MSU in an din cham vawi 20-na lawm; mahni inhai vurna leh sahmim puarna ringawt ngaihtuah chung chuan zirlai hruaitu ṭha a nih theih loh - MSU President

Aizawl | February 13, 2021: Mizo Students' Union (MSU); General Headquarters, Aizawl chuan MSU din champha vawi 20-na, February ni 12, 2021 lawmna leh Leadership Training chu nimin chawhnu dar 1:30 khan Daifim picnic spot, Sihhmuiah an hmang a, zirlai hruaitu ṭhahnem tak an tel a ni. He hun hi Tv. Lalramhluna Fanai, Treasurer, MSU Gen.Hqrs chuan a kaihruai a, Tv. Peniel C. Rinmuanpuia, President; Aizawl City College Joint Students Union (ACCJSU) leh Vice President Gov't Aizawl College Students Union ni bawk chuan hunserh a hmang a ni.

Inhmelhriattirna leh pawl hmalakna tlangpui Pu Samuel Zoramthanpuia, General Secretary hnen aṭanga ngaihthlak a nih hnu ah, President Pu J. Lalmuanzuala chuan thusawiin, "MSU hi kum 1986 ah Pu R. Vanlawma hovin Mizoram MLA seatah General qouta a awmlohna tur chungchanga hmalatu ber ni mah se, mei mit lova dinthar leh a nih kum 2001 hi pawl din kum upat ringawt duhloh vangin vawiin hian MSU dincham kum 20na kan lawm ta a ni." a ti a. Pu Muana chuan, "zirlai pawla kan inhman chhan hi Ram leh zirlaite tan nise, mahni inhai vurna leh sahmim puarna ringawt ngaihtuah chung chuan zirlai hruaitu ṭha a nih theih loh," a ti.

Leadership Training chu Pu Lalhmachhuana Zofa, Adviser MSU General Headquarters chuan thupui ṭhen 14 hmangin zirlaite fuihna leh zirtirna a pe a. Zirlaite'n hlawk thlak an tiin "I chanchin sawi leh tura i duh angin khawvel hmachhawn teh." tia chona a siam chuan kalkhawmte a ti phur hle. MSU kumpuan 2017 General Conference a lo pawm tawh "Ram leh Hnam humhalh nan Zirna Uar" tih chu Prof. JV Nunchunga, Senior Adviser in sawi zauna leh kum 2020-2022 chhung atan a hawng a. Zirlai hruaitute chu Zirna kawnga hlawhtlinna atan Ram leh Hnam hmangaih a ṭul zia sawiin Mizo kan tih hi Zofate inzawmkhawm mai aṭanga piang anih avangin tumah inlak hran a remloh zia uar takin a sawi a ni. Zirlaite tana Career Guidance chu Tv. RK Hnuna, Director Zo Career leh Vice President ni bawk chuan a hmanga, zirlaite chu danglam bik ni ngam turin a chah a ni. Lawmthu sawina Tv. Zodinsanga, Finance Secretary hnen aṭangin ngaihthlak a ni a. Zirlai kalkhawmte'n MSU Rising Day lawmna chu hlawk takin an hmang a ni.

MSU Rising Day hi Mizoram hmun hrang hrang MSU dinna khua ah te a lawmna hun hman a ni a, hriattheih chinah Regional Headquarters Lunglei chuan Rising day pual hian zirlai harsa zawkte ṭanpuina school hrang hrangah an hlan kual a. District Headquarters Hnahthial chuan pawl sawm leh pawl sawmpahnih zirlai exam hmachhawn turte tlawh kualin an mamawh chi hrang hrang an pe a. Headquarters Thenzawl chuan intuaitharna hun hmangin zirlai exam hmachhawn turte fuihna hun an hmang a. Darlawng Branch te pawhin khawtlang tihfaina hun an hmang bawk a ni.