Rajya Sabha MP K Vanlalvena'n Parliament Session neih mekah Indo-Bangladesh Border Road siam a tul thu a sawi chhuak

Aizawl | February 4, 2021: Parliament budget session neih mekah  vawiin khan Mizoram Rajya Sabha MP Pu K. Vanlalvena chuan *Motion of thanks to the Honble President speech* sawiho naah hun pek a nih angin Central sawrkarin Mizoram chhunga kawng laih hna a thawh mek te tarlangin sawrkar laipui chungah lawm thu a sawi a. Indo-Bangladesh Border road siam a pawimawh thu a sawi chhuak.





Silchar leh Aizawl inkar kawngpui Four lane laih hna bul tan thuai tawh tur te; Aizawl leh Champhai inkar kawng double lane laih tan mek te; Seling  atanga Tuipang thleng pawh tur kawngpui double lane laih mek te; Lawngtlai atanga Paletwa Myanmar Seaport panna kawng laih mek te chu Mizoram tan chauh ni lovin hmarchhak bial  pumpui tana tangkai tur a nih thu a sawi a. Tlabung bul Kawrpuichhuaha Indo-Bangladesh border trade centre dinna tura central sawrkar hmalak mek te,  Indo-Bangladesh insumdawn tawnna tur kawngpui Lunglei leh Tlabung inkar kawng double lane siamna tur tender tun thla chhunga ko tura India sawrkar hmalaknate chu lawmawm a tih thu a sawi chhuak a ni. 
India leh Bangladesh ramri hrula khaw thenkhatte leh BSF Out post thenkhat chu motor kawngin a pawh loh avanga Border Road siam tura Central sawrkar a ngenna te sawi chhuakin, ramri hungna(Border fencing) pawn lamah Mizoram khaw thenkhat a awm thu pawh a tarlang a ni. 
Pu K. Vanlalvena chuan Prime Minister Pu Modi sawrkar hnuaiah India ramin harsatna chi hrang hrang, Covid 19 avanga buaina te, China leh Pakistan ramri buainate, Cyclone leh lirnghing avanga buaina te, khau puang avang leh tuilian avanga buainate a rualin a hmachhawn a. Heti chunga Prime Minister Pu Modi sawrkar a dingchhuak thei chu ropui a tih thu Parliament ah hian sawi chhuakin Covid 19 dona kawngah USA ai pawha India a chet that zawk thute, Covid 19 hri len lai pawha India ram loneimi te thar chhuah za zela 20% a a pung thei chu lawmawm a tih thu a sawi a. Hei hi Pathian hruaina vang a ni tih a sawi lang bawk a ni.

Post a Comment

0 Comments