TLÂWMNA NUN

 

— Centenary C. Lalzahawma

     Columnist, Explore Mizoram


          “Lui chu a luan hniam poh leh fintu lui dang a nei tam ṭhîn a; tlâwmna nun nei apiangte'n ngaisângtu an nei tam ṭhîn.”

          Hringnun kawng kan zawh mêknaah hian he thu hi mi tinten kan hriat thar fo a pawimawh âwm e. “Tlâwm zâwk awm lohna hmunah inremna a awm thei lo,” tih hi. Dik ber nih tum tlatna hmunah te, chak ber nih tum tlatna hmunah te,  thiam ber nih tum tlatna hmunah te, thil hre ber nih tum tlatna hmunah te, fing ber nih tum tlatna hmunah te, fel ber nih tum tlatna hmunah te hian thil ṭha a chhuak ngâi lo va, inremna ni lovin buaina a chhuak zâwk fo ṭhîn. 

          Philippi 2:5-8 thuah chuan heti hian kan hmu, “He rilru, Krista Isua pawha awm bawk kha, nangmahniah awm rawh se; ani zawngin Pathian anga awma Pathian tluka awm chu thil thlakhlelh hleih theihah a ruat lo va, mihringte anga lo piangin, bawih angah a insiam a, amah leh amah a intitlâwm ta zâwk a. Tin, mihring anga lo awmin, a inngaitlâwm a, thi khawp hiala thu zawmin a lo awm ta a, kraws-a thihna ngei chu,” tiin. Pathian meuh pawh a thil siam mihringte lakah a tlâwm a, keini mihring ve mai maite phei hi chu kan mihringpuite lakah hian tlâwm a ngaih phawt chuan tlâwm ngawih ngawih tûr kan lo ni. “Inngaihlu apiang an tlâwm ang a; inngaitlâwm chu chawimawiin an awm ang,” tiin Luka 14:11-ah mi inngaitlâwmte chan ṭhat tûrzia leh mi inngaihlute chan chhiat tûrzia kan hmu bawk. Eng kawngah pawh ni se, a ṭha lam kawng chu zawh zêl mai tûr a ni.

          American Civil War lai khân President Lincoln-a leh a War Secretary chuan indona hmunah General George Mclell-a an tlawh a. Ina a lo awm loh avângin an lo nghâk a. A lo haw chuan General chuan pindanah lûtin a mutsan ta daih mai. War Secretary chuan Lincoln-a hnênah General chu bân nghal tûrin a râwn a. Mahse, Lincoln-a chuan a ngaidam a, tlâwm zâwkah ṭangin a inphah hnuai zâwk a ni. President Lincoln-a nûn ngei kha a ni Pierre Veror-in, “Inngaihtlâwmna hi mi thiltithei berte sin ṭhin puan chu a ni,” tia a sawi chu! Tlâwmna nun nei loin bân ta se, President Lincoln-a'n a tuar lo vang a, an General-in a tuar bawk hek lo vang. Nimahsela, an ram chuan a tuar ngei ang. Hruaitu lu ber ber pahnih khat an buai avâng hian ram pumin an tuar phah fo ṭhîn. Chu chu tlâwmna nun aṭâng chauha siam rem theih a ni.

          Chutih rual erawh chuan, mi â ang maia miten min ngaih loh nân tlâwm dân chin tâwk erawh kan hriat a pawimawh hle. Englai pawha tlâwm reng, mahni dikna leh dik lohnaah pawh ngawi renga thlir liam mai mai ṭhîntu erawh nih loh tum hrâm hrâm tûr a ni. Zahawm tak leh nêlawm taka awmin, mahni aiin midang ṭha zâwkah ruat ṭheuh ila, miten engtin nge min ngaih ang tih ngaihtuah chung zêlin ni tin hun kan hman a pawimawh hle. Hlimna chuai thei lo nei tûr chuan mahni intihtlâwm a ṭûl fo ṭhîn. Tin, tlâwm zâwk kan nih hian hnehin kan awm tihna a ni lo va, kan chakzia leh ropuizia kan lantîrna a ni zâwk. Tlâwm ngam mihringte hi mi huaisen ber berte an ni.

          Tlâng chhîpa lui hnâr nei, lui te tui luang chuan fintu a nei lo va, a nei ngai lo bawk ang. Chu lui tui chu ruam lamah a luan tlâk hma loh chuan! Chutiang tho chu an ni mi chapote pawh hi! Eng ang pawha hausa, khawvêl hriata mi ropui leh mi lâr pawh ni se, faktu leh ngaisângtu an nei ngâi lo vang. Tlâwmna nun nei tûra chapona tlâng chhîp aṭânga ruam lam pana an chhuk tlâk hma loh chuan!

          Engpawh ni se, mi zawng zawng nên inrema kan awm theih nân tlâwmna nun neih ṭheuh tum ila, kan duh dân anga midangte awmtîr tum mai lovin, midangte duh dân anga awm thei tûrin keimahni lam hi i inbuatsaih hmasa zâwk ang u.

Post a Comment

0 Comments