Bharat Scouts & Guides State Council Meeting nei

Aizawl | Feb 13, 2021: Nimin khan Mizoram Bharat Scouts & Guides State Council Meeting chu an President Chief Minister Pu Zoramthanga hovin CM office conference hall-ah neih a ni. Vice-president School Education Minister Pu Lalchhandama Ralte pawh a tel a ni.




Chief Minister Pu Zoramthanga chuan COVID-19 hrilengin ziaawm lam a pan zel beisei chungin Scouts & Guides chuan activity tam zawk an neih chhoh zel a duhsak thu a sawi a. Scouts & Guides chu thalai te nun kaihruaitu tha, mahni inthunun theihna leh hmanchang tangkai tak tak zirchhuahna a nih avangin enrollment pawh an pun chhoh zel a beisei thu a sawi bawk.
Minister Pu Lalchhandama Ralte pawhin hripui leng avangin nikum lamah hmalak a harsat laiin Scouts & Guides te chuan a him chinah activity tangkai tak tak eng emaw zat an tihlawhtling thei chu lawmawm tiin, India hmarchhak state-te inelna hrang hrangah lawmman la thei an awm chu fakawm a ti a ni. 


Nimin State Council Meeting-ah hian Chief Minister hian Mizoram Bharat Scouts & Guides chanchin lehkhabu, Pi Saizampuii ziah chu a tlangzarh nghal a. Meeting-ah hian kum 2021-22 chhunga program hman tur hrang hrang an ruahman chu pawm a ni a. Pawl inkaihhruaina State Bye-laws thar chhawpchhuah pawh pawm niin, kum 2021-2025 chhunga State Council hruaitu thar tur te thlan a ni bawk. 
President (Chief Minister) leh Vice President  pathum (School Education Minister,  Sports and Youth Services Minister leh Chief Secretary) te dinhmun hi nihna in a ken tel (by virtue of office) a ni a. Vice President dang pathum thlan tharte chu Dr. R. Tintlunga Hnialum, Lawngtlai, Mrs. L. Rohmingthanga, Chaltlang leh Pi Boichhingpuii, Chaltlang te an ni a. State Treasurer atan Pu Lalthangmawia, Zemabawk chu thlan a ni bawk.

Post a Comment

0 Comments