ZORO Ṭhalaiin Pang Zirlai Pawl Assembly hmanpui

Aizawl | February 4, 2021: Pang Zirlai Pawl(PZP) chuan February 2-4, 2021 khan Vathuampui Lawngtlai District ah General Assembly an hmang a. PZP general assembly hi Zo Re-unification Organisation (ZORO) chuan an hmanpui a, ZORO atang hian Thalai President L Ramdinliana Renthlei, Lalentlinga Thalai General Secretary leh H. Lalthuthlunga Zate Thalai General Secretary ten an hmanpui a ni.

He hun hmanpuitu L. Ramdinliana Renthlei ZORO Ṭhalai president chuan thusawiin, "ZORO chu khawvel hmun hrang hrang a Zofate kan inpumkhata, kan insuihkhawm a, rorelna pakhat hnuaia awm hi a tum a ni. Pathian engkim ti thei kan nei a, a duh chu a tung ding a, a duh  chu a paih thla thei. Mizoram pawh min la tungding ngei dawn a, Zofate rorelna pakhat hnuaia awmin independent hi kan la hmu dawn a ni."a ti a.

L. Ramdinliana Renthlei chuan Myanmar harsatna tawh chungchang sawiin, "Zofate hi hmun hrang hrangah kan awm a, kan unau tamna ber Myanmar-ah chuan buaina a awm mek a, kan unaute khian harsatna tawkin Mizoram-ah an la rawn raltlan leh ngei ang. Myanmar a kan unaute hi kan lo dawm thiam a ngai a, hmana Burma mi, Nghahpih tia kan lo hmuhsit ṭhin ang kha tih a hun tawh lo a. Kan unaute mangang hi kan lo tuamhlawm tur a ni a, hemi tur hian Mizoram mipuite kan lo inbuatsaih a ngai a ni. Myanmar a kan unaute harsatna hi ZORO chuan kan hriatpui a, anmahni pui tur hian tih theih kan neih chuan kan tlan chhe dawn lo a ni." a ti bawk

ZORO Ṭhalai president chuan, "Mizoram buai laiin mi tam tak an tlan chho a, an ni chuan ṭha taka lo tuamhlawmin, an lo chhawmdawl a, mi tam tak phei chu an cham hlen hial a ni. Chuti anga ti ve tur chuan kan lo inbuatsaih  a ngai a. An manganna-ah hian lo hmusit lova, lo tuamhlawm zawl tur kan ni." a ti bawk.

Pang Zirlai pawl(PZP) Assembly 2021 hi ni 4th February 2021 zan hian a tiak dawn a ni.