Valentine's Day pualin thisen pek runpui buatsaih


Aizawl | Feb 15, 2021: Mizoram State AIDS Control Society, Association of Voluntary Blood Donors leh Aizawl Civil Hospital Blood Bank te chuan vawiin khan Aizawl Civil Hospital ah Valentines’ Day pualin ‘Show Love, Give Blood’ tih thupui hmangin Thisen Pek Runpui an buatsaih.



He thisen pek runpui-ah hian hri leng karah pawh tlawmngaia thawkchhuak an thahnem hle a, thisen unit 131 a lut a ni.

Vawiina thisen pe zingah hian Miss Mizoram 2020 finalist zinga mi Lalhriatchhungi Sailo pawh tel vein thisen a pek ve bakah thisen pea kalte pangpar a lo hlan ve nghal a ni.


Valentine’s Day puala thisen pek runpui hi tuna AMC councillor candidate ni mek Pi Chuauzikpuii hian bul tanin, chuta tang chuan kumtin buatsaih a ni ta  ni.


Kum 2010 atangin kumtin buatsaih thin niin, nikum thleng  khan hemi programme kaltlangin a belhkhawmin Mizoram pumah thisen unit 7342 lai pek a lo ni tawh a ni. Heng zinga unit 4180 chu Aizawl Civil Hospital atana pek a ni tiin thudawnna chuan a tarlang.


Thisen pek runpui hi district tina district hospital-ah pawh buatsaih a ni a, district hrang hranga, a thlawna thisen pek runpui neih ah hian thisen unit 467 pek niin, chung zinagah chuan mipa 295 niin, hmeichhia 172 ten thisen an pe a ni.


 

Post a Comment

0 Comments