AMC Councillor a tling thei naupang ber Christina Roluahpuii

AMC inthlan 2021 a Ward 8 councillor atana thlan tlin Christina Roluahpuii Sailo hi kum 26 niin councillor atan thlantlin a ni a. AMC awm aṭanga councillor atana thlan tlin leh candidate naupang ber a ni.

Ngursavunga Sailo(L) police( Rtd.) leh pi Lalrokimi hrahsel te fanu Christina Roluahpuii Sailo hian a kum 26-na a hmang mek a, zirna leh thiamna lamah pawh a zahpuiawm loh viau mai.

Kum 2017 khan HATIM lunglei aṭangin B.com a zova. M.com hi Symbiosis college of Art and Commerce(Pune) aṭang kum 2019 khan a zo leh a, Pass satliah mai nilo, First Division-ah hial a pass a ni awm e.

Nungchang ṭha leh a tih tawh lama rilru pe mi a nihna te hi, Pune Mizo Christian Fellowship(PMCF)-in zirlai ti ṭha chawimawina an pek ṭhin kum hnih 2018 leh 2019 lai mai a dawng thei te hian a ti chiang viau a ni.

Kum naupang te ni chungin khawtlang leh ram vei tak mi a nihna te pawh ama ṭawngkam hian  a ti chiang khawp mai.

" Ka ṭhalaipuite hian politics hi muangchanga ngaihtuah a, kum upat hnua telvena chi ah chauh kan ngai hi hnampui zawkte kan tluklohna niin ka hria. Naktukah engnge thkeng dawn kan hriatloh avangin kan chak ṭhat lai, kan vanglai hian kan veng/khua/ram leh hnam tan penchhuah hi a ṭha zawk lo em ni? Mahni a duhthlang thei ṭheuh kan ni a, mi sawimawi avang emaw an sawichhiat vang emaw a phur hluai tur kan nilo.

Zirna avangin hmun dang/ram pawnah ka hun ka hmang ṭhin a. Tunah chuan ward/ram tan ṭangkai  nih ve hi ka duh a ni".

"State dang khawpui hmasawn zawkte ka hmuh ṭhin hian kan ram khawpuite tan hian rual ka awt hle ṭhin".

Nl Christina Roluahpuii Sailo te hi tunah hian an unau-ho in Armed Veng South-ah an cheng mek a ni.

Ṭhalai ten ram kan vei ṭan hi a lawmawm khawp mai. Khawtlang/Ram hmasawnna tur hi tu emaw kum upa, pension tawh te tih chi ah chauh dah lova. Rilru leh taksa chak vanglai, hna pawh duhthusama la thawh theih laia khawtlang/ram tan ngaihtuahna kan sen ve ngam hi a ṭha khawp mai. Christina-i sawi ang deuhin," mi sawimawi/sawichhiat vang emaw a phur hluai erawh thil ṭha ber a nilo khawp ang".

- Internet