ATMA leh Fisheries Department tang kawpin sangha khawi training an buatsaih

Aizawl | Feb 27, 2021: Agricultural Technology Management Agency (ATMA), Lawngtlai District; State Agricultural Management & Extension Training Institute (SAMETI), Mizoram; MANAGE Hyderabad leh Lawngtlai District Fisheries Development Office te tang ho buatsaih, thalai kut hna thawktute tana sangha khawi dan leh enkawl zui dan (fish rearing & management) training chu February ni 23 atanga ni 27 chhung khan tluang taka kalpui a ni.



He ni 5 chhung awh training hawnna inkhawm hi ATMA Lawngtlai District-a Assistant Technology Manager Pu H. Lalhmingmawia kaihhruaiin Lawngtlai BNRGSK Hall-ah hman a ni a. Lawngtlai District Fisheries Development Officer Pi Lalremsangpuii'n kal khawmte lawmna leh training kalpui dan tur a sawi a, training tan a ni.

He training hi Skill Training of Rural Youth (STRY) hnuaia buatsaih niin, Lawngtlai District-a thalai sangha khawi lama tui mite leh Fisheries Department hnuaia sangha khawitute koh khawm an ni a. Lawngtlai DFDO Pi Lalremsangpuii, Fisheries Extension Officer Pu HC Lalrintluanga leh Fisheries Demonstrator Pu C. Ramthanmawia te'n dil sawngbawl dan, sangha chi hrang hrang khawi pawlh dan, sangha chaw pek dan, sangha inthlah puntir dan leh sangha khawitute tana hriat tur tul leh pawimawh dangte chu a thu leh a taka entirna nen an zirtir.

Training-a telte hi February ni 25 khan Saikah 'L'-ah field visit neihpui ni bawkin, sangha dil puitling saah len (hapa net) zar dan leh thil pawimawh dangte a taka tihpui an ni a. Training-a telte hi certificate pek vek an ni bawk.

- DIPR

Post a Comment

He post chungchanga i ngaihdan lo sawi ve rawh:

Previous Post Next Post