dal leh Vawksa(A dang pawh a la tam mai, sawi ber tur a vâng)
Incheina - Formal leh Casual deuha inchei hi ka ngaina ber
Rimawi – Country, Slow Rock, Blues leh Traditional Music
Mizo Ziaktu zingah - James Dokhuma
Hla - Lalpa i rawngbawla min koh hi(Ka hla thiam hnasak ber a ni bawk)
Hla phuahtu - RL Kamlala

Ngurthansanga - A leng del del

Mize ngainat zawng: Mize thup-mi ni lo/langtlang nun, a hun leh hmun hria, țhiante tana mi inpe. 

Mize ngainat loh zawng: - Mi rel chîng, mi nihna lo va fak vak/sawi vak ching, mi rilru chhia.

Relationship status: - Single(🤭)

Kawppui atan duhzawng: - Hmeichhia ngei ni se😅, an kawppuite ngaihsaka hrethiam mi, mi puitling, a kawppui tana țawngțai peih mi.


Zawhna dang:
1. A tel lova i awm theih loh: Nunna

2. I nun kaihruaitu: Ka Nu leh Pa leh ka Ni te min țawngțaisakna

3. Hringnuna i hlauh ber: Nu leh pa neih loh

4. I tih ngai miah loh tur: Mahni intihhlum

5. Mizo Tualzal nuna ṭha i tih: Tlawmngaihna te, țhenawm khawveng inngaihsak tawnna te. 

6.  Quote i duh ber: A hmaa harsatna awm hmachhawn ngam lo mi chu eng tikah mah a ding chhuak ngai lo vang.

7. Mizote tan 'Fa neih tlem' inzirtir hi a ṭulin i hria em?
- Tun dinhmunah hi chuan a țul nachhan ka hre rih lo. Mahse, chhungkaw dinhmun azirin neih tam leh neih tlem chungchang chu ngaihtuahna sên a țha hle.

8. Khawtlang, Kohhran leh nangmah:
- Theih tawpin ka inhmang a, chu chuan ka nun pawh a kaihruai hlein ka hria.


9. Social Media leh Nangmah:
- A țhat lohna tam tak awm mahse, a țhatna hi chu hmang chhuak țha vein ka inhria.

10. Mizoram ṭhalai tam tak tlakchham:
- Teirei peih (Hna zawnnaah leh hnathawhnaah)

11. Mizo ṭhalaite hian ngaihsan tur dik an ngaisangin i hria em?
- A tam zawk hi chuan kan ngaisan tur dik kan ngaisang lovin ka hria.

Ngurthansanga - Chalmar Zai



12. Ngaihsan tur dik nia i hriat:
- Theihtawp chhuaha beia, mi hlawhtlingte(Eng hnaah pawh)

13. Hlawhtlinna tura pawimawh:
- Beidawng lo va beih, kan beidawng a nih pawhin beidawn hlen loh.

14. I nuna hloh i hlauh ber:
- Chhia leh țha ka hriatna hi hloh ka hlau ber. 

15. Zofate inpumkhatna hi a tak a thlen theih i ring em?:
- Aw ring e. Chumi a thlen theih nan chuan mimal tin hian mawhphurhna kan nei țheuhin ka hria.

16. Hnam dang nupui pasal neih hi:
- An duh a nih chuan nei rawh se, mahse, an lo chhuahna an zah lo angah ka ngai.


Thalaipuite hnena chah duh:
- Ka țhalaipuite u, mahni hi i inhrechiang ang u. Thil kan ti a nih chuan theihtawp chhuah ila, keimahnia a țha ber zel i pe țhin ang u.

EXPLOREMIZORAM.COM i hmuh dan:
- A țha ka ti khawp mai. Mizoram chhunga thil thleng eng pawh ram pâwn thlenga mitena an lo hriatna a ni a, kal zel se ka tiin duhsakna ka hlan nghak bawk e.



Founder/Editor
Explore Mizoram


(Feedback at: admin@exploremizoram.com )

[Website ah hian sumdawng leh mi tin tan tlawmtein fakna kan dahsak thei e. WhatsApp +919402125273 ]




(Website leh a hnuaia fakna hi lo hmet ve rawh.)

Post a Comment

0 Comments