SAKEIBAKNEI VANGLAITE CHU

(Ka piancham pualin thu kam hnih khat)

- Remmuana Chawngthu.

Thuhma tawite:

Pathian zarah harsat leh buaina hrang hrang hual vel karah hriselna leh hlimna duhawm tak nen, kan piancham thleng leh theiin ka awm a; hei chen min pui a, min ṭanpuitu Pathian hnenah lawmthu awm rawh se.

Kumin chu rin loh deuhin, eng ni lo mah ila, kohhran leh khawtlang lamah chanvo neuh neuh ka nei leh thluah mai a; mahni tawka buai phili tak ka nih vang nge ni dawn, ramri buaina lian takte, India leh China inkar thute, America ram buainate, Burma sipai thuneihna rapthlak takte leh thil thleng mak pui puite, hre reng mah ila; ka ngaihven thui ṭha hman meuh lo a ni e.

Sakeibaknei chu...

Ramsa zinga ramsa dangte hlauh rawn, chak leh hlauhawm tak a ni a. Hmasang aṭanga tun thlengin ramsa langsar ber zingah a tel.

Huaisenna, chakna leh thiltihtheihna entirna pakhat atan an hmang fo ṭhin a ni. Bible keu ila, thuthlung hlui bikah hian sakeibaknei hi a lar hle a. Rom hunlai phei chuan an ngaihlu hle, ram tam takin an ram venghimtu atan pawh an hmang thin a ni awm e. Ramsa chak leh huai tak a nihzia hmuh tur a tam hle a ni.

Mithiamte chuan he ramsa taksa zaa sawmruk (60%) hi tihrawl sak ṭha tak a ni an ti ṭhin a, thahrui chak tak a neih avangin ramsa dangte zingah pawh hlauh rawn a hlawh a, a duh duh a ei thei mai zel niin an sawi a ni.

Chutih lai chuan he ramsa hi ramsa dangte angin a damrei lutuk ngai lo niin mi tam tak chuan an sawi ve bawk a ni.

Sam ziaktu chuan, *"Sam 34:9-10 Aw, a mi thianghlimte u, LALPA chu tih rawh u: Amah tihtute tan chuan tlakchhamna rêng rêng a awm si lo.*

*Sakeibaknei vanglaite chu an tlachhamin an ril a tam thin a:LALPA zawngtute erawh chuan thil tha rêng rêng an tlachham lo vang."* a lo ti ve bawk a.

Bible-ah hmun tam takah sakeibaknei chak leh huaisen thu kan hmu nain, Sam ziaktu chuan; chuti khawpa huaisen leh thiltithei pawh chuan rilṭam leh tlakchham hun a neih thu a sawi tlat mai; chutih laiin, Lalpa zawngtute erawh chuan tlakchham reng an neih loh tur thu kan hmu zui bawk a.

Sam 34:9 -ah chuan, _"Aw, a mi thianghlimte u, LALPA chu tih rawh u: Amah tihtute tan chuan tlakchhamna rêng rêng a awm si lo."_ tih thu kan hmu tel bawk a ni. Sawi tur tam tak a awm awm e.

Sakeibaknei chang a lo ni lo e. He khawvelah hian mi lian leh thiltithei, hausa leh chak tak lo ni tawh ṭhin, a hnua bawksawp a, tlu zawi nguaite chanchin hi hriat tur a awm nual a ni.

Khawvel ram ropui tak tak ni ṭhin, ropuinain a chhuahsan takte chanchin kan hre ṭhin a, miropui leh fing tak tak lo ni tawh, zahawmna tlâng aṭanga paihthlak lo ni tawhte hringnun pawh chhiar tur a awm ta nual mai.

Ni, khawvel hi a mum a, a inher kual vel a, thilmak leh chhui sen loh ṭha ṭha hi a herchhuahpui a; a ṭha lo lam deuhte, hriatthiam khawp thil tam tak pawh a herchhuahpui tel bawk chu a nih hi.

Mi ṭhenkhat tan lungchhe vankai a ṭahna ni a herchhuah laiin, mi ṭhenkhatte tan erawh ni lawmawm, hlimna namen loa nasain a herchhuak ve leh thung bawk a, a va her kual nasa tehlul em!

*A mak lo.*

Sakeibaknei koham rilṭam meuh pawhin tlakchham a neih chuan, keini mi derdep leh tlaktlai lo takte hian nasa takin tlakchham kan nei ngei ngei tur hi a ni ringawt.

*Mahse,*

Tlakchhamna ruam pik tak aṭanga min hruai chhuak a, tlaipuarna tlang thawveng nuam taka min muttir leh ṭhintu, kan Pathian chaka zarah phu loh malsawmna mak tak chu mak takin kan lo dawng leh ṭhin a,mak ti taka thlirin, mak ti takin kan en a, a mak kan va ti ṭhin em!

Sakeibaknei vanglai aia ropui a, chak leh mak taka min siamtu chu fakin awm rawh se. Hma lam hun thlir thiam tura kan thinlung min buatsaihin, finna leh chakna kan neih zel theih nan, A khawngaihna tuifawn chu kan zingah hian nasa takin lo fawn mawlh rawh se.

Kan beisei loh tlakchhamna a lo thlen pawhin, sakeibaknei vanglai- an rilṭam leh tlakchham an neih thin thute lo hre thar tel zel ila; tlakchhamna chuan tlachham lova min siam theitu leh tlakchhamna labo theitu hmel eng min thlir tir zawk mawlh rawh se.

A mite tan thil ṭha reng a ui ngai loh kha...

Sam 90:12 - "Kan dam chhûng nite chhiar dan tûr min zirtir ang che, Finna thinlung kan neih phah hialna tûrin".