Naktip-ah Lawngtlai district healthcare worker-te hri danna dose hnihna pe dawn

Aizawl | Feb 15, 2021: Vawiin khan Lawngtlai District Task Force Immunisation (DTFI) chu an Chairman, Lawngtlai Bawrhsap Dr Andrew H. Vanlaldika hovin DC Conference Hall-ah an thu khawm a. Lawngtlai District-a hriselna lama thawktu (health care worker)-te hnena COVID-19 hri danna (vaccine) thawh khatna pek tawh dan leh a hmatawnga thawktu dang (frontline worker)-te hnena COVID-19 hri danna pek dan tur ruahmanna leh hri danna dang kaihhnawiha hma lakna chungchang te an sawi ho.

He thut khawmah hian Lawngtlai Chief Medical Officer Dr LP Malsawma bakah, health department, Lawngtlaia damdawi in hrang hrang leh ICDS lam official-te, police leh home guard lam hotute an tel a. Member Secretary, District Immunisation Officer Dr S. Thaizi hnen atangin report ngaihthlak a ni.

COVID-19 hri danna chu January ni 19, 2021 (Thawhlehni) khan Lawngtlai District-a healthcare worker (doctor, nurse, health worker, ASHA leh anganwadi worker & helper)-te hnenah pek tan niin, a thawh khatna (1st dose) hi mi 700-in an la a. February ni 17, 2021 (Nilaini) atangin healthcare worker-te hnenah 2nd dose leh frontline worker-te hnenah 1st dose pek chhuah ve leh a ni ang.

Vawiin thut khawmah hian special immunisation activity pawh tluang taka kalpui mek a nih thu ngaihthlak a ni a. Hei bakah hian, February ni 2, 2021 atanga National Immunisation Day kalpuiah Lawngtlai District chhunga nausen piang hlim atanga naupang kum 5 chin hnenah zenghri danna pek a nih thu ngaihthlak a ni bawk a. Lawngtlai District chhunga he hri danna la thei naupang 16,106 atangin naupang 15,924-in an la a, chu chu 98.9% a ni.

- DIPR