Health Minister-in West Phaileng leh Lengpuia PHC bakah NIT hmun tlawh

Aizawl | February 13, 2021: Health Minister Dr.R.Lalthangliana chuan Bangladesh Border Trade Centre tur, Silsury nimin lama a tlawh hnuin, Vawiin February ni 13, 2021 (inrinni) zingkar khan West Phaileng Primary Health Sub-Centre chu a tlawh a, bialtu MLA Pu Lalrintluanga Sailo, Dy.Chief Whip, Govt.of Mizoram chuan a tawiawm a ni.


Minister hian PHC hmun tlawhin a tihchangtlun dan turte a en a, Doctor leh Nurse  Quarters hmunhmate a en fel bawk. Thawktuten Lab. Technician an mamawh thu an sawi chu Financial Year thar nghah lawk a ngaih thu leh, chumi hnu lama tihfel sak theih an nih tur thu a sawi a ni. Minister hian a tul a pianga hman atan PHC-a thawktute chu Rs 10000/- (cheng singkhat) a pe a, Minister hi Medical Officer leh khawtlang hruaituten an lo dawngsawng a ni. Hemi hnu hian LESDE (Labour Employment Skill Development Entrepreneuship) Quarters leh Building 11 vel sak sa, chhawr tangkai zui loh chu tlawhin Minister chuan heng hmunhma leh in sak sate hi tangkai taka hman a nih theihna turin Cabinet-ah thlen tum thu a sawi. West Phaileng Higher Secondary School pawh tlawh nghalin thawktuten a tul anga an lo hman atan Rs.10000/- a pe a. Education Minister a nih laia West Phaileng Higher School School hi Lump-sum grant in aid-a an dahte zing a mi a nih thu sawiin, Budget Session zawh hnuah a tih hmasawn kawnga hmalak dan tur an ngaihtuah tur thu a sawi a ni.
H & TE, Minister Dr.R.Lalthangliana hian West Phaileng a tlawh hnu hian Lengpuia National Institute of Technology (NIT) Mizoram Campus sak mek a tlawh a, NIT Mizoram Director Prof. Rajat Gupta leh a thawhpuiten lo dawngsawngin an harsatna tawhte an lo thlen a. NIT Mizoram hotute sawi danin Lengpuia NIT hmun atan hian ram acre 150 pek an ni a. Kum 2014 atang khan cheibawl tanin tunah hian Campus chhunga inkalpawhna kawng leh street light bakah campus ram hung (fencing) an zawh tawh thu an lo sawi a, Forest Clearance a awm loh avangin kum 2018 atang khan khawih chhunzawm theih a ni tawh lo tih Minister hi an lo hrilh bawk a.  NIT sak chhunzawmna tur cheng vaibelchhe 669 chu sawrkar laipuiin a sanction vek tawh avangin forest clearance a awm veleh chak taka hma an lak nghal theih dawn thu an lo sawi bawk a ni. 
Minister chuan Mizoram tana rohlu ni tur NIT chu Chief Minister Pu Zoramthanga pawhin a ngai pawimawh hle a ni tih a sawi a, kum 10 lai mai NIT Mizoram chu baihvai takin an lo kal tawh a, thawktute thahnemngaihna azarah Temporary Campus chu Aizawl-ah mi in hmun hrang hrang luah chungin an kalpui a, NIT hi Act of Parliament-in "Institute of National Importance" ah hian a puang tawh bawk nen, Mizoram sawrkar chuan rang taka tihpuitlin a nih theih nan theihtawp chhuahin a tul ang ang bawhzui turin hmalak an tum tih a sawi a, hmalakna tur te pawh an sawiho nghal bawk a ni.

Minister hi MYC Chairman Dr. Vanlaltanpuia, MLA, Industrial Development Board Vice-Chairman Pu C. Ramhluna, Chief Secretary Pu Lalnunmawia Chuaungo bakah Higher & Technical Education department hotuten an tawiawm a ni.

NIT Campus hmun tur a tlawh hnu hian Minister chuan Lengpui PHC a tlawh lehnghal a, Dr.H.Lalchungnunga Director, Health Services leh a hoten lo dawngsawngin Lengpui PHC tihchangtlun dan tur an en a ni.

Minister chuan Lengpui PHC chu Airport hnaiha awm a nih avangin emergency thilah leh kawng hrang hrangah pawimawhna riau a nei a, hei vang hian kan ngaih pawimawh a tul a ni, a ti a. Lengpui PHC hmunhma hung (fencing) dan turte, tui dahkhawlna lian zawk ruahman dan turte, doctor leh nurse bakah staff dangte quarters sak dan turte an enho a ni.

- DIPR

Post a Comment

0 Comments