Myanmar raltlan-te chungchang-ah Central official kawm; chenna leh ei tur nghaihtuahsak turin India Sawrkar ngen

Aizawl | March 23, 2021: Chief Minister Pu Zoramthanga aiawhin State Planning Board Vice Chairman H Rammawi, MP(RS) K Vanlalvena  leh MNF President Adviser Rosangzuala te chuan nimin tlai khan Joint Secretary, Ministry of Foreign Affairs, Myanmar and Bangladesh changtu B.M Smita chu a pisa ah an hmu.

Tunlai Myanmar ramchhung politics boruak inlumlet mek leh Mizorama Myanmar raltlan lo lutte chungchang te, Mizoram chhim lam atanga Sittwe lawngchawlhna hmun pawh tur kawngpui a tlang thuai theihna tur chungchang te an sawi pui.

Chief Minister aiawh team te chuan Joint Secretary an kawmnaah hian Mizoram sawrkar leh Mizo mipuite duh ber chu Myanmarah remna leh muanna a awm thuai a, thisen chhuahna leh pawisawilote nunna laksak hi tihtawp a nih a, Myanmar ram mipui te duh dan ang taka an ramah mipui rorelna, democracy tundin hi a ni, an ti a. Hetih rual hian sipai sawrkar tihduhdahna laka inhumhimna zawnga India ram rawn beltute hi Myanmar ram a ralmuan hma chuan tumah thawn kir loh ni se, a lo lutte chu chenna tur leh ei tur an mamawh ang te India sawrkarin ngaihtuah sak se tih hi kan ngenna a ni, tiin an thlen a.

Sawrkar laipuiin India ram tan leh a bik takin NE mipuite hmasawnna tura sum tam tak senga ruahmanna a kalpui mek, Act East policy hi Myanmar buaina chungchanga India sawrkar policy a fuh loh chuan hlawhchham vek thei a ni tih te, NE state zawng zawngte kawtchhuah pawimawh ni tur, Lawngtlai - Sittwe Seaport kawngpui laih mek chu a hlawhtlin ngei na tur kawng dap a tul thute Pi B.M.Smita hi an sawipui bawk a ni.

- DIPR

Post a Comment

0 Comments