Fisheries Minister-in Sangha khawituten an hman tangkai tur Web portal leh Mobile app ‘Fish-info Mizoram’ tlangzarh

Aizawl | Feb 23, 2021:  khan Fisheries Department changtu Minister Pu K. Lalrinliana’n tunlai khawvel changkanna hmanga mipuiten awlsam zawka Fisheries Department an dawr zung zung theihna tur Web portal leh mobile apps 'Fish-info Mizoram' a tlangzarh.


Pu K. Lalrinliana chuan Department in remhre taka tunlai thiamna hman tangkai dan an ngaihtuah chu lawmawm tiin sangha khawina kawngah hmasawnna rahbi a thlen ngei a beisei tih a sawi. Mobile App chu sangha khawitute leh Department tan thil tha tak tunlai thiamna hman tangkaina anih mai piah bakah Department in sangha dil endikna verify kawngah pawh hmanraw tangkai tak leh sum hum theihna a keng tel nia a hriat thute a sawi a ni.

Kum engemaw zat kalta atang khan mipuiin sangha khawi leh dil siam chu a hlawkna an hre chho mek a, sangha khawitu leh dil siamtu te pawh an pung chho niin Minister chuan a sawi a. Mizorama kan sangha mamawh intodelh thei turin Sawrkarin a thei ang angin hma a la mek tih sawiin hemi atana pawimawh tak mai sangha chi ah intodelh hi a ni a mahse a chi hi kan la tharchhuah tlem a, Department in sangha note awpkeu na hatchery lamah tan a la a, mimal hetiang hatchery siam pawh an awm mek a ni, a ti. Department chuan Mizorama lui dunga sangha kan neih ang Nghaphu sen, lengphar leh adangte chu dil a khawi chi a ni em tih a zirchiang mek thu a sawilang bawk.

He hun hi Dr. Lalzirmawia Chhangte IAS, Special Secretary, Fisheries Department in a kaihruaiin, He software siam saktu Mizoram State e-governance Society, ICT Department atangin technical report nghaihthlak a ni. Pu F. Vanlallawma, Director Fisheries Department in thusawina hun a hmang bawk a ni.
'Fish-info mobile apps atang hian Sangha khawitu, Sangha man a eizawng leh Luidung humhalhtu pawl ten Department ah registration an ti thei tawh dawn a, an dilna approve anih hnuah Identity card an download nghal thei dawn bawk a ni. Registration ti te hi an hmunhma chanchin (Geographical information) kimchang record vek a ni anga, Sangha dil awmna leh Luidung humhalh te pawh mumal taka record leh mapping tih vek ni tawh dawn a, Fisheries Database mumal tak Department chuan a nei thei tawh dawn a ni. Mobile application atang hian Sangha khawitu leh sangha mantuten an sangha tharchhuah/man te an report zung zung thei tawh dawn bawk a, kumtin Mizoram sangha tharchhuah pawh mumal zawka chhinchhiah theih beisei a ni. Mobile apps hi Playstore atanga download theih tura dah nghal a ni.
Fish Info portal hi Department Website 'fisheries.mizoram.gov.in' nen link a ni anga Department lam atangin hriattur pawimawh leh sangha khawi chungchanga zirtirna awlsam zawka pek chhuah theih tura ruahman a ni.
Tun dinhmunah chuan ' Fish info Mizoram' hi online registration leh information in pek tawn nan chauh a hman a la ni rih ang. Fisheries hnuaia hamthatna leh tanpuina hrang hrang online a mipui in an dil theihna turin Department chuan tihchangtlun chhoh zel a tum a ni.

Post a Comment

0 Comments