Serchhip | March 13, 2021: Fisheries minister K Lalrinliana chuan tukin khan Pradhan Mantri Matsya Sampada Yojana (PMMSY) hmanga Sangha pui dahkhawmna leh siam chhuahna (Fresh Water Fish Brood Bank), Thenzawl Fish Farm a siamna tur hmun a tlawh a, hmalak dan tur a enpui.
Minister hian he Brood Bank siamna tur atana Department ruahmanna te enin a hmunhmate a fang a. Tui hnianghnar a awm theih leh theih loh te, ni a hmuh that dan turte, tui a thianghlim leh thianghlim loh te uluk takin a enpui a ni. A fur a thala tui hnianghnarna hmunah ngei hetiang brood bank hi dah a tul avangin engkim uluk taka atir atanga kalpui a ngaia, tha taka a puitlin ngei theih nan theihtawp kan chhuah tlan a tul a ni tiin thawktute chu a chah a ni. Pu K. Lalrinliana hian Brood Bank siam ruala construction dang awm turte kalpuina tur hmun te pawh thlir puiin a tul anga la enpui chhoh zel a tum thu a hrilh a ni.
Thenzawl Fish Farm ah hian Pradhan Mantri Matsya Sampada Yojana sum Rs. 415.60 lakh sengin 50,000 sqmtrs a zau Sangha pui, no hring tur vulhna hmun tur dil siam tura ruahmanna kalpui mek a ni a. Sum hi Central sawrkarin Administrative Approval a pe fel tawh a sanction hmuh thuai beisei a ni.
Minister hi Health & Family Welfare Board vice chairman ZR Thiamsanga, MLA leh MYC chairman Dr Vanlaltanpuia MLA ten an tawiawm a, SDO, Thenzawl Amol Srivastava IAS, Fisheries director F Vanlallawma leh DFDO Serchhip Lucy Lalrinpuii, DCSO Serchhip C Zadailova leh mi dang ten an lo dawngsawng a ni.
- DIPR
Post a Comment
He post chungchanga i ngaihdan lo sawi ve rawh: