VC inthlana lungawilohna thu thlen enfiah; result danglam a awm!

Aizawl | January 10, 2021: August ni 27-a VC inthlan a lungawilohna neite thu thlen enfiah niin, Tawipui North-II ah result danglam a awm.

      Nikum Village Council inthlan neih zawh taka Lunglei Dist chhung khaw 16 atanga inthlan chungchanga lungawilohna neite'n State Election Commission a an lungawi lohna an thlen te chu Lunglei Dist Election Tribunal ruahmanna in enfiah hna zawh fel a ni a. Tawipui North-II a tuna VCP nihna chelh mektu Independent Candidate Pu T. Lalhnehzova chu tling zo ta lovin inthlan neihlai a tling lo zawka puan Pu Ramnunmawia Independent Candidate tho chu a tling zawk tih finfiah a ni. Tawipui North-II VCP nilai mek T. Lalhnehzova leh Ramnunmawia te hi an vote hmuh inzat thum vawrah T. Lalhnehzova hi a vannei ta zawk a. Mahse, Vote chhiar that ngenna State Election Commission-ah thlen a nih angin Distrist Election Tribunal ruahmanna in Vote hi chhiar that a ni leh a, hetah hian Vote thi pakhat a lo awm tak avangin T.Lalhnehnzova ai hian Ramnunmawia hi Vote khatin a chak zawk tih pawm a ni ta a ni.

 Lungawilohna enfiah hna hi kar liamta nithum chhung khan DC Conference Hall Lunglei ah neih niin, hetah hian Official lam tel tur te leh lungawilohna thlenna khua atanga VC candidate tin aiawh te an tel a. Khaw 16 atanga lungawilohna an thlen hrang hrangte hi ngun taka ennawn leh a nih hnuah khaw 15 ah chuan engmah thil diklo hmuh a ni lo thung a ni. Lunglei Dist Election Tribunal Secretary Pu Collin Hlychho chuan, khaw 16 atanga lungawilohna neite thu thlen an enfiahna result chu nimin khan State Election Commission ah an thawn nghal thu leh SEC lam hian Official lehkha an tihchhuah thuai tur thu a sawi.

- AIR Aizawl

Post a Comment

0 Comments