Mizoram Assembly budget session tan; Sorkar Bill 3 leh Private Member Resolution 77 a lut tawh

Aizawl | Feb 23, 2021: Mizoram Legislative Assembly pariatna, thutkhawm tum 7-na, Budget Session chu vawiin chawhma dar 10 leh a chanve khan tan a ni a, dar 11 vel khan zawh a ni a, naktuk-ah assembly hi chhunzawm a ni ang.


Session ni hmasa ber vawiinah kum khata Session neih hmasak bera tihdan pangngaiin House-ah Governor PS Sreedharan Pillai-in thu a sawi a, Governor thu sawi chunga lawmthu sawina – Motion of thanks put luh a ni a; Assembly session neih dan tur leh hemi chhunga hman tur ‘Standard Operating Procedure’ House pawmpui turin Speaker-in a chhawp chhuah a ni bawk.

Governor thusawi hetah dah a ni

Assembly Secretariat atanga thu dawn dan chuan nimin thleng khan House chhunga chhan tur zawhna 380 leh ziaka chhan tur zawhna 189 a lut tawh a. Sorkar Bill 3 leh Private Member Resolution 77 a lut tawh bawk a; sorkar lehkha pawimawh House-a pharh tur 11 a lut tawh bawk.

Session hun hman dan tur hi tun thla ni 18 khan Speaker kaihhruai Business Advisory Committee chuan an duang fel tawh a. An duan chhin dan chuan Session hi vawiin atanga March ni 17 thleng, ni 23 chhung neih tur a ni a, a karah sorkar chawlh, Inrinni leh Pathianni te a tlak nual avangin House member-te ro rela an thutkhawm ni tak chu ni 15 a ni ang.

Sorkar kum lo thar tura Mizoram sorkar sum hman dan tur ruahmanna, Budget chu thla thar March ni 1-ah Finance changtu Chief Minister-in House-ah a pharh dawn a ni.

Source - AIR Aizawl

Post a Comment

He post chungchanga i ngaihdan lo sawi ve rawh:

Previous Post Next Post