Health Minister-in ramri-a COVID-19 Screening Point leh BSF duty na hmun leh khaw hrang hranga damdawi in a tlawh

Aizawl | Feb 27, 2021: Health & Family Welfare Minister Dr. R. Lalthangliana chuan vawiin khan Mizoram kawtchhuah Bairabi leh Vairengte-a COVID-19 Screening Point a tlawh a, Assam leh Mizoram inrina hmun Bairabi Zophaia Mizoram Police Border Out Post leh Vairengte leh Lailapur inkara BSF duty na hmun bakah khaw hrang hranga damdawi in te a tlawh bawk. Minister hi Health & Family Welfare Board Vice-Chairman Dr. ZR Thiamsanga, MLA, Bamboo Development Board Vice-Chairman Dr. K. Pachhunga, MLA leh Health department hotu pawimawh ten an tawiawm a ni.


Minister hian Bairabi-a COVID-19 Screening Point a tlawhna ah hian Bairabi khawtlang hruaitute leh Screening Point a duty ten an lo dawngsawng a, an mamawh leh harsatnate lo thlenin Minister hian a theih ang anga chinfel sak nghal an nih tur thu in a chhang a, a tul ang anga an lo hman atan Rs. 10,000/- a hlan nghal bawk a ni. Bairabi screening point ah hian volunteers 10 duty turin an inpe a, tun dinhmunah volunteers 9 an duty mek a ni.
Bairabi screening point a tlawh zawh hian Zophai Border Outpost a duty Mizoram Police te a tlawh leh a, Mizoram kan him theih nana an inpeknaah Mizoram mipuiten an thlamuanpui a ni tih hrilhin an mamawh zualpuia an lo hman atan Rs. 10,000/- a hlan a ni.
Bairabi a tlawh hnuah Minister hian Vairengte-a COVID-19 Screening Point a tlawh leh a, Serlui bialtu MLA Pu Lalrinsanga Ralte, Rubber & Allied Crops Development Board Vice-Chairman ni bawk hovin Vairengte khawtlang hruaitute leh screening point-a duty ten an lo dawngsawng a, an dinhmunte Minister hnenah report in an mamawh leh harsatna tawhte an lo thlen a, Minister chuan Mizoram luhka a screening point hrang hrangte an ngaih pawimawh thu sawiin, a thawktute indaihlohna leh screening point tihchangtlun dan an ngaihtuah mek thu a sawi a, an harsatna leh mamawh an thlen te pawh a rang thei ang bera ngaihtuah a nih tur thu sawiin, an mamawh atana an hman turin Rs. 10,000/- a hlan nghal a ni. Vairengte screening point ah hian chhunzan zawmin duty indah a ni a. Volunteers 3 telin mi 18 duty an awm mek a, shift hnih a inthenin nitin darkar 12 ve ve an in duty chhawk a ni.
Vairengte Screening Point a tlawh zawh veleh hian Minister chuan Mizoram leh Assam ramri buai vanga Mizoram lama duty tura Sawrkar Laipuiin a ruat Border Security Force te duty-na hmun Vairengte checkgate thlang ami chu a tlawh nghal bawk a ni.
Minister hian Bairabi leh Vairengte a tlawh pah hian khaw hrang hranga damdawi in 6 - Vairengte CHC, Bairabi PHC, Bilkhawthlir PHC, Kawnpui PHC, Lungdai PHC leh Thingdawl Sub-Centre te a tlawh nghal a, hengah te hian a thawktute nen inkawmna hun hmangin an dinhmun te leh an harsatna te a ngaihthlak sak a, a theih ang anga chinfelsak tura bawhzui a nih tur thu a sawi a ni.

- DIPR

Post a Comment

0 Comments